အခုဘောလုံးရာသီ၊ သွင်းဂိုးလေးဂိုးသာ သွင်းယူထားနိုင်တဲ့ ဒါဝင်နူနက်ဇ်အနေဖြင့် မိမိကိုယ်ကိုယုံကြည်မှုရှိဖို့ ရုန်းကန်နေရတာမျိုး မဟုတ်ပါဘူးလို့ လီဗာပူးနည်းပြအန်းစလော့က အခိုင်အမာပြောဆိုခဲ့ပါတယ်။

ဥရုဂွေးသားက အခုဘောလုံးရာသီမှာ ပွဲထွက်ကစားသမားအဖြစ် ၁၄ ပွဲ ကစားရမှုအပါအဝင် ၂၆ ပွဲအထိ ပါဝင်ကစားထားပေမယ့် သွင်းဂိုးလေးဂိုး၊ ဂိုးဖန်တီးမှုလေးကြိမ်သာ ပြုလုပ်ထားနိုင်ပါတယ်။ လတ်တလောမှာလည်း ဒါဝင်နူနက်ဇ်နဲ့ပတ်သက်လို့ အီတလီ၊ ဆော်ဒီတို့ဘက်မှ အပြောင်းအရွှေ့ဆိုင်ရာ ထင်ကြေးပေးမှုတွေ ထွက်ပေါ်ခဲ့ပေမယ့် အသက်-၂၅ နှစ်အရွယ်တိုက်စစ်မှူးအတွက် ကမ်းလှမ်းမှုတစ်ခုခု အသင်းဆီ မရောက်ရှိလာပါဘူးလို့ The Athletic သတင်းဌာနရဲ့ နာမည်ကြီးသတင်းထောက် James Pearce က ရေးသားဖော်ပြခဲ့ပါတယ်။

ဒါပေမယ့်လည်း လာမယ့်နွေရာသီမှာတော့ ဥရုဂွေးသားနဲ့ လမ်းခွဲတစ်ခုရှိလာလိမ့်မယ်လို့ ယုံကြည်နေကြပြီး ဒီအခြေအနေတွေက တိုက်စစ်မှူးအပေါ် သူ့ရဲ့ယုံကြည်မှုနဲ့ ကစားသမားရဲ့တည်ငြိမ်မှုပိုင်းအပေါ် သက်ရောက်မှုရှိစေလားလို့ အန်းစလော့ဆီ သတင်းထောက်တစ်ဦး မေးမြန်းခဲ့ပါတယ်။

အန်းစလော့က “ ဒါက ခင်ဗျားရဲ့ယူဆချက်ဖြစ်သလို အခြားလူတွေရဲ့ယူဆချက်လည်း ဖြစ်ကောင်းဖြစ်နိုင်ပါတယ်။ ဒါပေမယ့် မိမိကိုယ်ကိုယုံကြည်မှုရှိဖို့ ဒါဝင်နူနက်ဇ်ရုန်းကန်နေရတယ်ဆိုတဲ့အမြင်က ကျွန်တော့်ရဲ့ထင်မြင်ယူဆချက်တော့ မဟုတ်ပါဘူး။ သူက အက်ကရင်တန်စတန်လေနဲ့ပွဲစဉ်မှာ အသင်းရဲ့ဦးဆောင်ဂိုးအတွက် အကောင်းဆုံးပါဝင်ပတ်သက်ပေးခဲ့ပါတယ်။ ဖူလ်ဟမ်နဲ့ပွဲစဉ်မှာလည်း ဂျိုတာဂိုးသွင်းယူနိုင်ဖို့ ပါဝင်ပတ်သက်ပေးခဲ့ပါတယ်။ ဆောက်သမ်တန်နဲ့ပွဲစဉ်မှာဆို သူဂိုးသွင်းယူနိုင်ခဲ့ပါတယ်။

အခုလိုအခြေအနေတွေအပြီးမှာ သူ ပွဲထွက်ခွင့်အများကြီးမရရှိတာမျိုးလည်း ဖြစ်နိုင်ပါတယ်။ ကျွန်တော့်အတွက်တော့ တိုက်စစ်မှူးတစ်ဦးဘဝဆိုတာ ဒါပါပဲ။ တခါတလေမှာ ဂိုးသွင်းယူနိုင်ပေမယ့် တခါတလေတော့ ဂိုးမသွင်းနိုင်ပါဘူး။ သူကိုယ်တိုင်လည်း ပွဲစဉ်တိုင်းမှာ ပွဲထွက်ခွင့် မရရှိခဲ့ပါဘူး။ 

ကျွန်တော့်အတွက်၊ အသင်းတစ်ခုဖြစ်တဲ့ ကျွန်တော်တို့အတွက် အရေးအကြီးဆုံးအရာက ပွဲစဉ်တိုင်းမှာ ဂိုးသွင်းယူနိုင်ဖို့ ဖြစ်ပါတယ်။ တော့တင်ဟမ်နဲ့ကာရာဘောင်ဖလားပထမအကျော့ကတော့ ခြွင်းချက်ပေါ့။ အဲ့ဒီပွဲစဉ်က ကျွန်တော်တို့ကစားခဲ့တဲ့ပွဲစဉ်တွေထဲမှာ ဂိုးမသွင်းယူနိုင်တဲ့ တစ်ခုတည်းသောပွဲစဉ် ဖြစ်မလားဆိုတာ ကျွန်တော်လည်း မသိသေးပါဘူး”လို့ ပြောပါတယ်။

တကယ်တော့ တော့တင်ဟမ်နဲ့ပွဲစဉ်က အခုရာသီ၊ လီဗာပူးအသင်း ဂိုးမသွင်းယူနိုင်တဲ့ ဒုတိယမြောက်ပွဲစဉ် ဖြစ်ပါတယ်။ သူတို့တွေက နော်တင်ဟမ်ဖောရက်စ်ကို အန်ဖီးလ်မှာ ဧည့်ခံကစားရချိန် ဂိုးပေါက်ပျောက်ခဲ့ဖူးပါတယ်။ ဆက်လက်ပြီး အန်းစလော့က “ ကျွန်တော်တို့အသင်းမှာ ရည်မှန်းချက်တွေ အများကြီးရှိပါတယ်။ ဒါဝင်နူနက်ဇ်လည်း အရင်တုန်းကလိုပဲ ဂိုးတွေ သွင်းယူပေးပါလိမ့်မယ်။ သူ ဒါကို ဆက်လုပ်နေပါလိမ့်မယ်။

ခင်ဗျားတို့ မြင်နေသလို သူ ရုန်းကန်နေရတယ်လို့တော့ ကျွန်တော် မထင်ပါဘူး။ ပြီးခဲ့တဲ့ပွဲစဉ်အချို့မှာလည်း ဒါဝင်နူနက်ဇ်က အသင်းရဲ့သွင်းဂိုးတွေမှာ ပါဝင်ပတ်သက်ပေးခဲ့ပါတယ်”လို့ ပြောပါတယ်။

လာမယ့်နွေရာသီအတွင်း ဒါဝင်နူနက်ဇ်ရဲ့အနာဂတ်နဲ့ပတ်သက်ပြီး ဆွေးနွေးစရာတွေ အများကြီးရှိနိုင်ပေမယ့် လီဗာပူးအသင်းရဲ့ဖလားလေးလုံးမျှော်လင့်ချက်နဲ့အတူ ဘရန့်ဖို့ဒ်နဲ့ပွဲစဉ်မှာ ဂျိုတာပါဝင်ကစားနိုင်ဖို့ မသေချာလို့  သူပွဲထွက်ပါဝင်ကစားခွင့်ရရှိလာရန် လိုအပ်နေပါတယ်။