အာဆင်နယ်နောက်ခံလူ ရီကာဒိုကာလာဖီအိုရီဟာ အီတလီလက်ရွေးစင်အသင်းနဲ့အတူ ဂျာမနီနဲ့ နေးရှင်းလိဂ် ကွာတားဖိုင်နယ်ပွဲ ကစားရင်း ဒူးဒဏ်ရာ ရသွားလို့ အသင်းကနေ နုတ်ထွက်လိုက်ရပါတယ်။ အသက် ၂၂ နှစ်အရွယ် ကစားသမားဟာ မီလန်မှာ ကစားတဲ့ ပွဲစဉ်ပြီးခါနီးမှာ ဘယ်ဒူး ထိခိုက်သွားတာလို့ အီတလီ ဘောလုံးအဖွဲ့ချုပ်က ပြောပါတယ်။ ပွဲပြီးခါနီး အချိန်ပိုမှာ ကစားနေရင်း လှည့်လိုက်တဲ့အချိန် ချော်လဲပြီး ဒဏ်ရာရသွားတာပါ။ ဒါကြောင့် ကွင်းထဲမှာပဲ ဆေးကုသမှု ခံယူခဲ့ရပါတယ်။

အီတလီအသင်းကလည်း "ကာလာဖီအိုရီရဲ့ ဒဏ်ရာကို ဒီမနက်မှာ  စစ်ဆေးပြီးပါပြီ။ တနင်္ဂနွေနေ့ ဒေါ့မွန်မှာ ကစားမယ့် ဒုတိယအကျော့ပွဲကို ပါဝင်နိုင်မှာ မဟုတ်တော့ဘဲ ကလပ်အသင်းကိုပဲ ပြန်တော့မှာပါ" လို့ ထုတ်ပြန်ထားပါတယ်။ ကာလာဖီအိုရီဟာ ပြီးခဲ့တဲ့ နွေရာသီကမှ ဘိုလော့ဂ်နာကနေ အာဆင်နယ်ကို ပြောင်းလာတာပါ။ အာဆင်နယ်မှာ ကစားတဲ့ ပထမဆုံးရာသီမှာတင် အခုလို  ဒဏ်ရာပြဿနာတွေကြုံနေရတာပါ။ အရင်ကလည်း ဒူးဒဏ်ရာကြောင့် ၉ ပွဲလောက် လွဲခဲ့ဖူးပါတယ်။

အခုလို အရေးကြီးတဲ့ပွဲတွေ နီးလာချိန်မှာ ဒဏ်ရာရသွားတာ အာဆင်နယ်နည်းပြ အာတီတာအတွက်တော့ ခေါင်းခဲစရာပါပဲ။ အာဆင်နယ်ဟာ ဧပြီ ၁ ရက်မှာ ဖူလ်ဟမ်နဲ့ ပရီးမီးယားလိဂ်ပွဲ ကစားရမှာပါ။ အဲ့ဒီနောက် တစ်ပတ်လောက်အကြာမှာ ရီးရဲလ်မက်ဒရစ်နဲ့ ချန်ပီယံလိဂ် ကွာတားဖိုင်နယ် ပထမအကျော့ ကစားရဦးမှာပါ။ အာဆင်နယ်မှာ အခုလည်း ဒဏ်ရာပြဿနာတွေ ရှိနေတာပါ။ ကိုင်ဟားဗက်ဇ်နဲ့ဂါဘရီရယ် ဂျီးဆပ်တို့ကတော့ ရာသီကုန်အထိ မကစားနိုင်တော့ပါဘူး။ ဒါပေမယ့် ဆာကာကတော့ ရီးရဲလ်မက်ဒရစ်နဲ့ ချန်ပီယံလိဂ်ပွဲမှာ ပြန်ပါနိုင်ဖို့ မျှော်လင့်ရပါတယ်။