ယူရိုပါလိဂ်ရှုံးထွက်(ပထမအကျော့)ပွဲစဉ်တွေကို ဒီနေ့မနက်ပိုင်းမှာ ယှဉ်ပြိုင်ကစားခဲ့ရာ သွင်းဂိုးတွေ၊ စိတ်လှုပ်ရှားဖွယ်ရာဖြစ်ရပ်တွေနဲ့အတူ နာမည်ကြီးအေစီမီလန်၊ ဘင်ဖီကာတို့ နိုင်ပွဲကိုယ်စီရယူနိုင်ခဲ့ပါတယ်။

ဆန်စီရိုကွင်းအတွင်း ယှဉ်ပြိုင်ကစားတဲ့ပွဲစဉ်မှာ လော့ဖ်တပ်ချိ၊ လီယာအိုတို့ရဲ့ခြေစွမ်းပြမှုနဲ့အတူ အေစီမီလန်က ရန်းနက်စ်ကို ၃-၀ ဂိုးဖြင့် အနိုင်ရရှိခဲ့ပါတယ်။ အခုပွဲစဉ်မှာ အီတလီဘီလူးကြီးက လီယာအိုရဲ့ထူးချွန်တဲ့ခြေစွမ်းကောင်းတွေနဲ့အတူ ပွဲကို အကောင်းဆုံး စတင်နိုင်ခဲ့ပါတယ်။

ပွဲအစ ၁၀ မိနစ်မှာပဲ လီယာအိုရဲ့အတော်လေးကောင်းမွန်တဲ့ ကန်ချက်က ဂိုးဘားတန်းပေါ်ကျော်သွားလို့ အိမ်ရှင်တို့ အဖွင့်ဂိုးနဲ့ လွဲချော်ခဲ့ပါတယ်။ ပွဲကစားချိန်နာရီဝက်ကျော်မှာတော့ ဖလော်ရန်ဇီရဲ့ဖြတ်တင်ဘောပေးပို့မှုကို လော့ဖ်တပ်ချိက ခေါင်းတိုက်ပြီး အေစီမီလန်အတွက် အဖွင့်ဂိုးကို သွင်းယူခဲ့ပါတယ်။

ဒုတိယပိုင်းစတင်ပြီး သုံးမိနစ်မှာပဲ အေစီမီလန်က လော့ဖ်တပ်ချိရဲ့နောက်တစ်ကြိမ် ခေါင်းတိုက်ချက်ဖြင့် ဒုတိယမြောက်ဦးဆောင်ဂိုးရရှိခဲ့ပါတယ်။ ချဲလ်ဆီး ကစားသမားဟောင်းက အခုဘောလုံးရာသီအတွင်း သွင်းဂိုး ခုနစ်ဂိုးအထိ ရယူထားနိုင်ကာ ဒီဂိုးတွေအနက် ခြောက်ဂိုးကို ၂၀၂၄ ခုနှစ်၊ နှစ်ဆန်းပိုင်းမှာ သွင်းယူထားပါတယ်။

နောက်ထပ်မိနစ်ပိုင်း အကြာမှာပဲ အေစီမီလန်တို့ တတိယမြောက်ဂိုး ရရှိခဲ့ပါတယ်။ ရန်းနက်စ်ဂိုးသမားမန်ဒန်ဒါရဲ့ ပေးပို့မှုကို သီယိုဟာနန်ဒက်ဇ်က ကြားဖြတ်လုယူပြီး ဂိုးဧရိယာထဲမှာ ရှိနေတဲ့ လီယာအိုဆီ ဖန်တီးပေးခဲ့ရာ လူငယ်ကြယ်ပွင့်က အသာအယာပဲ ပိတ်သွင်းယူခဲ့ပါတယ်။

လက်ကျန်ပွဲချိန်တွေမှာတော့ အေစီမီလန်က သက်သောင့်သက်သာနဲ့ အနိုင်ရလဒ်ကို ထိန်းကစားခဲ့ပြီး ၁၆ သင်း ရှုံးထွက်အဆင့်ဆီ တက်လှမ်းနိုင်ရေး အခြေအနေကောင်းတစ်ရပ်ကို ဖန်တီးနိုင်ခဲ့ပါတယ်။ ပေါ်တူဂီနိုင်ငံ၊ Estadio da Luz ကွင်းကြီးအတွင်း ဘင်ဖီကာနဲ့ တူးလော့စ်တို့ ယှဉ်ပြိုင်ကစားခဲ့တဲ့ပွဲစဉ်မှာ အိမ်ရှင်တွေက ဝါရင့်ကစားသမားဒီမာရီယာရဲ့ပယ်နယ်တီသွင်းဂိုးတွေနဲ့ အနိုင်ရရှိခဲ့ပါတယ်။

ဒီပွဲစဉ်မှာ ပွဲစတင်ချိန်ကတည်းက အိမ်ရှင်ဘင်ဖီကာ ဘောလုံးပိုင်ဆိုင်မှု အသာစီးရယူပြီး ပြိုင်ဘက်ကို ဖိအားပေးကစားနိုင်ခဲ့ပါတယ်။ ပထမပိုင်းပွဲချိန်အတွင်း ဘင်ဖီကာရဲ့ ဂိုးပေါက်ခြိမ်းခြောက်မှုတွေကို ဧည့်သည်တူးလော့စ်ကလည်း အကောင်းဆုံးကာကွယ်တုံ့ပြန်ခဲ့ပါတယ်။

ပေါ်တူဂီကလပ်အသင်းက နောက်ဆုံးမှာတော့ ဝါရင့်တောင်ပံလူဒီမာရီယာနဲ့အတူ ပြိုင်ဘက်ခံစစ်ကြောင်းကို ဖြိုခွဲနိုင်ဖို့ အဖြေရှာဖွေနိုင်ခဲ့ပါတယ်။ တူးလော့စ်နောက်ခံလူ လိုဂန်ကော်စတာရဲ့ လက်ထိဘောကြောင့် ရရှိလာတဲ့ ဒုတိယပိုင်းပွဲချိန်နှောင်းပိုင်းပယ်နယ်တီအခွင့်အရေးကို ဒီမာရီယာက အကောင်းဆုံး အဆုံးသတ်ပြီး ဘင်ဖီကာအတွက် ဦးဆောင်ဂိုးသွင်းယူခဲ့ပါတယ်။

ဒါပေမယ့် နောက်ထပ်ရှစ်မိနစ်အကြာမှာပဲ ဘင်ဖီကာခံစစ်ဇုန်အတွင်း ရှုပ်ထွေးနေတဲ့ အခြေအနေမှတဆင့် ဒက်စ်လာက တူးလော့စ်အတွက် ချေပဂိုး သွင်းယူခဲ့ပါတယ်။ ပေါ်တူဂီလိဂ်အမှတ်ပေးဇယားဦးဆောင်သူတွေက အနိုင်ဂိုးရရှိဖို့ ကြိုးစားလာခဲ့ပြီး နာကျင်အချိန်ပိုနောက်ဆုံးမိနစ်မှာ တူးလော့စ်ကစားသမားမာဝှစ်ဆာရဲ့ ကြမ်းတမ်းတဲ့ကစားပုံကြောင့် နောက်ထပ်ပယ်နယ်တီအခွင့်အရေးရရှိခဲ့ပါတယ်။

ဆက်လက်ပြီး မာဝှစ်ဆာလည်း နှစ်ဝါတစ်နီပြစ်ဒဏ်ဖြင့် ထုတ်ပယ်ခံခဲ့ရပါတယ်။ ဒီတစ်ကြိမ်ရရှိလာတဲ့ပယ်နယ်တီအခွင့်အရေးကိုလည်း ဒီမာရီယာက အကောင်းဆုံး အသုံးချပြီး ဘင်ဖီကာအတွက် အနိုင်ဂိုးသွင်းယူပေးခဲ့လို့ ပွဲပြီးချိန်မှာ အိမ်ရှင်တွေက ၂-၁ ဂိုးဖြင့် အနိုင်ရရှိခဲ့ပါတယ်။

အခုပွဲစဉ်ရလဒ်ပိုင်းကြောင့် ဘင်ဖီကာက နောက်တစ်ဆင့်တက်လှမ်းနိုင်ရေး အခြေအနေကောင်းခဲ့သလို တူးလော့စ်မှာလည်း အခွင့်အရေးရှိနေဆဲပဲလို့ ပြောရပါလိမ့်မယ်။

ပွဲပြီးရလဒ်များ
---------------
အေစီမီလန် ၃-၀ ရန်းနက်စ်
ဘင်ဖီကာ ၂-၁ တူးလော့စ်
ဘရာဂါ ၂-၄ ကွာရာဘတ်
လန်းစ် ဝ-၀ ဖရိုင်းဘတ်
ဖီယင်နု ၁-၁ ရိုးမား
ဂါလာတာစာရေး ၃-၂ စပါတာ
ရှက်တာဒိုးနက် ၂-၂ မာဆေးလ်
ယန်းဘွိုင်းစ် ၁-၃ စပို့တင်းလစ္စဘွန်း