အက်စ်ပန်ညိုအသင်း နည်းပြ မာနိုလို ဂွန်ဇာလက်ဇ်ဟာ ဂိုးသမား ဂျိုအန် ဂါစီယာရဲ့ ဘာစီလိုနာကို ပြောင်းရွှေ့ခဲ့တဲ့အပေါ် မကျေနပ်ချက်တွေ ရှိနေပေမဲ့ သူ့ကို “ကမ္ဘာ့အဆင့် ဂိုးသမား” လို့ ချီးကျူးလိုက်ပါတယ်။

ဘာစီလိုနာအသင်းဟာ ဒီနွေရာသီမှာ အသက် ၂၄ နှစ်အရွယ် ဂါစီယာရဲ့ စာချုပ်ပါ လျော်ကြေး ယူရို ၂၅ သန်း (ပေါင် ၂၁ သန်း၊ ဒေါ်လာ ၂၇ သန်း) ကို ပေးချေပြီး ၂၀၃၀ ပြည့်နှစ်အထိ ငါးနှစ်စာချုပ်နဲ့ ခေါ်ယူနိုင်ခဲ့ပါတယ်။ အာဆင်နယ်နဲ့ မန်စီးတီးတို့အပါအဝင် ပရီးမီးယားလိဂ်ကနေ ရရှိခဲ့တဲ့ စာချုပ်ကောင်းတွေကို ငြင်းပယ်ပြီး လာလီဂါချန်ပီယံအသင်းကို ပြောင်းရွှေ့ဖို့ ဂါစီယာက ဦးစားပေးခဲ့ပါတယ်။ ဘာစီလိုနာကို ရောက်ရှိလာပြီးနောက်ပိုင်း သူဟာ သုံးပွဲစလုံးမှာ ပါဝင်ကစားခွင့်ရခဲ့ပြီး ရေယို ဗယ်လက်ကာနိုနဲ့ တစ်ဂိုးစီသရေကျခဲ့တဲ့ပွဲမှာ အထင်ကရ ကာကွယ်မှုတွေပြုလုပ်ပြီး အသင်းကို ကယ်တင်ခဲ့ပါတယ်။

စပိန်သား ဂါစီယာရဲ့ အက်စ်ပန်ညိုအသင်းကနေ ထွက်ခွာမှုဟာ ပရိသတ်အကြိုက်ဖြစ်တဲ့ ပြည်တွင်းဖြစ်ကြယ်ပွင့်တစ်ဦးကို လက်လွှတ်လိုက်ရတဲ့အတွက် အက်စ်ပန်ညိုအသင်းကို ထိခိုက်ခဲ့ပါတယ်။ ပြီးခဲ့တဲ့ရာသီက သူဟာ လာလီဂါမှာ ကာကွယ်မှု ၁၄၆ ကြိမ်အထိ ပြုလုပ်နိုင်ခဲ့လို့ အသင်းကို ထိပ်တန်းလိဂ်မှာ ဆက်လက်ရပ်တည်နိုင်ဖို့ အရေးပါတဲ့ အခန်းကဏ္ဍကနေ ကူညီပေးခဲ့တာပါ။ အခုတော့ သူ့ရဲ့ ဘာစီလိုနာအသင်းကို ပြောင်းရွှေ့မှုဟာ နှစ်သင်းရဲ့ ပြိုင်ဆိုင်မှုအပေါ်မှာ မူတည်ပြီး အက်စ်ပန်ညို ပရိသတ်တွေ စိတ်ပျက်ခဲ့ရပါတယ်။ ဒါပေမဲ့ ဂါစီယာရဲ့ တိုးတက်မှုကတော့ သူ့ကို လူသိများအောင်လုပ်ဆောင်ပေးခဲ့ပြီး သူ့ရဲ့ စွမ်းဆောင်ရည်တွေက ဘာစီလိုနာရဲ့ ရေရှည်နံပါတ်တစ် ဂိုးသမားဖြစ်လာနိုင်တယ်ဆိုတာကို ဖော်ပြနေပါတယ်။

“ကျွန်တော်အားလုံးကို နားလည်ပါတယ်။ ကျွန်တော်ဆိုရင်တော့ ဘာစီလိုနာကို သွားမှာမဟုတ်ပါဘူး။ ဒါပေမဲ့ အားလုံးရဲ့ ဆုံးဖြတ်ချက်တွေကို နားလည်ပါတယ်” လို့ နည်းပြ ဂွန်ဇာလက်ဇ်က ပြောကြားခဲ့ပါတယ်။

“သူက ကျွန်တော့်ဆီကို အသံဖိုင် ပေးပို့ခဲ့ပြီး ကျွန်တော်လည်း ပြန်ပို့ခဲ့ပါတယ်။ အဲဒီနောက်ပိုင်း ကျွန်တော်တို့ မပြောဖြစ်တော့ပါဘူး။ ကျွန်တော် သူ့ရဲ့ ဆုံးဖြတ်ချက်ကို သဘောမတူပါဘူး။ ဒါပေမဲ့ သူ့ကို ကျွန်တော်လေးစားပါတယ်။ သူက အကောင်းဆုံးပါ၊ ကမ္ဘာ့အဆင့် ဂိုးသမားတစ်ဦးဖြစ်ပြီး အသင်းပြောင်းရုံနဲ့ ဒါတွေပြောင်းလဲသွားမှာ မဟုတ်ပါဘူး။ ဘယ်သူမဆို သူတို့ဘဝမှာ သူတို့လိုချင်တာကို လုပ်ပိုင်ခွင့်ရှိပါတယ်။ ဒါပေမဲ့ သူက ပြည်တွင်းဖြစ် ကစားသမားတစ်ဦးဖြစ်ပြီး အရမ်းကို လူကြိုက်များခဲ့လို့ ဒီလိုအာရုံစိုက်မှုတွေ ရခဲ့တာပါ။ သူသာ ဘာစီလိုနာကနေ အက်စ်ပန်ညိုကို ပြောင်းလာခဲ့မယ်ဆိုရင်လည်း အလားတူပဲ ဖြစ်လာမှာပါ” လို့ COPE's El Partidazo အစီအစဉ်မှာ ဂွန်ဇာလက်ဇ်က ပြောကြားခဲ့ပါတယ်။

ဘာစီလိုနာအသင်းဟာ ဗလင်စီယာအသင်းကို အိမ်ကွင်းမှာ ရာသီရဲ့ ပထမဆုံးပွဲစဉ်အဖြစ် အိမ်ရှင်အဖြစ် လက်ခံကစားရမှာဖြစ်ပြီး ဂါစီယာကတော့ ပွဲထွက်ကစားသမားအဖြစ် ပါဝင်ကစားခွင့် ဆက်လက်ရရှိဖို့ မျှော်လင့်ရပါတယ်။