ဒီည၊ နယူးကာဆယ်နဲ့ရင်ဆိုင်ရမယ့် ဝင်ဘာလေကွင်းကာရာဘောင်းဖလားဗိုလ်လုပွဲမှာ လီဗာပူးအတွက် ဂိုးသွင်းယူပြီး ဟီးရိုးတစ်ဦးဖြစ်လာဖို့အတွက် အတိတ်ကာလအတွေ့အကြုံတွေကို ကိုဒီဂတ်ပို အားကိုးအားထားပြုနေပါတယ်။

ဂတ်ပိုက ပြိုင်ဘက်ကြီးအေဂျက်စ်ကို အနိုင်ရရှိတဲ့ ၂၀၂၂ ဒတ်ချ်ရှုံးထွက်ဖလားဗိုလ်လုပွဲမှာ ပီအက်စ်ဗွီအတွက် ဒုတိယပိုင်းပွဲချိန်အနိုင်ဂိုးကို သွင်းယူပေးခဲ့ပါတယ်။ ဒါကြောင့် အသက်-၂၅ နှစ်အရွယ်တိုက်စစ်မှူးက လတ်တလောဗိုလ်လုပွဲတစ်ခုမှာလည်း ဟီးရိုးတစ်ဦးဖြစ်လာဖို့အတွက် ရည်မှန်းချက်ရှိနေပြီး နှစ်ကြိမ်ဆက်ကာရာဘောင်းဖလားချန်ပီယံအဖြစ် လီဗာပူးအသင်းအောင်ပွဲခံနိုင်ရေး မျှော်လင့်နေပါတယ်။

လီဗာပူးအသင်းက ပြီးခဲ့တဲ့ရာသီ၊ ကာရာဘောင်းဖလားဗိုလ်လုပွဲမှာ လူငယ်ကစားသမားများစွာကို အသုံးပြုပြီး ကပ္ပတိန်ဗန်ဒိုက်ရဲ့အနိုင်ဂိုးနဲ့အတူ ချဲလ်ဆီးကိုကျော်ဖြတ်ကာ ဗိုလ်စွဲခဲ့ပါတယ်။ ဒါကြောင့် အခုညပိုင်းပွဲစဉ်မှာ ဆုဖလားကိုင်မြှောက်နိုင်ခြင်းက အရမ်းလှပတဲ့ဘောလုံးရာသီတစ်ခုအဆုံးသတ်ဖို့ စတင်ချိန်ဖြစ်လာမယ်ဆိုတာ အပြည့်အဝနားလည်ထားပြီး လူတိုင်းကလည်း ဒီအခိုက်အတန့်ကို အသက်သွင်းချင်နေတယ်လို့ ဂတ်ပိုက ဝန်ခံပြောဆိုခဲ့ပါတယ်။

ဗိုလ်လုပွဲတစ်ခုမှာ ဂိုးသွင်းယူနိုင်ရေးရည်မှန်းချက်နဲ့ပတ်သက်လို့ ဂတ်ပိုက “ဒါမျိုးကို ပီအက်စ်ဗွီမှာ ကျွန်တော် လုပ်ပြခဲ့ဖူးပြီး လီဗာပူးနဲ့အတူလုပ်ပြနိုင်ဖို့အတွက် မျှော်လင့်မိပါတယ်။ ဒီကလပ်အသင်းမှာ ကာလရှည်ရှိနေခဲ့ပြီး ဗိုလ်လုပွဲတွေ ကစားခဲ့ဖူးတဲ့ ကစားသမားတွေဆီ ဗိုလ်လုပွဲတွေမှာ ဘယ်လိုခံစားချက်တွေနဲ့ ယှဉ်ပြိုင်ကစားဖို့ ဆုံးဖြတ်သလဲဆိုတာ ခင်ဗျားတို့တွေ မေးကြည့်နိုင်ပါတယ်။ ဒါက တကယ့်ကိုအံ့အားသင့်စရာကောင်းတဲ့ ခံစားချက်တစ်ခုဖြစ်ပြီး ဗိုလ်လုပွဲတစ်ခုရဲ့ အရေးကြီးအခိုက်အတန့်တစ်ခုမှာ တိုက်စစ်မှူးတစ်ဦးအဖြစ် ဂိုးသွင်းယူနိုင်ဖို့ဆိုတာ အကောင်းဆုံးခံစားချက်တောင် ဖြစ်ကောင်းဖြစ်နိုင်ပါတယ်။

ဗိုလ်လုပွဲတစ်ခုကစားပြီး ဆုဖလားကိုင်မြှောက်နိုင်တယ်ဆိုတာ အမြဲတမ်းထူးခြားပါတယ်။ ပြီးခဲ့တဲ့ဘောလုံးရာသီမှာလည်း ကျွန်တော်တို့အသင်းက အရမ်းလှပတဲ့နည်းလမ်းတစ်ခုနဲ့အတူ ဒီကွင်းကြီးမှာ ဆုဖလားကိုင်မြှောက်နိုင်ဖူးပါတယ်။ ဗန်ဒိုက်ရဲ့ နောက်ဆုံးမိနစ်ခေါင်းတိုက်ဂိုးနဲ့အတူ ကျွန်တော်တို့တွေ အနိုင်ရရှိခဲ့ပါတယ်။ တကယ့်ကိုလှပတဲ့အခိုက်အတန့်တစ်ခုဖြစ်ပြီး လူတိုင်းလည်း ဒီအခိုက်အတန့်ကို အသက်ပြန်သွင်းချင်မယ်လို့ ထင်ပါတယ်။

ကျွန်တော်တို့တွေ အနိုင်ရရှိပြီး ပရိသတ်တွေရှေ့မှာ ဂုဏ်ပြုသီချင်းတွေ သီဆိုခဲ့ပါတယ်။ အဲ့ဒါက ကျွန်တော်တို့အတွက် အရမ်းသာယာတဲ့အခိုက်အတန့်တစ်ခုလို့ ထင်ပါတယ်။ ဒီအခိုက်အတန့်တွေက ကစားသမားဘဝသက်တမ်းတလျှောက်လုံး ကိုယ်နဲ့အတူ အမြဲတမ်းရှိသွားလိမ့်မယ်လို့ ထင်ပါတယ်။ ကာရာဘောင်းဖလားပြိုင်ပွဲက ကျွန်တော်တို့အတွက် အခုဘောလုံးရာသီ၊ ဗွေဆော်ဦးဆုဖလားတစ်လုံး ဖြစ်လာနိုင်ပါတယ်။ ဒါကြောင့် ကျွန်တော်တို့တွေ အနိုင်ယူဖို့ စိတ်အားထက်သန်နေမယ်လို့ ထင်ပါတယ်။ အလွန်လှပတဲ့ဘောလုံးရာသီတစ်ခုရဲ့အဆုံးသတ်မှုကို စတင်ချိန်ဖြစ်လာလိမ့်မယ်လို့ မျှော်လင့်မိပါတယ်”လို့ လီဗာပူးအသင်းဝက်ဘ်ဆိုဒ်ဆီ ပြောကြားခဲ့ပါတယ်။

အခုသီတင်းပတ်အတွင်း ပီအက်စ်ဂျီကို ခါးသီးဖွယ်ရှုံးနိမ့်ကာ ချန်ပီယံလိဂ်ပြိုင်ပွဲမှထွက်ခွာလာရတဲ့ လီဗာပူးအတွက် ဝင်ဘာလေကွင်းမှာ နယူးကာဆယ်ကို အနိုင်ရရှိမယ်ဆိုရင် လက်ကျန်ဘောလုံးရာသီအတွက် ပြီးပြည့်စုံတဲ့တွန်းအားပေးမှုတစ်ခု ဖြစ်လာနိုင်ပါတယ်။ ကြိုးကြာနီတွေက ပရီးမီးယားလိဂ်ကိုးပွဲကစားဖို့ ကျန်ရှိချိန် အမှတ်ပေးဇယားထိပ်ဆုံးနေရာမှာ ၁၅ မှတ်ဖြတ် ရပ်တည်ထားနိုင်လို့ အန်းစလော့ရဲ့အဖွင့်ရာသီမှာပဲ ကာရာဘောင်းဖလားအောင်ပွဲနဲ့အတူ ပြည်တွင်းဆုဖလားနှစ်ခုချန်ပီယံအဖြစ် ရာသီပိတ်သိမ်းနိုင်ဖို့အတွက် ရည်မှန်းထားပါတယ်။