ယမန်နေ့ညပိုင်း၊ ဂီတာဖေးကို ၂-၁ ဂိုးဖြင့်ရှုံးနိမ့်ကာ လာလီဂါအမှတ်ပေးဇယားထိပ်ဆုံးနေရာဆီ တက်လှမ်းနိုင်မယ့် အခွင့်အရေးလက်လွှတ်ခဲ့ရပြီးနောက် အက်သလက်တီကိုမက်ဒရစ်နည်းပြဆီမြွန်နီက သူ့ကစားသမားတွေရဲ့ဆိုးရွားလှတဲ့စွမ်းဆောင်ရည်ပိုင်းအတွက် အလွန်စိတ်ပျက်နေခဲ့ပါတယ်။

အခုပွဲစဉ်ရဲ့ပွဲချိန် ၇၅ မိနစ်မှာ ဆော်လော့က ပယ်နယ်တီမှတဆင့် အက်သလက်တီကိုမက်ဒရစ်အတွက် ဦးဆောင်ဂိုးသွင်းယူပေးပြီးနောက် ဂီတာဖေးက ပြိုင်ဘက်တိုက်စစ်မှူးကော်ရီယာထုတ်ပယ်ခံရမှုအပေါ် အကောင်းဆုံးအသုံးချကာ အရမ်ဘာယီရဲ့မြန်ဆန်လှတဲ့သွင်းဂိုးနှစ်ဂိုးနဲ့အတူ ပြန်လာနိုင်ခဲ့ပါတယ်။

DAZN သတင်းဌာနနဲ့တွေ့ဆုံချိန် ဆီမြွန်နီက “ ဒီပွဲစဉ်မှာ ဘာကောင်းကျိုးမှ မရှိခဲ့ဘူး။ ဆိုးရွားလှတဲ့ စွမ်းဆောင်ရည်ပိုင်းနဲ့ စောင့်ကြည့်ချင်စရာမကောင်းတဲ့ ပွဲစဉ်တစ်ခုဖြစ်ပါတယ်။နည်းဗျူဟာပိုင်းရှုထောင့်အရ ကြည့်မယ်ဆိုရင် အသင်းတိုင်းက သူတို့နဲ့သင့်လျော်စေမယ့် အကောင်းဆုံး အရာတစ်ခု ရှာဖွေနေကြပါလိမ့်မယ်။ ကျွန်တော်တို့ကတော့ ကိုယ်မျှော်လင့်ထားတဲ့အရာကို မရှာဖွေနိုင်ခဲ့ပေမယ့် ပယ်နယ်တီအခွင့်အရေးတော့ ရရှိခဲ့ပါတယ်။ နောက်တော့ ကော်ရီယာ ထုတ်ပယ်ခံရပြီး အခုလိုမထင်မှတ်ထားတဲ့အရာတွေ ဖြစ်ပေါ်လာခဲ့ပါတယ်”လို့ ပြောပါတယ်။

အက်သလက်တီကိုမက်ဒရစ်က လာမယ့်ဗုဒ္ဓဟူးနေ့၊ ချန်ပီယံလိဂ် ၁၆ သင်းရှုံးထွက်ဒုတိယအကျော့ပွဲစဉ်အဖြစ် မြို့ခံပြိုင်ဘက်ရီးရဲလ်မက်ဒရစ်ကို ဧည့်ခံကစားရပါမယ်။ ဒီနောက်မှာတော့ သူတို့တွေက လာမယ့်တနင်္ဂနွေနေ့မှာ ဘာစီလိုနာနဲ့ လာလီဂါပွဲစဉ်ကို ဆက်လက်ယှဉ်ပြိုင်ကစားရပါမယ်။

ဆီမြွန်နီက “ ဒါက စိတ်ဓါတ်ပိုင်းနဲ့သက်ဆိုင်တဲ့ကိစ္စလို့တော့ မထင်ပါဘူး။ အသင်းရဲ့စိတ်ဓါတ်ပိုင်းက အဆင်ပြေနေပါတယ်။ ဒါပေမယ့် ဒီနေ့ပွဲစဉ်ကတော့ ကျွန်တော်တို့အတွက် ပွဲကောင်းတစ်ခု မဖြစ်လာခဲ့ပါဘူး။ ပွဲထဲမှာလည်း ဘာမှမဖြစ်လာခဲ့ပါဘူး။ အကြိတ်အနယ်ယှဉ်ပြိုင်ရတဲ့ပွဲစဉ်တစ်ခု ဖြစ်ခဲ့ပြီး အခုထက်ပိုကောင်းတဲ့ အဆုံးသတ်တစ်ခုရရှိမယ့်အခွင့်အရေးလည်း ကျွန်တော်တို့အတွက် ရှိခဲ့ပါတယ်။ ဒါပေမယ့် အဆုံးသတ်ချိန်မှာတော့ အခုအတိုင်းပဲ ဖြစ်သွားခဲ့ပါတယ်။ ဒါက ဘောလုံးဖြစ်ပါတယ်။ ဒါမျိုးတွေ ဖြစ်လေ့ဖြစ်ထရှိပါတယ်။ ပြိုင်ဘက်ကို ဂုဏ်ပြုပြီး အခုပွဲစဉ်ရလဒ်ကို တည်တည်ငြိမ်ငြိမ်လက်ခံလိုက်ကြပါစို့။ ရှေ့ဆက်သွားကြမယ်”လို့ ပြောပါတယ်။