အာလင်းဟာလန်းက မန်စီးတီးအသင်းကို  အက်ဖ်အေဖလားရအောင် ဦးဆောင်ပြီး ချန်ပီယံလိဂ်ဝင်ခွင့်လည်း သေချာအောင် လုပ်မယ်လို့ ပြောလိုက်ပါတယ်။  စိတ်ပျက်စရာကောင်းတဲ့ ရာသီတစ်ခုကို ဖြတ်သန်းနေရတဲ့ စီးတီးအသင်းအတွက် ရာသီကုန်မှာ အောင်မြင်မှုလေးတွေ ရနိုင်ဖို့ သူက ရည်မှန်းထားတာပါ။

ဟာလန်းက အီတီဟတ်ကို ရောက်ပြီး ပထမနှစ်မှာ ပရီးမီးယားလိဂ်ဖလားကို မန်စီးတီးနဲ့အတူ ရခဲ့ပေမယ့် ဒီနှစ်မှာတော့ ချန်ပီယံဖြစ်ဖို့ အတော်လေး ဝေးကွာနေပါတယ်။  အမှတ်ပေးဇယားမှာ အဆင့် ၅ နေရာမှာပဲ ရှိနေပြီး ထိပ်ဆုံးက လီဗာပူးနဲ့ ၂၂ မှတ်တောင် ကွာဟနေတာပါ။ 
ချန်ပီယံလိဂ်မှာလည်း ၁၆သင်းအဆင့် ရှုံးထွက်မှာ ရီးရဲလ်မက်ဒရစ်ကို ရှုံးပြီး ထွက်ခဲ့ရပါတယ်။
အသင်းလိုက် ရုန်းကန်နေရပေမယ့် ဟာလန်းကတော့ ပြိုင်ပွဲစုံ ၂၉ ဂိုးအထိ သွင်းပြီး ခြေစွမ်းကောင်းတွေ ပြသနေပါတယ်။ 

ဂိုးသွင်းကောင်းတဲ့ ဟာလန်းက ရာသီကုန်အထိ စီးတီးအသင်းအတွက် အခွင့်အရေးတွေ ရှိနေသေးတယ်လို့ ယုံကြည်နေကြောင်း ပြောကြားခဲ့ပါတယ်။ ဟာလန်းက "တခါတလေတော့လည်း ဒီလိုပါပဲဗျာ။ ပရီးမီးယားလိဂ်ဖလားကို နှစ်နှစ်ဆက်ရပြီးမှ ချန်ပီယံပြိုင်ပွဲမှာ မပါရတော့တဲ့အခါ ခံစားချက်က တစ်မျိုးတော့ ဖြစ်တာပေါ့။ ဒါပေမယ့် နှစ်တိုင်းတော့ ဖလားရဖို့ဆိုတာ မဖြစ်နိုင်ဘူးလေ။ အခုချိန်မှာ ချန်ပီယံလိဂ်ဝင်ခွင့်ရဖို့နဲ့ ကိုယ်လုပ်နိုင်တာကို လုပ်ဖို့ပါပဲ။ FA ဖလားကို ရအောင် ယူဖို့ပေါ့ဗျာ။"လို့ ပြောခဲ့ပါတယ်။

ဇန်နဝါရီလမှာ ကိုးနှစ်ခွဲစာချုပ် ချုပ်ခဲ့တဲ့ ဟာလန်းက ဘဏ္ဍာရေးဆိုင်ရာ ချိုးဖောက်မှု စုံစမ်းစစ်ဆေးမှုတွေ ရှိနေပေမယ့် အသင်းအပေါ်မှာ ယုံကြည်မှု အပြည့်ရှိတယ်လို့လည်း ပြောပါတယ်။ "ကျွန်တော် ကိုးနှစ်ခွဲစာချုပ် ချုပ်တုန်းက ဒါတွေကို ထည့်မတွက်ခဲ့ပါဘူးဗျာ။ ဘာလို့ စာချုပ်ချုပ်ခဲ့လဲဆိုတာကို အကြိမ် ၃၀၀ လောက် ပြောပြီးပါပြီ။ အသင်းနဲ့ စကားပြောတယ်၊ စိတ်ထဲမှာ အဆင်ပြေတယ်လို့ ခံစားရတယ်၊ နောက်ဆုံးမှာ သဘောတူလိုက်တယ်။ ဒါပါပဲ။"လို့ ဟာလန်းက ထပ်ပြောပါတယ်။