ဘိုချမ်ကို အံ့အားသင့်ဖွယ် အရေးနိမ့်ပြီးနောက် ဘိုင်ယန်မြူးနစ်ရဲ့ လိဂ်ချန်ပီယံဆုကာကွယ်နိုင်ရေး မျှော်လင့်ချက်က လိုအပ်မှုတွေ ပိုမိုများပြားလာခဲ့ပါတယ်။

အခုပွဲစဉ်ရဲ့ ပွဲအစ ၁၅ မိနစ်ခန့်မှာပဲ မူစီယာလာက လှပတဲ့အဝေးကန်ချက်နဲ့အတူ တူချယ်ရဲ့အသင်းအတွက် ဦးဆောင်ဂိုးသွင်းယူခဲ့ပါတယ်။ ဒီနောက်မှာတော့ ကွင်းတွင်းရှိ ပရိသတ်တွေက ဂျာမန်ဘောလုံးအဖွဲ့ချုပ်ကို ဆန့်ကျင်ဆန္ဒပြမှုအဖြစ် ကွင်းတွင်းဆီ တင်းနစ်ဘောလုံးတွေ ပစ်ထည့်လာခဲ့ကြလို့ နှစ်ဖက်အသင်း ကစားသမားတွေ ယှဉ်ပြိုင်ကစားမှုကို ရပ်နားကာ ကွင်းတွင်းမှ ထွက်ခွာလာခဲ့ပါတယ်။

ကွင်းတွင်းအခြေအနေတွေ ပြန်လည်တည်ငြိမ်လာကာ ပွဲစဉ်ပြန်လည်စတင်လာပြီး ပွဲချိန် ၃၈ မိနစ်မှာပဲ အိမ်ရှင်တွေ အတွက် ချေပဂိုးကို ကောင်းမွန်လှတဲ့ တန်ပြန်တိုက်စစ်ကစားဟန်မှတဆင့် အဆာနိုက အပိုင်ကန်သွင်းပြီး ရယူပေးခဲ့ပါတယ်။ နောက်ထပ် ခြောက်မိနစ်အကြာမှာတော့ စတိုဂါရဲ့ညာခြမ်းထောင့်ကန်ဘောပေးပို့မှုကို ရှလော့တာဘတ်ချ်က ခေါင်းတိုက်ပြီး ဘိုချမ်အတွက် ဦးဆောင်ဂိုးသွင်းယူခဲ့ပါတယ်။

ဒုတိယပိုင်းပြန်လည်စတင်လာပြီး မကြာခင်မှာပဲ ဆန္ဒပြမှုတွေ နောက်တစ်ကြိမ် ပေါ်ပေါက်လာခဲ့လို့ ကစားသမားတွေဟာ သက်ဆိုင်ရာအဝတ်လဲခန်းတွေဆီ ပြန်လည်ထွက်ခွာသွားတာကို မြင်တွေ့ခဲ့ရပါတယ်။ ဒါပေမယ့် ဧည့်သည်တွေအတွက် ကံဆိုးမှုတွေက ဆက်တိုက်ဆိုသလို ထွက်ပေါ်လာနေခဲ့ပါတယ်။ ပွဲချိန် ၇၅ မိနစ်ဝန်းကျင်မှာ ဘိုင်ယန်မြူးနစ်ဂိုးဧရိယာအတွင်း ရှလော့တာဘတ်ချ်အပေါ် ကစားပုံကြမ်းတမ်းတဲ့ အူပါမီကာနို နှစ်ဝါတစ်နီဖြင့် ထုတ်ပယ်ခံခဲ့ရသလို ဘိုချမ်အတွက် ပယ်နယ်တီအခွင့်အရေးလည်း ရရှိခဲ့ပါတယ်။ ဒီပယ်နယ်တီကို စတိုဂါက တည်တည်ငြိမ်ငြိမ်နဲ့ကန်သွင်းပြီး အိမ်ရှင်တွေအတွက် ဒုတိယမြောက်ဦးဆောင်ဂိုး သွင်းယူခဲ့ပါတယ်။

သာမန်ပွဲကစားချိန်ပြီးဆုံးဖို့ သုံးမိနစ် အလိုမှာပဲ မာသီးယက်စ်တဲလ်ရဲ့ ဖန်တီးပေးမှုကို ဟယ်ရီကိန်းက ကန်သွင်းပြီး ဘိုင်ယန်မြူးနစ်အတွက် ဒုတိယမြောက်ချေပဂိုး သွင်းယူခဲ့ပါတယ်။ နာကျင်အချိန်ပိုမိနစ်တွေ အတွင်း ဧည့်သည်တွေအတွက် အဖိုးတန်ချေပဂိုး ရရှိဖို့ အကောင်းဆုံးအခွင့်အရေးအဖြစ် ဟယ်ရီကိန်းရဲ့ကြိုးပမ်းမှုကို ဘိုချမ်ဂိုးသမားရီမန်းစ် အံ့အားသင့်ဖွယ် လက်စွမ်းပြကာကွယ်သွားခဲ့ပါတယ်။

ပွဲပြီးချိန်မှာတော့ ဘိုချမ်က ဘိုင်ယန်မြူးနစ်ကို ၃-၂ ဂိုးဖြင့် အနိုင်ရရှိခဲ့ပါတယ်။ အခုပွဲစဉ်ရလဒ်ပိုင်းကြောင့် တူချယ်ရဲ့အသင်းက ဘွန်ဒက်စ်လီဂါ ၂၂ ပွဲ ကစားပြီးချိန် အမှတ်ပေးဇယားဦးဆောင်သူ လေဗာကူဆင်နဲ့ ရမှတ် ရှစ်မှတ်အထိ ကွာဟသွားခဲ့ပါတယ်။