ချဲလ်ဆီးနည်းပြ အန်ဇိုမာရက်စ်ကာဟာ စနေနေ့ညက မန်စီးတီးကို ၃-၁ နဲ့ရှုံးနိမ့်ခဲ့တဲ့ ပရီးမီးယားလိဂ်ပွဲစဉ်မှာ အမှားလုပ်ခဲ့တဲ့ အသင်းရဲ့ဂိုးသမား ရောဘတ်ဆန်းချက်ဇ်ကို ဝက်စ်ဟမ်းနဲ့ကစားသွားရမယ့် လန်ဒန်ဒါဘီပွဲစဉ်မှာ ချန်လှပ်သွားနိုင်ချေရှိတယ်လို့ သတင်းတွေထွက်ပေါ်လာပါတယ်။ 

မန်စီးတီးနဲ့ပွဲမှာ ချဲလ်ဆီးဟာ နိုနီမာဒူကီရဲ့သွင်းဂိုးနဲ့အတူ ပွဲကိုစောစောစီးစီးဦးဆောင်နိုင်ခဲ့ပေမယ့် ပထမပိုင်းအပြီးမှာပဲ ချေပဂိုးပြန်လည်ခွင့်ပြုခဲ့ရတာဖြစ်ပါတယ်။ ဒုတိယပိုင်းမှာ ချဲလ်ဆီးအနေနဲ့ ဦးဆောင်ဂိုးထပ်မံရရှိဖို့ အခွင့်အရေးတွေရခဲ့ပေမယ့် တိုက်စစ်ပိုင်းအဆုံးသတ်မသေချာမှုတွေကြောင့် ဂိုးအဖြစ်ပြောင်းလဲနိုင်ခဲ့ခြင်းမရှိပါဘူး။ 

ဒုတိယပိုင်း ပွဲကစားချိန် ၆၈ မိနစ်မှာတော့ အသင်းရဲ့ဂိုးသမား ဆန်းချက်ဇ်ရဲ့အမှားမှတစ်ဆင့် ချဲလ်ဆီးတို့ ဦးဆောင်ဂိုးခွင့်ပြုခဲ့ရပြီး မန်စီးတီးတိုက်စစ်မှူး အာလင်းဟာလန်းကသေသေသပ်သပ်အဆုံးသတ်ခဲ့တာဖြစ်ပါတယ်။ ထို့နောက်ပွဲပြီးကာနီး ၈၇ မိနစ်မှာတော့ မန်စီးတီးအတွက် အနိုင်သေချာစေမယ့်ဂိုးကို ဖီးလ်ဖိုဒန်က ထပ်မံသွင်းယူပေးခဲ့ပြီးအိမ်ကွင်း အီတီဟတ်မှာ ဂိုးပြတ်နိုင်ပွဲရရှိစေခဲ့ပါတယ်။ 

ယခုရှုံးပွဲကြောင့် ချဲလ်ဆီးဟာ ပရီးမီးယားလိဂ်အမှတ်ပေးဇယားရဲ့ အဆင့် ၆ နေရာသို့ကျဆင်းသွားခဲ့ပြီး ချန်ပီယံဆုဖလားအတွက် စိန်ခေါ်နိုင်ဖို့ အခွင့်အရေးနည်းပါးသွားခဲ့ပြီဖြစ်ပါတယ်။ ယခုပွဲစဉ်မှာ အမှားလုပ်ခဲ့တဲ့ ဆန်းချက်ဇ်ကလည်း ဒီရာသီမှာ စုစုပေါင်း အမှား ၅ ကြိမ်အထိပြုလုပ်ထားပြီး ဝေဖန်မှုတွေနဲ့လည်း ကြုံတွေထားရတာဖြစ်ပါတယ်။ 

၂၀၂၃ နွေရာသီမှာ ဘရိုက်တန်မှ ချဲလ်ဆီးသို့ပေါင် ၂၅ သန်းနဲ့ပြောင်းရွှေ့လာခဲ့တဲ့ ဆန်းချက်ဇ်ကို ပွဲအပြီးမှာ နည်းပြ အန်ဇိုမာရက်စ်ကာက ကာကွယ်ပြောဆိုမှုတွေ ပြုလုပ်ခဲ့ပါသေးတယ်။ သို့သော်လည်း သတင်းတွေအရ မာရက်စ်ကာဟာ ဝက်စ်ဟမ်းနဲ့ယှဉ်ပြိုင်သွားရမယ့် လန်ဒန်ဒါဘီပွဲစဉ်မှာတော့ ဆန်းချက်ဇ်ကိုချန်လှပ်ပြီး ဖိလစ်ပ်ဂျော်ဂျင်ဆန်ကို ပွဲထုတ်သွားနိုင်ချေရှိတယ်လို့ သိရပါတယ်။ ပြီးခဲ့တဲ့နွေရာသီက ဗီလာရီးရဲလ်မှ စတန်းဖို့ဒ်ဘရစ်ချ်သို့ပေါင် ၂၁ သန်းနဲ့ပြောင်းရွှေ့လာခဲ့တဲ့ ဂျော်ဂျင်ဆန်ဟာ ဒီရာသီမှာ ချဲလ်ဆီးအတွက် စုစုပေါင်း ၁၃ ပွဲအထိ ပါဝင်ကစားခွင့်ရထားပေမယ့် ပရီးမီးယားလိဂ်မှာတော့ ၂ ပွဲသာ ကစားခွင့်ရထားတာဖြစ်ပါတယ်။ 

မန်စီးတီးနဲ့ပွဲစဉ်အပြီး ဆန်းချက်ဇ်နဲ့အမှားနဲ့ပတ်သက်ပြီး မေးမြန်းမှုပြုလုပ်ခဲ့ရာမှာ မာရက်စ်ကာက “ကျွန်တော်တို့ ပထမဆုံးဂိုးအရင်သွင်းနိုင်ခဲ့ပြီး ဒုတိယဂိုးသွင်းဖို့အတွက်လည်း အခွင့်အရေး‌ ၂ ကြိမ် ၃ ကြိမ်လောက်ရခဲ့ပါတယ်။ ဒါပေမယ့် အခွင့်အရေးတွေကို လွဲချော်ခဲ့လို့ ပွဲကအခြေအနေပြောင်းလဲသွားခဲ့ပါတယ်။ ဒုတိယဦးဆောင်ဂိုးပေးလိုက်ရပြီးနောက်မှာ ပွဲကလုံးဝပြောင်းလဲသွားခဲ့ပြီး အဲဒီဂိုးအတွက် ဆန်းချက်ဇ်အနေနဲ့ အခုထက်ပိုကောင်းလာရမယ်ဆိုတာ သိဖို့လိုအပ်ပါတယ်။ နေ့တိုင်းအလုပ်ကြိုးစားပြီး တိုးတက်မှုကိုပြသသွားနိုင်ရပါမယ်။ တစ်သင်းလုံးအခုထိ ပိုကောင်းလာဖို့လိုအပ်ပါသေးတယ်” လို့ပြောကြားခဲ့ပါတယ်။ 

ပွဲပြီးသတင်းစာရှင်းလင်းပွဲမှာလည်း မာရက်စ်ကာက “သေချာတာတစ်ခုကတော့ ဆန်းချက်ဇ်အနေနဲ့ အခုထက်ပိုကောင်းဖို့လိုအပ်တယ်ဆိုတာ သိထားရပါမယ်။ သူသိမယ်လို့လည်း ယုံကြည်ပါတယ်။ ကျွန်တော်တို့သူ့ကို ယုံကြည်ထားပါတယ်။ လောလောဆယ်မှာ အမှားအချို့လုပ်မိတယ်ဆိုပေမယ့် သူက ယုံကြည်မှုနဲ့ထိုက်တန်တဲ့ကစားသမားပါ။ အခုချိန်မှာတော့ နောက်ပွဲအတွက် အာရုံစိုက်သွားရပါမယ်” လို့ပြောကြားခဲ့ပါတယ်။