အာဆင်နယ်အသင်းအနေနဲ့ အခုဆောင်းဈေးကွက်မှာ ဝုဗ်စတား ကန်ဟာကိုခေါ်ယူဖို့ နော်တင်ဟမ် ၊ ဗီလာတို့နဲ့အားပြိုင်ရဖွယ်ရှိနေပါတယ်။ ဘရာဇီးသားကို အာဆင်နယ်အပြင် နော်တင်ဟမ် ၊ ချဲလ်ဆီး ၊ တော့တင်ဟမ် ၊ ယူနိုက်တက် နဲ့ ဗီလာတို့က စိတ်ဝင်စားနေပါတယ်။

သတင်းတွေအရ ကန်ဟာတစ်ယောက် အခုရာသီမှာ စွမ်းဆောင်ရည်ကောင်းတွေပြသနေပြီး ဝုဗ်အတွက် ၂၁ ပွဲမှာ ၁၀ ဂိုးသွင်း ၊ ၄ ဂိုးဖန်တီးထားနိုင်ခဲ့တာကြောင့် အသင်းတော်တော်များများက မျက်စိကျနေတယ်လို့ သိရပါတယ်။ ဗီလာကတော့ ကန်ဟာကို ကမ်းလှမ်းဖို့ ပြင်ဆင်နေပြီး လက်ရှိတိုက်စစ်မှူး ဒူရန်ကို ရောင်းထုတ်ဖို့ ပြင်ဆင်နေပါတယ်။

တကယ်လို့ ကန်ဟာကိုခေါ်ယူချင်တယ်ဆိုရင် ဗီလာအနေနဲ့ ဒူရန်ကို မဖြစ်မနေရောင်းချရမှာဖြစ်ပြီး ပီအက်စ်ဂျီ ၊ ရီးရဲလ် နဲ့ အယ်လ်နာဆာတို့က စိတ်ဝင်စားနေပါတယ်။ ထိပ်တန်းအသင်းအချို့က စိတ်ဝင်စားနေပေမယ့် ဝုဗ်ဘက်က သူတို့စတားကို အသင်းမှာဆက်ထိန်းချင်နေပြီး စာချုပ်သစ်ကမ်းလှမ်းထားပါတယ်။

ပါရဲရားရဲ့အသင်းဟာ တန်းဆင်းဇုန်အထက်မှာ ဂိုးကွာခြားချက်အသာနဲ့ရပ်တည်နေပြီး အခုညမှာ အာဆင်နယ်နဲ့ရင်ဆိုင်ရမှာဖြစ်ပါတယ်။