ကိုင်လ်ဝေါ်လ်ကာက မန်စီးတီးမှမထွက်ခွာခင် ပက်ဂွါဒီယိုလာနဲ့အတူ စကားစမြည်ပြောဆိုဆွေးနွေးခဲ့ပြီ ဒီဆွေးနွေးမှုမှာ သက်သောင့်သက်သာမရှိခဲ့ဘူးလို့ ထုတ်ဖော်ဝန်ခံခဲ့ပါတယ်။ဝေါ်လ်ကာက ဇန်နဝါရီအပြောင်းအရွှေ့ကာလအတွင်း မန်စီးတီးမှထွက်ခွာကာ စီးရီးအေဘီလူးကြီးအေစီမီလန်ဆီ အငှားဖြင့် ရောက်ရှိလာခဲ့ပါတယ်။ အစောပိုင်းမှာ ပက်ဂွါဒီယိုလာက ဝေါ်လ်ကာအနေဖြင့် သူ့ရဲ့ကစာသမားဘဝကို နိုင်ငံရပ်ခြားမှာ ကုန်ဆုံးခွင့်ရရှိရန် အသင်းမှထွက်ခွာဖို့အတွက် တောင်းဆိုခဲ့တယ်လို့ ပြောခဲ့ဖူးပါတယ်။ အခုအချိန်မှာတော့ နောက်ခံလူက သူတို့နှစ်ဦးအကြား စကားစမြည်ပြောဆိုဆွေးနွေးဖြစ်ခဲ့ပုံကို ဖွင့်ဟလာခဲ့ပါတယ်။

သတင်းစာရှင်းလင်းပွဲတစ်ခုမှာ ဝေါ်လ်ကာက “ပက်ဂွါဒီယိုလာနဲ့ ကျွန်တော် စကားပြောဆိုခဲ့ချိန် အဓိကအားဖြင့် ကျွန်တော်တို့အချင်းချင်းအကြားမှာထားရှိတဲ့ အပြန်အလှန်လေးစားမှုတွေကြောင့် အရမ်းသက်သောင့်သက်သာရှိတဲ့ ပြောဆိုဆွေးနွေးမှုတော့ မဖြစ်လာခဲ့ပါဘူး။ မန်စီးတီးအသင်းနဲ့အတူ သူရရှိခဲ့တဲ့ အောင်မြင်မှုတွေကို ကျွန်တော်လည်းပဲ ရရှိခဲ့ပါတယ်။ အသင်းအဝတ်လဲခန်းဆီ ကျွန်တော် ယူဆောင်လာပေးနိုင်မယ့်အရာတွေ၊ ကျွန်တော်ဖန်တီးပေးနိုင်တဲ့ အငွေ့အသက်တွေကို သူသိမယ်လို့ ယူဆမိပါတယ်။ မန်စီးတီးက ကျွန်တော့်ရဲ့မိသားစုပါပဲ။ ထမင်းချက်မှစပြီး သန့်ရှင်းရေးအထိ လေ့ကျင့်ရေးကွင်းဝန်ထမ်းတွေရော၊ ကြံ့ခိုင်မှုပိုင်းဆိုင်ရာနည်းပြတွေရော အကုန်လုံးပါဝင်ပါတယ်။ လူတိုင်း သဟဇာတဖြစ်အောင် ကူညီပေးနိုင်ခဲ့ပြီး ဒီအတွက်လည်း ကျေနပ်မိတယ်လို့ ထင်ပါတယ်။ ဒါပေမယ့် ကိစ္စတိုင်းက အကောင်းဆုံးဖြစ်လာတာမျိုးတော့ မဟုတ်ပါဘူး။ ကျွန်တော့်အတွက် ပွဲကစားချိန် လုံလုံလောက်လောက် မရရှိခဲ့ပါဘူး။ ကလပ်အသင်းသစ်မှာတော့ အခုထက်ပိုပြီးပွဲကစားချိန်ရရှိဖို့ မျှော်လင့်မိပါတယ်”လို့ ပြောပါတယ်။

လက်ရှိအချိန်မှာတော့ ဝေါ်လ်ကာက ဆန်စီရိုမှာ နောက်ထပ်ဆုဖလားအောင်မြင်မှုတွေ ဆွတ်ခူးနိုင်ဖို့ မျှော်လင့်နေပြီး အေစီမီလန်နဲ့အတူ ဥရောပချန်ပီယံဆုရရှိချင်တယ်လို့ ပြောပါတယ်။ ဝေါ်လ်ကာက “ဇလာတန်အီဗရာဟီမိုဗစ်နဲ့ ကျွန်တော် စကားပြောဖြစ်ခဲ့ပါတယ်။ သူက ကိစ္စတော်တော်များများကို ကျွန်တော်နားလည်အောင် ရှင်းပြပေးခဲ့ပါတယ်။ သူက ကျွန်တော့်ကို ဒီကလပ်အသင်းနဲ့အတူ ကြိုးစားနိုင်မယ့် အရမ်းကောင်းတဲ့အရာတွေအကြောင်း ရှင်းပြခဲ့ပါတယ်။ ကျွန်တော်တို့တွေ အီတလီစူပါဖလားဗိုလ်စွဲမှုအကြောင်းလည်း ပြောဖြစ်ခဲ့ပါတယ်။ ဒါက ကောင်းမွန်တဲ့စတင်မှုတစ်ခုပါ။ အမှတ်ပေးပြိုင်ပွဲနဲ့ပတ်သက်လို့ ပြီးပြည့်စုံမှုတော့ မရှိပါဘူး။ ဒါပေမယ့် ချန်ပီယံလိဂ်ပြိုင်ပွဲမှာတော့ အခွင့်အရေးတစ်ခု ရှိနေပါသေးတယ်။ အရင်လိုအဆင့်အတန်းမျိုးဆီ ပြန်လည်ရောက်ရှိနိုင်အောင် ကြိုးစားမယ့် အေစီမီလန်ကို ကူညီပေးဖို့အတွက် ကျွန်တော့်ရဲ့အတွေ့အကြုံနဲ့ ခေါင်းဆောင်မှုအရည်အသွေးတွေကို အသုံးချသွားနိုင်မယ်လို့ မျှော်လင့်မိပါတယ်။ ချန်ပီယံလိဂ်ဆုဖလားအနိုင်ရရှိမှုက အိပ်မက်တစ်ခု အမှန်တကယ် ဖြစ်ပေါ်လာခြင်းပါပဲ။ မန်စီးတီးနဲ့အတူ အရမ်းကောင်းတဲ့ချန်ပီယံလိဂ်ဗိုလ်လုပွဲမှာ ဒါကို ကျွန်တော်ခံစားမိခဲ့ဖူးပါတယ်”လို့ ပြောပါတယ်။

ဝေါ်လ်ကာက ဒေးဗစ်ဘက်ခမ်းကို ဂုဏ်ပြုသောအားဖြင့် အေစီမီလန်မှာ ကျောနံပါတ်-၃၂ ကို ဝတ်ဆင်သွားပါလိမ့်မယ်။ အပြောင်းအရွှေ့နဲ့ပတ်သက်လို့ စာရွက်စာတမ်းကိစ္စ အပြည့်အစုံပြုလုပ်ပြီးနောက် ဝေါ်လ်ကာက လာမယ့်လအတွင်း ပွဲဦးထွက်ပါဝင်ကစားခွင့်ရရှိဖို့ မျှော်လင့်နေပါတယ်။