နည်းပြအင်းနရစ်နဲ့ ဘာပြဿနာမှ မရှိပါဘူးလို့ ထုတ်ဖော်ဝန်ခံလိုက်တဲ့ ပြင်သစ်စတား အမ်ဘာပေ
ဒီနေ့မနက်ပိုင်း၊ ချန်ပီယံလိဂ် ၁၆ သင်းရှုံးထွက်(ဒုတိယအကျော့)ပွဲစဉ်အဖြစ် ဆိုစီဒက်ကို အနိုင်ယူခဲ့တဲ့ ပွဲစဉ်မှာ ပီအက်စ်ဂျီအတွက် အနိုင်ဂိုးတွေသွင်းယူပြီး ခြေစွမ်းပြခဲ့တဲ့ ပြင်သစ်ကြယ်ပွင့် အမ်ဘာပေက သူ့နဲ့ နည်းပြဖြစ်သူ အင်းနရစ်တို့အကြား ပြဿနာမရှိပါဘူးလို့ အခိုင်အမာပြောဆိုလိုက်ပါတယ်။
စပိန်မြေမှာရင်ဆိုင်ကစားရတဲ့ပွဲစဉ်အတွင်း အသင်းခေါင်းဆောင်လက်ပတ်ကို ဝတ်ဆင်ခဲ့တဲ့ အမ်ဘာပေက ပွဲအစ ၁၅ မိနစ်မှာပဲ အသင်းအတွက် ဦးဆောင်ဂိုးကို သွင်းယူပေးခဲ့သလို ဒုတိယပိုင်းစတင်လာပြီး မကြာခင်မှာ နောက်ထပ်ဦးဆောင်ဂိုးကို ထပ်မံသွင်းယူပေးခဲ့ပါတယ်။ ပွဲပြီးချိန်မှာတော့ ပီအက်စ်ဂျီက ၂-၁ ဂိုးဖြင့် အနိုင်ရရှိခဲ့ပြီး နှစ်ကျော့ပေါင်းရလဒ် ၄-၁ ဂိုးဖြင့် ၂၀၂၁ ခုနှစ်နောက်ပိုင်း ပထမဆုံးအကြိမ် ချန်ပီယံလိဂ်ကွာတားဖိုင်နယ်အဆင့်ဆီ တက်လှမ်းလာနိုင်ခဲ့ပါတယ်။
ပွဲစဉ်အပြီး Canal+ ရုပ်သံသတင်းဌာနနဲ့တွေ့ဆုံချိန် နည်းပြအင်းနရစ်နဲ့ သူ့အကြား ဆက်ဆံရေးအကြောင်း မေးမြန်းလာမှုကို အမ်ဘာပေက “အဆင်ပြေပါတယ်။ ကျွန်တော်နဲ့ နည်းပြကြီးအကြားမှာ ဘာပြဿနာမှ မရှိပါဘူး။ လူတွေကတော့ ပြဿနာတွေရှိတယ်လို့ ထင်ချင်ထင်နေကြမှာပေါ့လေ။ ကျွန်တော့်အတွက် ပြဿနာတွေ ရှိနေတာမှန်ပေမယ့် နည်းပြကြီးနဲ့တော့ မဟုတ်ပါဘူး”လို့ တုံ့ပြန်ဖြေကြားခဲ့ပါတယ်။
အခုဘောလုံးရာသီ ကုန်ဆုံးချိန်မှာ ပါရီအခြေစိုက်ကလပ်မှ အလွတ်ပြောင်းရွှေ့ကြေးဖြင့် ထွက်ခွာမယ်လို့ အသင်းဆီ အကြောင်းကြားခဲ့ပြီးနောက် အမ်ဘာပေက ပီအက်စ်ဂျီအသင်း နောက်ဆုံးကစားခဲ့တဲ့ လီဂူးဝမ်းပွဲစဉ်သုံးခုမှာ ပွဲချိန်ပြည့် ပါဝင်ကစားခွင့် မရရှိခဲ့ပါဘူး။
ပြီးခဲ့တဲ့သီတင်းပတ်ကုန်၊ သူ့ရဲ့အသင်းဟောင်းမိုနာကိုနဲ့ ဂိုးမရှိ သရေကျခဲ့တဲ့ပွဲစဉ်မှာလည်း အမ်ဘာပေကို ပထမပိုင်းပွဲချိန်အပြီးမှာ လူစားလဲလှယ်ခဲ့ပါတယ်။ ဒါပေမယ့် ဒီနေ့ပွဲစဉ်မှာတော့ ပြင်သစ်စတားက ပွဲချိန်ပြည့်ပါဝင်ကစားခွင့် ရရှိခဲ့ပြီး သူ့ရဲ့အခုရာသီသွင်းဂိုးမှတ်တမ်းကို ၃၄ ပွဲကစား၊ ၃၄ ဂိုးအထိ မြှင့်တင်နိုင်ခဲ့ပါတယ်။
ဆိုစီဒက်ကို အနိုင်ရရှိတဲ့ပွဲစဉ်မှာ တိုက်စစ်ဘယ်ခြမ်းနေရာအတွက် ပွဲထွက်လာတဲ့ အမ်ဘာပေက “ကွာတားဖိုင်နယ်ဆီ တက်ရောက်သွားလို့ ကျွန်တော်တို့ အရမ်းအရမ်းကျေနပ်ပျော်ရွှင်မိပါတယ်။ အထူးသဖြင့် ကျွန်တော့်မှာ အခြားပေးစရာ သတင်းစကားမရှိပါဘူး။ ကျွန်တော်ကိုယ်တိုင်က ချန်ပီယံလိဂ်ပြိုင်ပွဲမှာ ကစားချင်တယ်ဆိုရုံလေးပါပဲ။ ဒီပြိုင်ပွဲက အရမ်းအရေးကြီးပါတယ်။ ကျွန်တော်ကိုယ်တိုင်လည်း အမြဲတမ်းစွမ်းဆောင်ရည်ကောင်းနေဖို့ ကြိုးစားပါတယ်။ တခါတရံမှာ အခုလိုမျိုး ဖြစ်တက်သလို တခါတရံမှာတော့ မဖြစ်လာပါဘူး။ ဒါပေမယ့် ကျွန်တော်က ပုန်းရှောင်နေတက်တဲ့ကစားသမားမျိုး ဘယ်တော့မှမဟုတ်ပါဘူး”လို့ ဆက်ပြောခဲ့ပါတယ်။
၂၀၂၀ ပြည့်နှစ် ချန်ပီယံလိဂ်ပြိုင်ပွဲမှာ ဒုတိယဆုရရှိခဲ့တဲ့ ပီအက်စ်ဂျီက ချန်ပီယံလိဂ်ဆုဖလားကိုတော့ အသင်းသမိုင်းတလျှောက် ဆွတ်ခူးနိုင်ခဲ့ခြင်း မရှိပါဘူး။ ပြီးခဲ့တဲ့ဘောလုံးရာသီ ခုနစ်ခုအနက် ငါးခုမှာ ပီအက်စ်ဂျီက ၁၆ သင်းရှုံးထွက်အဆင့်မှာပဲ ပြိုင်ပွဲမှ ထွက်ခွာခဲ့ရပါတယ်။
ပါရီအခြေစိုက်ကလပ်အသင်းနည်းပြအင်းနရစ်က “ကျွန်တော်တို့ ပျော်ရွှင်ကျေနပ်မိပါတယ်။ တကယ့်ကို အကောင်းဆုံးကစားနိုင်ခဲ့ပြီး ဆိုစီဒက်ကို ပြိုင်ပွဲဆီ ပြန်မလာနိုင်အောင် တားဆီးနိုင်ခဲ့ပါတယ်။ (အမ်ဘာပေနဲ့ပတ်သက်လို့) အမ်ဘာပေကို စီမံခန့်ခွဲပေးဖို့ မလိုအပ်ပါဘူး။ သူကိုယ်တိုင်ပဲ သူ့ကိုယ်သူ စီမံခန့်ခွဲပါလိမ့်မယ်။ သာမန်အားဖြင့် သူ့မှာ လွတ်လပ်မှုအပြည့်ရှိပါတယ်။ ဒါပေမယ့် ဒီနေ့ပွဲစဉ်မှာတော့ သူ့ကို အသင်းရဲ့တိုက်စစ်ဇုန်မှာ ကောင်းမွန်တဲ့အနေအထားမျိုး ရှိနေစေချင်လို့ ဘယ်တောင်ပံမှာ ပွဲထွက်ကစားစေခဲ့ပါတယ်။ ဘာဖြစ်လို့လဲဆိုတော့ အမ်ဘာပေသာ ပြိုင်ဘက်ရဲ့ဂိုးပေါက်ရှေ့မှာ လွတ်ထွက်သွားမယ်ဆိုရင် သူက ပြိုင်ဘက်ရဲ့သေကွင်းသေကွက်ကို ထိုးနှက်နိုင်တဲ့ လက်နက်ကောင်းတစ်ခု ဖြစ်နေလို့ပါ”လို့ ပြောပါတယ်။
လက်ရှိမှာတော့ ပီအက်စ်ဂျီက လာမယ့်ဧပြီလအတွင်းမှာ ယှဉ်ပြိုင်ကစားရမယ့် ကွာတားဖိုင်နယ်အဆင့်အတွက် မဲခွဲမှုရလဒ်တွေကို စောင့်မျှော်နေပါလိမ့်မယ်။
