အာဆင်နယ်နည်းပြအာတီတာက လေ့ကျင့်ခန်းအစီအစဉ်ခြောက်ခုကိုကျော်ဖြတ်ကာ တံခါးပိတ်ခြေစမ်းပွဲအတွင်း အထင်ကြီးလောက်စရာစွမ်းဆောင်ရည်မျိုးပြသခဲ့တဲ့ ဆာကာအနေဖြင့် လပေါင်းများစွာကြာအနားယူခဲ့ရတဲ့ တံကောက်ကြောဒဏ်ရာပြဿနာမှ ပြန်လာနိုင်ဖို့ အဆင်သင့်ဖြစ်နေပြီလို့ ထုတ်ဖော်ပြောကြားခဲ့ပါတယ်။

တံကောက်ကြောခွဲစိတ်ကုသမှုအပြီး သုံးလနီးပါးကြာ အနားယူခဲ့ရတဲ့ ဆာကာက ဒီည၊ ဖူလ်ဟမ်နဲ့ရင်ဆိုင်ရမယ့် အာဆင်နယ်ရဲ့ပရီးမီးယားလိဂ်ပွဲစဉ်ကို ပါဝင်ကစားနိုင်ဖို့ နီးစပ်နေပါတယ်။ ဆာကာအနားယူခဲ့ရတဲ့အချိန်ကာလတွေက အာဆင်နယ်အတွက်ရော၊ ကစားသမားအတွက်ပါ ခက်ခဲခဲ့ပါတယ်။ဒီဇင်ဘာလအတွင်း ဆာကာဒဏ်ရာရရှိသွားချိန်မှာ မြောက်လန်ဒန်ကလပ်အသင်းက အမှတ်ပေးဇယားဦးဆောင်သူလီဗာပူးနဲ့ ခြောက်မှတ်အကွာမှာ ရှိနေပေမယ့် အခုအချိန်မှာတော့ ၁၂ မှတ်အထိ ကွာဟနေပါပြီ။ အဲ့ဒီအချိန်တုန်းက အင်္ဂလန်လက်ရွေးစင်ကစားသမားကို အားအင်ပြည့်ဝနေစေရန် အနားယူသွားဖို့ အာတီတာက တိုက်တွန်းခဲ့ပါတယ်။

အင်္ဂါနေ့သတင်းစာရှင်းလင်းပွဲမှာ အာတီတာက သူ့ရဲ့တိုက်တွန်းမှု အလုပ်ဖြစ်သွားပြီလို့ ရှင်းပြရင်း ဆာကာအတွက် ဒဏ်ရာပြဿနာဆုတ်ယုတ်မှုတစ်ခု ဖြစ်ပေါ်လာနိုင်မယ့်အလားအလာကို မစိုးရိမ်မိဘူးလို့ ပြောခဲ့ပါတယ်။ အာတီတာက “ ကျွန်တော်တို့ ခြေစမ်းပွဲတစ်ကြိမ် ကစားခဲ့ပါတယ်။ ဒါပေမယ့် အဲ့ဒီခြေစမ်းပွဲမတိုင်ခင်မှာပဲ ဆာကာက အသင်းနဲ့အတူ လေ့ကျင့်ခန်းခြောက်ကြိမ်လောက် ဆက်တိုက်ဆင်းခဲ့ပါတယ်။ သူ့ရဲ့အခြေအနေ ကောင်းမွန်ခဲ့ပါတယ်။

ကျွန်တော်တို့ ခြေစမ်းပွဲကစားခဲ့ပြီး ဆာကာကိုယ်တိုင်လည်း လုံးဝကောင်းမွန်နေပြီလို့ ခံစားမိနေခဲ့ပါတယ်။ ဖြစ်လာနိုင်တဲ့အခြေအနေတိုင်းအတွက် ပြင်ဆင်ထားချင်လို့ ခြေစမ်းပွဲကို ကစားခဲ့တာပါ။ လူ ၆၀,၀၀၀ ရှိမယ့် ဘောလုံးကွင်းကြီးတစ်ခု၊ မတူညီတဲ့ ယှဉ်ပြိုင်မှုအဆင့်အတန်း၊ ကွင်းလယ်ဒိုင်တစ်ဦးနဲ့အတူ ယှဉ်ပြိုင်ရမယ့် ပွဲစဉ်အတွက် အဆုံးမှာတော့ ခြေစမ်းပွဲဆိုတာ လိုအပ်ပါတယ်။No. ကျွန်တော်ကတော့ ဆာကာ ဒဏ်ရာပြန်ရသွားမှာကို မစိုးရိမ်မိပါဘူး။ ဘာကြောင့်လဲဆိုတော့ သူက အကြိမ်ပေါင်းများစွာ အရာရာတိုင်းကို လုပ်ပြနိုင်ခဲ့လို့ပါပဲ။

သူ့မှာ ပွဲကစားချိန်တွေ လိုအပ်နေပေမယ့် အခြားလိုအပ်မယ့်အရာအားလုံးကိုလည်း သူဖြည့်ဆည်းပြီးနေပါပြီ။ ဒဏ်ရာနဲ့ပတ်သက်လို့ အလျင်စလိုလုပ်မိချိန်တိုင်းမှာ စိုးရိမ်မှုတွေ ပုံမှန်လိုလို ဖြစ်ပေါ်လေ့ရှိပါတယ်။ သုံးပတ်လောက်အနားယူရမယ့် ဒဏ်ရာတစ်ခုရှိနေချိန်၊ ၁၀ ရက်လောက်အကြာမှာပဲ ကွင်းတွင်းပြန်ကစားချင်နေတယ်ဆိုရင် ဒီဒဏ်ရာထပ်မဖြစ်စေဖို့ ဆုတောင်းပေးနေရပါလိမ့်မယ်။

ဒါပေမယ့် ဆာကာက အဲ့ဒီအပိုင်းမှာတော့ တကယ်ကောင်းမွန်ခဲ့ပါတယ်။ အခုအချိန်မှာ သူကောင်းကောင်းလုပ်နိုင်နေတယ်ဆိုတဲ့ အာမခံချက်အများကြီးကို ကျွန်တော်တို့ ရရှိထားပါတယ်”လို့ ပြောပါတယ်။