အစ်ဆွစ်တောင်းကို ၄-၁ ဂိုးဖြင့် အနိုင်ယူခဲ့တဲ့ပွဲစဉ်မှာ သူ့အသင်းရဲ့စွမ်းဆောင်ရည်ပိုင်းဟာ ပြီးပြည့်စုံလုနီးပါးအခြေအနေအထိ ဖြစ်မြောက်ခဲ့တယ်လို့ လီဗာပူးအသင်းနည်းပြအန်းစလော့က သတ်မှတ်ခဲ့ပါတယ်။

ဆိုဘိုဆလိုင်း၊ မိုဆာလက်နဲ့ ဂတ်ပို(၂ ဂိုး)တို့ရဲ့သွင်းဂိုးတွေက အန်ဖီးလ်မှာ လီဗာပူးအသင်း နိုင်ပွဲရရှိစေခဲ့ပြီး ပရီးမီးယားလိဂ်အမှတ်ပေးဇယားကို တစ်ပွဲလျော့ကစား၊ ခြောက်မှတ်အသာဖြင့် ဆက်လက်ဦးဆောင်နိုင်အောင် ကူညီပေးခဲ့ပါတယ်။ ပွဲစဉ်အပြီး အန်းစလော့က “ကျွန်တော်တို့တွေ စိတ်အားထက်သန်မှုအပြည့်နဲ့ ပြိုင်ဘက်ကို လွှမ်းမိုးကစားနိုင်ခဲ့ပါတယ်။ ၈၅ မိနစ်အထိ အစ်ဆွစ်က ကျွန်တော်တို့အသင်းကွင်းဘက်ခြမ်းဆီ ရောက်ရှိလာဖို့တောင် အခက်တွေ့နေခဲ့ပါတယ်။ ဒါပေမယ့် သူတို့မှာရှိနေတဲ့ တောင်ပံတိုက်စစ်ကစားသမားကောင်းတွေနဲ့အတူ တန်ပြန်တိုက်စစ်ခြိမ်းခြောက်မှုတစ်ခုတော့ လုပ်နိုင်ခဲ့ပါတယ်။ ဒါကိုလည်း ကျွန်တော်တို့တွေ ကောင်းကောင်းထိန်းချုပ်နိုင်ခဲ့ပါတယ်။ 

အမှန်ပါပဲ၊ ထောင့်ကန်ဘောတစ်ကြိမ်ပေးလိုက်ရမှုမှတဆင့် ချေပဂိုးတစ်ဂိုးပေးလိုက်ရလို့ ကျွန်တော်တို့တွေ စိတ်ပျက်ခဲ့ရပါတယ်။ ဒါပေမယ့် ခံစစ်ပိတ်ကစားနေတဲ့ ပြိုင်ဘက်နဲ့ရင်ဆိုင်ရချိန် ပြီးပြည့်စုံလုနီးပါး စွမ်းဆောင်ရည်မျိုးကို ၈၅ မိနစ်အထိ ပြသနိုင်ခဲ့ပါတယ်။ အဲ့ဒီ ၈၅ မိနစ်တာကာလကတော့ တကယ့်ကို ကောင်းလွန်းခဲ့ပါတယ်”လို့ ပြောပါတယ်။

အခုပွဲစဉ်မှာ အဖွင့်ဂိုးရှင်ဆိုဘိုဆလိုင်းအပါအဝင် လီဗာပူးကစားသမားတွေက အထင်ကြီးလောက်စရာ တစ်ဦးချင်းစွမ်းဆောင်ရည်ကောင်းတွေကို ချပြသွားနိုင်ခဲ့ပါတယ်။ ဟန်ဂေရီသားရဲ့စွမ်းဆောင်ရည်ပိုင်းနဲ့ပတ်သက်လို့ အန်းစလော့က “ဆိုဘိုဆလိုင်းကို အသေးစိတ်ကြည့်ရှုထားမယ်ဆိုရင် ရာသီအစပိုင်းလောက်မှာ သူက အခုလိုအခွင့်အရေးမျိုးကို ကိုယ်တိုင်မကန်သွင်းဘဲ မိုဆာလက်ဆီပဲ ဖန်တီးပေးသွားပါလိမ့်မယ်။ ဒီလိုဖန်တီးမှုအများစုကိုလည်း မိုဆာလက်က ဂိုးအဖြစ်ပြောင်းလဲပေးနိုင်ခဲ့တာကြောင့် အရမ်းကောင်းတဲ့ရွေးချယ်မှုတစ်ခု ဖြစ်ပါလိမ့်မယ်။ ဒါပေမယ့် အခုအချိန်မှာတော့ ဆိုဘိုဆလိုင်းက ကိုယ်တိုင်ကန်သွင်းယူဖို့အတွက်ပဲ ဆုံးဖြတ်ပြီး ကိုယ်တိုင် ဂိုးသွင်းယူခဲ့ပါတယ်။

ကျွန်တော့်အမြင်အရ သူ့ကို လျှော့တွက်ကြလွန်းလို့ အခုလို ဂိုးသွင်းယူနိုင်ခဲ့မှုက သူ့အတွက် ကောင်းပါတယ်။ အဲ့ဒီလို လျှော့တွက်သူတွေထဲမှာ ကျွန်တော် မပါဝင်ပါဘူး။ ဆိုဘိုဆလိုင်းက ချီးကျူးအသိအမှတ်ပြုမှုတွေကို အမြဲတမ်းမရရှိခဲ့ပါဘူး။ သူ့ရဲ့လုပ်အားနှုန်းက မယုံကြည်နိုင်စရာကောင်းလွန်းတာကြောင့် အသင်းအတွက် အလွန်အရေးကြီးတဲ့ကစားသမားတစ်ဦး ဖြစ်ပါတယ်။ သူကိုယ်တိုင်လည်း အမြင့်ဆုံးပုံစံမျိုးနဲ့အတူ ပြေးလွှားကစားပေးနေပါတယ်။ ဒါက ဆုဖလားတိုင်းကို စိန်ခေါ်ချင်တဲ့ အသင်းတစ်ခုအတွက်ဆိုရင်  အလွန်အရေးကြီးပါတယ်”လို့ ပြောပါတယ်။

ဒါ့အပြင် မက်ကင်နာရဲ့အသင်းနဲ့ရင်ဆိုင်ရတဲ့ပွဲစဉ်မှာ လီဗာပူးကစားသမားဘဝပွဲစဉ် ၃၀၀ ပြည့်မြောက်ခဲ့တဲ့ အသင်းကပ္ပတိန်ဗန်ဒိုက်ကိုလည်း အန်းစလော့က ချီးကျူးဂုဏ်ပြုခဲ့ပါတယ်။ အန်းစလော့က “ ဗန်ဒိုက်က အသင်းဆီကို အလွန်အပေါင်းလက္ခဏာဆောင်တဲ့အရာတွေ အများကြီးသယ်ဆောင်လာပေးသူတစ်ဦး ဖြစ်ပါတယ်။ ခံစစ်မှတဆင့် ဘောလုံးကို သယ်ယူပေးတာ၊ ခုခံကာကွယ်တာနဲ့ တည်ငြိမ်မှုဆိုတဲ့အပိုင်းတွေမှာပေါ့။ သူက အသင်းရဲ့ခေါင်းဆောင်တစ်ဦးဆိုတာ သေချာပါတယ်။ ကျွန်တော်ကိုယ်တိုင်လည်း သူတို့ဟာ ခေါင်းဆောင်တစ်ဦးဖြစ်ပါတယ်လို့ ပြောနိုင်တဲ့ ကစားသမားတွေနဲ့ အလုပ်တွဲမလုပ်ခဲ့ဖူးပါဘူး။ ဒါပေမယ့် ဗန်ဒိုက်ကတော့ အဲ့ဒီလိုကစားသမားမျိုးပဲ ဖြစ်ပါတယ်။

ကွင်းတွင်းမှာသာမက လေ့ကျင့်ရေးကွင်းမှာပါ ဗန်ဒိုက်က အသံအကျယ်ဆုံးကစားသမားတစ်ဦး ဖြစ်ပါတယ်။ သူက စံနမူနာပြကစားသမားအဖြစ် ဦးဆောင်မှုပေးသလို ကောင်းမွန်တဲ့ဘောလုံးရာသီတစ်ခုကိုလည်း ပိုင်ဆိုင်နေပါပြီ”လို့ ပြောပါတယ်။