ဟာလန်းရဲ့ ကြယ်ငါးပွင့်ခြေစွမ်း၊ နောက်တစ်ဆင့်တက်ရောက်နိုင်တဲ့ နယူးကာဆယ်တို့ရဲ့ အက်ဖ်အေဖလားပွဲစဉ်များ
အက်ဖ်အေဖလား ပဉ္စမအဆင့်ပွဲစဉ်တွေကို ဒီနေ့မနက်ပိုင်းမှာ ယှဉ်ပြိုင်ကစားခဲ့ရာ လက်ရှိချန်ပီယံမန်စီးတီးက ဟာလန်းရဲ့သွင်းဂိုးတွေနဲ့အတူ ကွာတားဖိုင်နယ်ဆီ တက်လှမ်းနိုင်ခဲ့ပါတယ်။
ကီနေးလ်ဝေါ့ရုတ်ဒ်မှာကစားတဲ့ ပွဲစဉ်အတွင်း နော်ဝေသားက ပထမပိုင်း ပွဲချိန်မပြီးဆုံးခင်မှာတင် ဟက်ထရစ်သွင်းယူပြီး မန်စီးတီးကို သုံးဂိုးပြတ်ဦးဆောင်စေခဲ့ပါတယ်။ ဟာလန်းရဲ့ပထမပိုင်းသွင်းဂိုးတွေအတွက် ဒီဘရိုင်းတစ်ဦးတည်းကပဲ ဖန်တီးပေးခဲ့ပါတယ်။
လူတန်တောင်းအတွက် ကလက်ခ်က ချေပဂိုးနှစ်ဂိုး သွင်းယူပြီး ပွဲဆီ ပြန်လာနိုင်ဖို့ ကြိုးစားခဲ့ပေမယ့် ပွဲချိန် ၅၅ မိနစ်မှာပဲ ဒီဘရိုင်းရဲ့ဖန်တီးပေးမှုမှတဆင့် ဟာလန်းက နောက်ထပ်သွင်းဂိုးထပ်ယူခဲ့သလို မိနစ်ပိုင်း အကြာမှာ မန်စီးတီးဂိုးသွင်းစက်က အခုပွဲစဉ်အတွက် သူ့ရဲ့ပဉ္စမမြောက်သွင်းဂိုးကို ဘာနာဒိုဆေးလ်ဗားရဲ့ ဖန်တီးပေးမှုမှတဆင့် ရယူခဲ့ပြန်ပါတယ်။
မန်စီးတီးအတွက် နောက်ဆုံးပိတ်ဂိုးကိုတော့ ကွင်းလယ်လူကိုဗာဆစ်က သွင်းယူခဲ့ပါတယ်။ ချန်ပီယံရှစ်အမှတ်ပေးဇယားဦးဆောင်သူလက်စတာကလည်း ပရီးမီးယားလိဂ်ကလပ်ဘုန်းမောက်ကို အဝေးကွင်းမှာ လူစားဝင်ကစားသမား ဖာတာဝူရဲ့ အချိန်ပိုသွင်းဂိုးဖြင့် အနိုင်ယူပြီး ကွာတားဖိုင်နယ်အဆင့်ဆီ တက်လှမ်းလာပါတယ်။
ဖာတာဝူက အချိန်ပိုပထမပိုင်း နောက်ဆုံးမိနစ်မှာ ဘုန်းမောက်ဂိုးသမား မတ်ထရာဗာစ်ကို ကျော်ဖြတ်ပြီး အကောင်းဆုံး အဆုံးသတ်ကန်သွင်းယူခဲ့ပါတယ်။ အီဝုဒ်ပတ်ခ်ကွင်းမှာ ကစားတဲ့ ဘလက်ဘန်းနဲ့ နယူးကာဆယ်တို့ ပွဲစဉ်မှာတော့ သာမန်ပွဲကစားချိန်အပါအဝင် အချိန်ပိုမိနစ်တွေ ကစားပြီးချိန်အထိ တစ်ဖက်တစ်ဂိုးစီ သရေရလဒ်ထွက်ပေါ်နေလို့ ပယ်နယ်တီအဆုံးအဖြတ်ခံယူခဲ့ပါတယ်။
အခုပွဲစဉ်ဒုတိယပိုင်းပွဲချိန် ၇၁ မိနစ်မှာ အယ်လ်မီရွန်ရဲ့ဖန်တီးပေးမှုမှတဆင့် ဂေါ်ဒွန်က ဧည့်သည်တွေအတွက် ဦးဆောင်ဂိုးသွင်းယူပေးခဲ့ပေမယ့် နောက်ထပ်ရှစ်မိနစ်အကြာမှာပဲ စမိုဒစ်က ဘလက်ဘန်းအတွက် ချေပဂိုး ရှာဖွေပေးခဲ့ပါတယ်။ လက်ကျန်ပွဲကစားချိန်တွေကို ဆက်လက်ယှဉ်ပြိုင်ရာမှာ အနိုင်ရလဒ်ကို ဘယ်အသင်းမှ မရှာဖွေနိုင်ခဲ့လို့ ပယ်နယ်တီ အဆုံးအဖြတ်ခံယူခဲ့ရပါတယ်။
ပယ်နယ်တီအဆုံးအဖြတ်မှာ စမိုဒစ်၊ ဒိုမီနစ်ဟမ်တို့ရဲ့ ကန်သွင်းမှုတွေကို ဒူဗရာကာက လက်စွမ်းပြကာကွယ်ပြီး နယူးကာဆယ်ကို နောက်တစ်ဆင့်ဆီ ပို့ဆောင်ပေးခဲ့ပါတယ်။
ပွဲပြီးရလဒ်များ
---------------
ဘုန်းမောက် ဝ-၀ လက်စတာ (အချိန်ပိုမှာ ဝ-၁ ဂိုးဖြင့် လက်စတာနိုင်)
ဘလက်ဘန်း ၁-၁ နယူးကာဆယ် (ပယ်နယ်တီအဆုံးအဖြတ်မှာ ၃-၄ ဂိုးဖြင့် နယူးကာဆယ်အနိုင်ရ)
လူတန်တောင်း ၂-၆ မန်စီးတီး
