ဝုဗ်ကြယ်ပွင့် မားသီးယက်စ်ကွန်ဟာက သူဟာ ကြီးမားတဲ့ခြေလှမ်းတွေအတွက် အဆင်သင့်ဖြစ်နေတာကြောင့် ရာသီကုန်မှာ အသင်းမှ ထွက်ခွာပြီး ထိပ်သီးကလပ်တစ်ခုခုသို့ ပြောင်းရွှေ့လိုကြောင်း ဖွင့်ဟပြောကြားလာခဲ့ပါတယ်။ ပြီးခဲ့တဲ့ဇန်နဝါရီအပြောင်းအရွှေ့ကာလမှာ ကွန်ဟာကို အာဆင်နယ်အသင်းက စိတ်ဝင်စားနေတယ်လို့ သတင်းတွေထွက်ပေါ်ခဲ့ပေမယ့် ကစားသမားကတော့ ဝုဗ်နဲ့သာ စာချုပ်သစ်ချုပ်ဆိုခဲ့တာဖြစ်ပါတယ်။ လက်ရှိအချိန်မှာတော့ ကွန်ဟာရဲ့စာချုပ်ဖျက်သိမ်းကြေးဟာ ပေါင် ၆၂ သန်းအထိတန်ကြေးရှိနေတယ်လို့ သိရပါတယ်။ 

ယခုအခါမှာ ကစားသမားက ဝုဗ်ကနေထွက်ခွာလိုကြောင်း တရားဝင်ထုတ်ဖော်ပြောကြားလာတာကြောင့် သူ့ကိုစောင့်ကြည့်နေတဲ့ ပရီးမီးယားလိဂ်ထိပ်သီးကလပ်တွေဖြစ်တဲ့ အာဆင်နယ်၊ လီဗာပူးနဲ့ ချဲလ်ဆီးတို့ဟာ ကမ်းလှမ်းမှုတွေ စတင်ပြုလုပ်လာဖွယ်ရှိပါတယ်။ 

ပြီးခဲ့တဲ့ ဇန်နဝါရီအပြောင်းအရွှေ့ကာလအတွင်းမှာ ဝုဗ်ဟာ ပရီးမီးယားလိဂ်ရဲ့ တန်းဆင်းဇုန်ထဲမှာရောက်နေခဲ့ပေမယ့် ယခုအခါမှာတော့ အဆင့် ၁၇ နေရာမှာရပ်တည်ထားနိုင်ကာ အဆင့် ၁၈ နေရာက အစ်ဆွစ်ချ်ကို ၉ မှတ်အထိဖြတ်တောက်ထားနိုင်ပါတယ်။ ဒါကြောင့် ဝုဗ်အတွက် ပရီးမီးယားလိဂ် ၂၆ ပွဲကစားပြီး ၁၃ ဂိုးအထိသွင်းယူထားတဲ့ ကွန်ဟာအနေနဲ့ အသင်းကနေထွက်ခွာဖို့ ဆုံးဖြတ်ထားတယ်လို့ဆိုပါတယ်။

ကစားသမားက "ကျွန်တော့်ကို ကမ်းလှမ်းလာတဲ့အသင်းတွေရှိပါတယ်။ ဒါပေမယ့် အဲဒီအချိန်မှာ အသင်းကနေထွက်ခွာလိုက်ရင် ကျွန်တော် နေလို့ကောင်းမှာမဟုတ်ပါဘူး။ ထွက်ခွာဖို့ဆန္ဒရှိခဲ့ပေမယ့် ရာသီအလယ်မှာတော့ မထွက်ခွာချင်ခဲ့ပါဘူး။ အသင်းကလည်း အဲဒီတုန်းက တန်းဆင်းဇုန်ထဲမှာ ရုန်းကန်နေခဲ့ရတာပါ"

"အခုချိန်မှာတော့ ကျွန်တော်တို့ရဲ့ပန်းတိုင်ဖြစ်တဲ့ ပရီးမီးယားလိဂ်မှာ ဆက်လက်ကျန်ရှိဖို့ နီးစပ်နေပါပြီ။ ကျွန်တော့်အနေနဲ့လည်း ခြေလှမ်းကြီးကြီးလှမ်းဖို့ စိတ်ကိုပြင်ဆင်ထားပြီးပါပြီ။ ကျွန်တော်ဆုဖလားတွေနဲ့ ကြီးမားတဲ့အောင်မြင်မှုတွေအတွက် တိုက်ပွဲဝင်ချင်ပါတယ်။ ကျွန်တော့်ရဲ့စိတ်ဓာတ်ကလည်း အဆင်သင့်ဖြစ်နေပါပြီ" လို့ပြောကြားခဲ့ပါတယ်။ 

လာမယ့်ဗုဒ္ဓဟူးနေ့မှာတော့ ဝုဗ်ဟာ ဝက်စ်ဟမ်းနဲ့ယှဉ်ပြိုင်သွားရမှာဖြစ်ပြီး ကွန်ဟာကတော့ ရာသီကုန်မှာ ဘယ်အသင်းသို့ပြောင်းရွှေ့မလဲဆိုတာ ရှင်းရှင်းလင်းလင်းမသိရှိရသေးပါဘူး။ ဒါပေမယ့် ကစားသမားဟာ နောက်ရာသီ ဝုဗ်မှာတော့ ဆက်လက်နေထိုင်ဖို့ စဉ်းစားထားခြင်းမရှိဘူးလို့သိရပါတယ်။