ယမန်နေ့ညက ဖရိုင်းဘတ်ကို ၁-၂ နဲ့အနိုင်ရခဲ့တဲ့ပွဲစဉ်မှာ ဘိုင်ယန်မြူးနစ်အတွက် ဦးဆောင်ဂိုးသွင်းယူပေးခဲ့တဲ့ အသင်းဖော်တိုက်စစ်မှူး ဟယ်ရီကိန်းကို ပွဲအပြီးမှာ ဂျိုရှူးဝါးကင်မစ်ချ်က အလွန်ထူးချွန်တဲ့ကစားသမားတစ်ယောက်ဖြစ်တယ်လို့ ချီးကျူးပြောဆိုလာခဲ့ပါတယ်။ 

ယခုပွဲစဉ်မှာ ကိန်းဟာ ပွဲအစ ၁၅ မိနစ်မှာပဲ ဘိုင်ယန်မြူးနစ်အတွက် ဦးဆောင်ဂိုးစတင်သွင်းယူပေးခဲ့တာဖြစ်ပါတယ်။ ထို့နောက် ဒုတိယပိုင်း ၅၄ မိနစ်မှာတော့ ကင်မင်ဂျေးက ဒုတိယဦးဆောင်ဂိုးသွင်းယူပေးခဲ့ပေမယ့် ဘိုင်ယန်တို့နောက်ထပ်ဂိုးမရတော့ဘဲ ဖရိုင်းဘတ်နောက်ခံလူ ဂျင်တာရဲ့ ချေပဂိုး ၁ ဂိုးကိုပြန်လည်ခွင့်ပြုခဲ့ရပါတယ်။
 
ယခုပွဲစဉ်မှာ ကိန်းဟာ ဘိုင်ယန်မြူးနစ်အတွက် ဦးဆောင်ဂိုးသွင်းပေးနိုင်ခဲ့ရုံမက ဖရိုင်းဘတ်နောက်တန်းကို တစ်ချိန်လုံးမွှေနှောက်ဒုက္ခပေးနိုင်ခဲ့တာဖြစ်ပါတယ်။ ပွဲကစားချိန် ၆၃ မိနစ်မှာတော့ အင်္ဂလန်အသင်းခေါင်းဆောင်ဟာ အသင်းရဲ့နောက်တန်းကိုဆင်းကူရင်း ဖရိုင်းဘတ်တိုက်စစ်မှူး လူးကပ်စ်ဟိုလာနဲ့ထိပ်တိုက်တွေ့ဆုံခဲ့ပြီး အဝါကတ်ပြသခံခဲ့ရပါတယ်။ 

ပွဲအပြီးမှာတော့ ကင်းမစ်ချ်က “ပြီးခဲ့တဲ့ရက်သတ္တပတ်အချို့မှာ ဟယ်ရီအနေနဲ့ ရုန်းကန်ခဲ့ရတာတွေရှိပေမယ့် အခုချိန်မှာတော့ သူက ချီးကျူးစရာကစားသမားဖြစ်နေပြန်ပါတယ်။ တိုက်စစ်ပိုင်းမှာတင်မဟုတ်ဘဲ အသင်းရဲ့ဂိုးဧရိယာထဲမှာလည်း ခံစစ်ပိုင်းကို ကောင်းကောင်းကစားနိုင်တဲ့သူပါ။ သူ့ကိုယ်သူ အနာခံပြီး အသင်းအတွက်ပေးဆပ်ရင်း အဝါကတ်လည်းပြသခံခဲ့ရပါတယ်။ ဒါပေမယ့်သူက ပြေးနေတာကို ရပ်တန့်လိုက်တာမျိုးမရှိပါဘူး။ ဒီပွဲမှာသူအရမ်းကောင်းခဲ့ပါတယ်” လို့ပြောကြားခဲ့ပါတယ်။ 

ဆက်လက်ပြီး ဘိုင်ယန်မြူးနစ်အတွက် ကိန်းရဲ့ပေးဆပ်လိုစိတ်ကိုလည်း ကင်မစ်ချ်က “သူက ဂိုးတွေနဲ့ပတ်သက်ပြီး ချီးကျူးခံရပေမယ့် ဂိုးတွေမသွင်းနိုင်ခဲ့ရင်တောင် သူအသင်းအတွက်ပေးဆပ်ခဲ့တာတွေက ချီးကျူးစရာပါပဲ။ ဟက်ထရစ်တွေအမြဲတမ်းသွင်းနေဖို့မလိုပါဘူး။ ကျွန်တော်တို့ရဲ့လိုအပ်ချက်ကို ဖြည့်ဆည်းပေးပြီး အသင်းနဲ့အတူ အမြဲတမ်းရပ်တည်နေတဲ့ကစားသမားပါ” လို့ချီးကျူးပြောဆိုခဲ့ပါတယ်။ 

ဖရိုင်းဘတ်ကိုအနိုင်ရခဲ့တဲ့ ဘွန်ဒက်စ်လီဂါပွဲစဉ်အပြီးမှာတော့ ဘိုင်ယန်မြူးနစ်အနေနဲ့ ဆလိုဗန်နဲ့ယှဉ်ပြိုင်သွားရမယ့် ချန်ပီယံလိဂ်ပွဲစဉ်အတွက် အာရုံစိုက်သွားရတော့မှာဖြစ်ပါတယ်။ ဘိုင်ယန်အတွက် ဒီရာသီမှာ ၂၅ ပွဲကစားပြီး သွင်းဂိုးနဲ့ ဂိုးဖန်တီးမှုပေါင်း ၃၃ ကြိမ်အထိပြုလုပ်ထားနိုင်တဲ့ ဟယ်ရီကိန်းအနေနဲ့ အဆိုပါချန်ပီယံလိဂ်ပွဲစဉ်မှာလည်း အသင်းကို အကူအညီတွေပေးသွားနိုင်မလား စောင့်ကြည့်ရပါမယ်။