ဂျူဗင်တပ်စ်အသင်းမှာ ပုံစံမပြနိုင်ခဲ့တဲ့ ဒေါက်ဂလပ်စ် လူးဝစ်ကို အငှားနဲ့ ခေါ်ယူလိုက်ကြောင်း နော်တင်ဟမ်ဖောရက်စ်အသင်းက အတည်ပြုခဲ့ပါတယ်။ အက်စတွန်ဗီလာကနေ ဂျူဗင်တပ်စ်ဆီ ယူရို သန်း ၅၀ နဲ့ ပြောင်းရွှေ့ပြီး တစ်နှစ်အကြာမှာတော့ ဒီကွင်းလယ်ကစားသမားဟာ ဖောရက်စ်အသင်းနဲ့အတူ ပရီးမီးယားလိဂ်ကို ပြန်လာခဲ့ပါပြီ။ အသင်းကတော့ တစ်ရာသီအငှားစာချုပ်အပြင် လာမယ့်နွေရာသီမှာ ဘရာဇီးလက်ရွေးစင်ကို မဖြစ်မနေ ဝယ်ယူရမယ့် စာချုပ် ပါဝင်တယ်လို့ ဆိုပါတယ်။

“ဒီကိုရောက်ရလို့ ကျွန်တော် အရမ်းပျော်ပါတယ်။ ဒီကလပ်က ကြီးမားတဲ့ ကလပ်ဖြစ်ပြီး ကလပ်မှာ ရှိတဲ့ ရည်မှန်းချက်တွေကို မြင်ရတာကြောင့် ကျွန်တော် ဒီကို လာဖို့ ဆုံးဖြတ်ခဲ့တာပါ” “အသင်းနဲ့အတူ စတင်ဖို့ ကျွန်တော် စိတ်လှုပ်ရှားနေပြီး အသင်းအတွက်နဲ့ ပရိသတ်တွေအတွက် အကောင်းဆုံး လုပ်ဆောင်သွားပါမယ်” လို့ လူးဝစ်က ပြောခဲ့ပါတယ်။

လူးဝစ်ဟာ ပြီးခဲ့တဲ့နှစ်က သူ့ရဲ့ ရည်းစား အလီရှာ လီမန်းနဲ့အတူ ဥရောပရဲ့ အကြီးဆုံးအသင်းတစ်သင်းကို ရောက်ရှိလာခဲ့ပေမဲ့ အဲ့ဒီနောက်ပိုင်းမှာတော့ အများကြီး ပြောင်းလဲသွားခဲ့ပါတယ်။ ဒီစုံတွဲဟာ အတူရှိတော့တာ မဟုတ်ဘဲ လူးဝစ်ကလည်း အင်္ဂလန်ကို ပြန်လာခဲ့ပြီး လီမန်းကတော့ ကိုမိုအသင်းကို ပြောင်းရွှေ့သွားခဲ့ပါတယ်။ ဂျူဗင်တပ်စ်အတွက် ပြိုင်ပွဲအားလုံးမှာ ၆ ပွဲသာ ပွဲထွက်ကစားခဲ့တဲ့ အသက် ၂၇ နှစ်အရွယ် ကစားသမားဟာ အရည်အချင်းရှိတဲ့ ကစားသမားဖြစ်ပြီး အသင်းပရိသတ်တွေကတော့ သူ့ရဲ့ကစားသမားဘဝကို ပြန်လည်အသက်ဝင်လာစေဖို့ မျှော်လင့်နေကြပါတယ်။

ဒီ ဘရာဇီးကစားသမားဟာ လာမယ့် တနင်္ဂနွေနေ့ ခရစ္စတယ်ပဲလေ့စ်အသင်းနဲ့ ကစားမယ့်ပွဲမှာ ပရီးမီးယားလိဂ် ပွဲဦးထွက် ကစားနိုင်ကာ နည်းပြ နူနို အက်စ်ပီရီတို ဆန်းတိုရဲ့ အသင်းနဲ့အတူ ယူရိုပါလိဂ်မှာလည်း ဝင်ရောက်ယှဉ်ပြိုင်ရဖို့ ရှိနေပါတယ်။