ယူရို ၂၀၂၄ မှာဖြစ်ပွားခဲ့တဲ့အဖြစ်အပျက်ထဲမှာ ပါဝင်ခဲ့တဲ့ ဘယ်လ်ဂျီယံတိုက်စစ်မှူး လူကာကူက နိုင်ငံအသင်းကစားသမားဘဝကနေ အနားယူမယ့်အကြောင်း အံ့အားသင့်ဖွယ် ထုတ်ဖော်ပြောကြားလိုက်ပါတယ်။ လူကာကူဟာ ဘယ်လ်ဂျီယံသမိုင်းတစ်လျှောက် အကောင်းဆုံးကစားသမားတွေထဲကတစ်ဦးဖြစ်ပြီး နိုင်ငံအသသင်းအတွက် ၁၂၁ ပွဲမှာ ၈၆ ဂိုးအထိသွင်းယူထားနိုင်ခဲ့ပါတယ်။

ဒါပေမယ့်လည်း အခုချိန်မှာတော့ ချဲလ်ဆီးစတားဟောင်းက သူ့အနေနဲ့ ပြင်သစ်ကိုအရေးနိမ့်ပြီးထွက်ခွာခဲ့ရတဲ့အပြင် အဝတ်လဲခန်းထဲမှာ ပြဿနာတက်ခဲ့တဲ့အကြောင်းအရင်းတွေကြောင့် နိုင်ငံအသင်းကစားသမားဘဝကနေ အနားယူဖို့ နီးစပ်နေကြောင်း ပြောကြားလိုက်ပါတယ်။ ဘယ်လ်ဂျီယံအသင်းဟာ ပြီးခဲ့တဲ့နှစ်တွေကတည်းက ပြဿနာတွေတက်နေတာဖြစ်ပြီး ယူကရိန်းကိုသရေကျခဲ့တဲ့အုပ်စုအဆင့်ပွဲစဉ်အပြီးမှာလည်း ဒီဘရိုင်းတစ်ယောက် ပရိသတ်တွေကို နှုတ်မဆက်ပဲ ထွက်ခွာခဲ့တာဖြစ်ပါတယ်။

အဲ့နောက် ဘယ်လ်ဂျီယံဂိုးသမား ကော်တိုရစ်တစ်ယောက် နည်းပြ တီဒက်စ်ကိုထွက်ခွာခဲ့ပြီးနောက် အနားယူထားတဲ့ဆုံးဖြတ်ချက်ကို ပြန်လည်ပြောင်းလဲခဲ့ပါတယ်။ အခုအပတ်အင်တာဗျူးမှာ လူကာကူက ဘယ်လ်ဂျီယံအသင်းအခြေအနေအရပ်ရပ်ကြောင့် နိုင်ငံအသင်းကနေ အနားယူဖို့ ဆုံးဖြတ်လာခဲ့တာလို့ ဖြေကြားခဲ့ပါတယ်။

“ကျွန်တော် ယူရို နဲ့ ပြင်သစ်ကိုအရေးနိမ့်ပြီးထွက်ခွာခဲ့ရပြီးနောက် နိုင်ငံအသင်းကစားသမားဘဝကနေ အနားယူဖို့ တွေးနေပါတယ်။ ကျွန်တော် အရမ်းစိတ်ပျက်ရပါတယ်။ ဗာတွန်ဂန်ကတော့ အရမ်းမခံစားရဖို့ ပြောပါတယ်။ အများကြီးကို လျင်လျင်မြန်မြန်ဖြစ်ပျက်ခဲ့ပါတယ်။ ဒါပေမယ့် ကျွန်တော် နိုင်ငံအသင်းကို မစွန့်ပစ်ရက်ပါဘူး။ ပြိုင်ပွဲအတွင်းမှာ ကျွန်တော် တစ်သင်းလုံးကို အာရုံစိုက်ထားပါတယ်။

ယူရိုအတွက် အခဲကြေဖို့ခက်ခဲပါတယ်။ ပရိသတ်အားကလည်း တော်တော်လေးဆိုးဝါးခဲ့သလို ရလဒ်လည်း ထင်ထားသလိုမဖြစ်လာခဲ့ပါဘူး။ ကျွန်တော် အရှုံးအတွက် ကောင်းကောင်းမတုံ့ပြန်နိုင်ခဲ့ပါဘူး။ ဒါပေမဲ့ ကျွန်တော်ခွန်အားကိုလည်း အနည်းငယ်လိုအပ်ခဲ့ပါတယ်။ အခုထက်ပိုပြီး ဖွင့်ဟဖို့ လိုအပ်ခဲ့တာပါ”လို့ လူကာကူက ဖြေကြားခဲ့ပါတယ်။

မတ်လ ၂၀ ရက်နေ့တုန်းက ယူကရိန်းကို ၃-၁ နဲ့ အရေးနိမ့်ခဲ့တဲ့နေးရှင်းလိဂ်ပထမအကျော့ပွဲမှာ လူကာကူက တစ်ဂိုးသွင်းယူနိုင်ခဲ့ပါတယ်။ အဲ့နောက် မတ်လ ၂၃ ရက်နေ့မှာကန်မယ့် ဒုတိယအကျော့မှာ ဘယ်လ်ဂျီယံအနေနဲ့ ပြန်လာနိုင်ဖို့ လူကာကူက မျှော်လင့်နေပါတယ်။