ဘင်ဖီကာကို အဝေးကွင်းမှာ ကစားသမား ၁၀ ယောက်နဲ့ ရင်ဆိုင်ပြီး အနိုင်ယူခဲ့တဲ့ ဘာစီလိုနာကို ချီးကျူးလိုက်တဲ့ ဖလစ်
ဗုဒ္ဓဟူးနေ့က ချန်ပီယံလိဂ် ၁၆ သင်းအဆင့် ပထမအကျော့အဖြစ် ဘင်ဖီကာကို ၁-၀ ဂိုးနဲ့ အနိုင်ရခဲ့တဲ့ပွဲမှာ သူ့ကစားသမားတွေက ၁၀ ယောက်နဲ့ ပွဲအချိန်အများစု ကစားခဲ့ရပေမယ့် အသင်းရဲ့ကြိုးစားအားထုတ်မှုအတွက် ဂုဏ်ယူတယ်လို့ ဘာစီလိုနာ နည်းပြချုပ် ဟန်ဆီဖလစ်က ပြောခဲ့ပါတယ်။ ခံစစ်မှုး ကူဘာဆီက ပွဲကစားချိန် ၂၂ မိနစ်မှာ ပြိုင်ဘက်ကစားသမားကို တားဆီးခဲ့တဲ့အတွက် အနီကတ်နဲ့ ထုတ်ပယ်ခံခဲ့ရပေမယ့် ဒုတိယပိုင်းမှာ ရာဖင်ဟာရဲ့ အနိုင်ဂိုးက အသင်းကို အခက်အခဲတွေကို ကျော်ဖြတ်နိုင်အောင် ကူညီပေးခဲ့ပါတယ်။
"ဒါက ကြီးမားတဲ့ အောင်မြင်မှုတစ်ခုပါ" လို့ ဖလစ်က စပိန် တီဗီ ချန်နယ် Movistar Plus ကို ပြောခဲ့ပါတယ်။ "ကျွန်တော်တို့ အနိုင်ရတာကိုပဲ ဝမ်းသာတာ မဟုတ်ဘူး ဘယ်လိုရအောင် လုပ်ခဲ့သလဲဆိုတဲ့အပေါ် ဝမ်းသာပါတယ်။ ကျွန်တော်တို့ ကောင်းမွန်စွာ ခံစစ်ကစားခဲ့ပါတယ် အသင်းတစ်သင်းလုံးအနေနဲ့ ခံစစ်ကစားခဲ့တာပါ။ ဒါက ကျွန်တော်တို့အတွက် အရေးကြီးဆုံးပါ။ အားလုံးရဲ့ စုပေါင်းအားထုတ်မှုပါ"
"ပထမပိုင်းစောစောစီးစီးကတည်းက ကစားသမားတစ်ယောက် လျော့သွားခဲ့ပေမယ့် ပွဲကို ကောင်းကောင်း ထိန်းချုပ်နိုင်ခဲ့ပြီး ပြန်လည်တုံ့ပြန်မှုက အံ့သြစရာပါ။ မလွယ်ကူခဲ့ပေမယ့် ဒုတိယအကျော့ ကစားရဦးမှာပါ။ ဘင်ဖီကာက အရမ်းကောင်းတဲ့ အသင်းဖြစ်ပြီး သူတို့ကို ကျွန်တော်တို့ သတိထားရပါမယ်" လို့ နည်းပြက ပြောပါတယ်။
အနီကတ်နဲ့ ပတ်သက်ပြီး ဖလစ်က အသက် ၁၈ နှစ်အရွယ် ကူဘာဆီကို အလွန်အမင်း ပြစ်တင်ဝေဖန်ချင်တာ မဟုတ်ဘဲ ဒီလိုအရာတွေက ဘောလုံးမှာ ဖြစ်တတ်တယ်ဆိုတာ နားလည်ခဲ့ပါတယ်။ "အနီကတ်ဆိုတာက ဘောလုံးမှာ ဖြစ်တတ်တဲ့ အရာတစ်ခုပါ။ ဒီနေ့ ကျွန်တော်တို့ ကြုံခဲ့ရတာပါ။ အားလုံးမှာ အမှားတွေ ရှိတတ်ပါတယ်" "အရေးကြီးတာက ကျွန်တော်တို့ ဘယ်လို တုံ့ပြန်ခဲ့သလဲဆိုတာပါ။ တုံ့ပြန်မှုက အရမ်းကောင်းခဲ့တယ်" လို့ ဖလစ်က ပြောခဲ့ပြီး ဘင်ဖီကာကို ဂိုးမပေးရအောင် ထိန်းထားနိုင်ခဲ့တဲ့ ဂိုးသမား ဆက်ဇနီကို ချီးကျူးခဲ့ပါတယ်။
ဆက်ဇနီကို ဖလစ်က ပြီးခဲ့တဲ့ စက်တင်ဘာလမှာ တာစတီဂန် ဒူးဒဏ်ရာ ရခဲ့ပြီးနောက် ဘာစီလိုနာမှာ ကစားဖို့ ခေါ်ယူခဲ့တာပါ။ ဗုဒ္ဓဟူးနေ့က သူ့ရဲ့ စွမ်းဆောင်ရည်က သူ့အပေါ် ထားတဲ့ ယုံကြည်မှုကို ပြန်လည် ပေးဆပ်ခဲ့ပါတယ်။ "ဆက်ဇနီက အံ့သြစရာပါ။ သူက ရောက်လာကစချိန်ကထက် အခု ထူးခြားနေတာ သိသာပါတယ်။ ပွဲတိုင်းမှာ သူက ယုံကြည်မှု ပိုရလာတယ် အဲဒါကြောင့် ကျွန်တော်တို့ ခံစစ်ကလည်း ပိုကောင်းလာပါတယ်။ သူက ဒီအဆင့်မှာ ကစားနိုင်မယ်ဆိုတာ ကျွန်တော် အမြဲသိခဲ့ပါတယ်။ ဘာလို့လဲဆိုတော့ သူ့ကို လေ့ကျင့်ရေးမှာ နေ့တိုင်း မြင်နေရလို့ပါ။ ဒါက ကျွန်တော်တို့အတွက် အရမ်းကောင်းပါတယ်" လို့ နည်းပြက ပြောပါတယ်။
