လီဗာပူးနောက်ခံလူဂျိုးဂိုမက်ဇ်က ရာသီလက်ကျန်ကာလတွေအတွက် အသင့်ရှိနေတဲ့ သီးခြား စိတ်ဓါတ်လှုံ့ဆော်မှုတစ်ခုအကြောင်းကို ဖော်ထုတ်ပြောပြလာပါတယ်။ ခံစစ်အစွန်နေရာတွေမှာပါ ကစားနိုင်စွမ်းရှိတဲ့ ဗဟိုခံစစ်မှူးက လက်ရှိလီဗာပူးအသင်း အနေဖြင့် ယာဂန်ကလော့ပ်အတွက် ဆုဖလားတွေ ဆွတ်ခူးပေးဖို့ ဆုံးဖြတ်ထားတယ်လို့ ပြောပါတယ်။

တောင်လိုပုံနေတဲ့ ဒဏ်ရာပြဿနာတွေကြားမှာပဲ ဗန်ဒိုက်ရဲ့အချိန်ပို ခေါင်းတိုက်သွင်းဂိုးနဲ့အတူ လီဗာပူးက ချဲလ်ဆီးကို အနိုင်ယူကာ အခုဘောလုံးရာသီအတွက် ကာရာဘောင်ဖလားကို ရရှိထားပါတယ်။

ဝင်ဘာလေကွင်းဗိုလ်လုပွဲအပြီး ဂျိုးဂိုမက်ဇ်က “လူတိုင်းလည်း နည်းပြကြီးရဲ့အခြေအနေကို သိထားကြပြီး အခုဘောလုံးရာသီမှာ သူနဲ့အတူ ဒီလိုအခိုက်အတန့်တွေရရှိလို့ ဝမ်းသာပျော်ရွှင်ရပါတယ်။ ပြီးတော့ ကပ္ပတိန်ဗန်ဒိုက်ကိုလည်း လုံးဝကို အသိအမှတ်ပြုပေးရပါမယ်။ အခုလိုအရာတွေက ထုတ်ဖော်ပြောဆိုဖို့တောင် မလိုတဲ့ကိစ္စတွေဖြစ်တယ်ဆိုတာ ရှင်းပါတယ်။ လူတိုင်းလည်း ဒီကိစ္စရဲ့အရေးပါမှုကို သိထားကြပြီး အသင်းလိုက် ဆွေးနွေးမှုတွေရဲ့မိနစ်တိုင်းမှာ စိတ်ခွန်အားတွေ ရရှိနေကြပါတယ်။ အခုအချိန်မှာ ကလော့ပ်ရဲ့နောက်ဆုံး ရာသီဆိုတာကို လူတိုင်းသိထားကြပြီး သူ့အတွက် ကျွန်တော်တို့က အရာအားလုံးကို ပေးဆပ်သွားချင်နေရုံပါပဲ။ ဒီအတိုင်းပဲ အမြဲလုပ်ခဲ့ပေမယ့် အခုလို အဆုံးသတ်ကာလဆီ ဝင်ရောက်လာချိန်မှာ ပိုပြီးတော့ အလေးထားမိလာပါတယ်။ ဒါ အရမ်းကောင်းပါတယ်။ နောက်ပြီး ဒီအောင်မြင်မှုက အခုရာသီ၊ ကျွန်တော်တို့ရရှိနိုင်တဲ့ အချို့အရာတွေအနက် ပထမဆုံးတစ်ခု ဖြစ်လာဖို့ မျှော်လင့်ထားပါတယ်"

"သူကိုယ်တိုင် အသင်းအတွက် လုပ်နိုင်သမျှအရာရာတိုင်းကို လုပ်ပေးပြီးသွားပြီဆိုတာ သိရှိထားမယ်လို့ ကျွန်တော် ယူဆမိပါတယ်။ သူက အရာရာတိုင်းကို အနိုင်ရရှိခဲ့ပါတယ်။ လူတိုင်းကလည်း သူ့ရဲ့ဆုံးဖြတ်ချက်ကို လေးစားသလို နားလည်မှုလည်း ရှိကြပါတယ်။ ကလော့ပ်က ကျွန်တော်တို့ သိထားသူတွေအနက် ပညာအပြည့်ဝဆုံးလူသားဖြစ်ပါတယ်။ သူက အဆင့်သင့်ပဲလို့ ပြောရင် သူကိုယ်တိုင် အဆင်သင့်ဖြစ်နေပါတယ်။ ဒါပါပဲ၊ ကျွန်တော်တို့က သူ့ရဲ့ထွက်ခွာမှုအကြောင်းပဲ တဝဲလည်လည် တွေးနေလို့ မရပါဘူး။ ကလော့ပ်အတွက် အမျှတဆုံးဖြစ်အောင် လုပ်သွားပေးဖို့ပဲ လိုအပ်ပါတယ်”လို့ ပြောပါတယ်။