အာဆင်နယ်နည်းပြ မီကယ်အာတီတာက လာမယ့် ယနေ့ည ဆရာဟောင်း ပက် ဂွာဒီယိုလာရဲ့ မန်ချက်စတာစီးတီးနဲ့  ပွဲမတိုင်ခင် သူတို့နှစ်ယောက်ကြားမှာ အဆင်မပြေဖြစ်နေတယ်ဆိုတဲ့ သတင်းတွေကို ငြင်းဆိုလိုက်ပါတယ်။

ပြီးခဲ့တဲ့ စက်တင်ဘာလက တွေ့ဆုံမှုမှာ တင်းမာမှုတွေ မြင့်တက်ခဲ့ပြီး ၂-၂ သရေကျခဲ့တဲ့ပွဲမှာ စီးတီးက အာဆင်နယ်ကို ညစ်ပတ်တဲ့နည်းလမ်းတွေ အသုံးပြုတယ်လို့ စွပ်စွဲခဲ့ပြီး ရိုဒရီလည်း ပြင်းထန်စွာ ဒဏ်ရာရရှိခဲ့ပါတယ်။  လီယန်ဒရို ထရိုဆက်အတွက် အငြင်းပွားဖွယ် အနီကတ်နဲ့ အာလင်း ဟာလန်းနဲ့ ဂါဘရီရယ်မာဂယ်ဟေးစ်တို့ကြား အပြန်အလှန် အငြင်းအခုံတွေလည်း ဖြစ်ပွားခဲ့ပါတယ်။ 

အာတီတာက မန်စီးတီးမှာ လေးနှစ်ကြာနေထိုင်ခဲ့တဲ့အတွက် "သတင်းအချက်အလက်အားလုံး" ရှိတယ်ဆိုတဲ့ မှတ်ချက်ဟာလည်း ဂွာဒီယိုလာနဲ့ လူသိရှင်ကြား အပြန်အလှန် ပြောဆိုမှုတွေ ဖြစ်ပေါ်စေခဲ့ပါတယ်။ ဒါပေမယ့် အာတီတာက သောကြာနေ့မှာ နည်းပြနှစ်ဦးကြားက ပြဿနာတွေဟာ အတိတ်မှာပဲ ရှိတော့ကြောင်း အခိုင်အမာ ပြောကြားခဲ့ပါတယ်။ 

အာတီတာက"ကျွန်တော် လေးနှစ်ကြာအောင် အဲဒီမှာ ရှိခဲ့တာကြောင့် သူတို့ ဘယ်လောက် ယှဉ်ပြိုင်လိုစိတ် ပြင်းထန်တယ်ဆိုတာကို သိပါတယ်။ သူတို့ အနိုင်ရပြီး ထပ်အနိုင်ရနေကြပါတယ်။ အဲဒါကိုပဲ ကျွန်တော် ဆိုလိုတာပါ။
ပြဿနာတစ်ခုရှိရင် ကျွန်တော်တို့ ဖုန်းနဲ့ စာတိုတွေ ပို့ပြီး ပြောနေမှာ မဟုတ်ပါဘူး။ မဟုတ်ရင် အဲဒီလို ဖြစ်လာမှာ မဟုတ်ပါဘူး"လို့ ပြောခဲ့ပါတယ်။

ဂွာဒီယိုလာကလည်း အာတီတာရဲ့ သတင်းစာရှင်းလင်းပွဲ မစတင်မီ နာရီပိုင်းအလိုမှာ သူတို့ရဲ့ ဆက်ဆံရေးဟာ "ထူးခြားကောင်းမွန်ပါတယ်" လို့ ပြောကြားခဲ့ပါတယ်။ အာတီတာကလည်း နှစ်သင်းကြားက သဘာဝကျတဲ့ ယှဉ်ပြိုင်မှုဖြစ်ကြောင်း အလေးပေးပြောကြားခဲ့ပါတယ်။ "ပုံမှန်ပါ။ အနိုင်ရဖို့ ကြိုးစားနေတဲ့ နှစ်သင်းပါ။ ကွင်းထဲမှာ ဖြစ်ပျက်တဲ့ ဘာကိုမှ ကျွန်တော် ပုဂ္ဂိုလ်ရေးအရ မယူပါဘူး။ ကစားသမားဘဝကတည်းက အဲဒီလိုပါပဲ။ စိတ်ခံစားမှုတွေနဲ့ ပြည့်နှက်နေပါတယ်။ ကျွန်တော်တို့ ဆက်သွားရုံပါပဲ" လို့ သူက ပြောပါတယ်။