မန်ချက်စတာယူနိုက်တက်မှ ထွက်ခွာပြီး ရီးရဲလ်ဘက်တစ်သို့အငှားစာချုပ်နဲ့ပြောင်းရွှေ့ကစားနေတဲ့ တောင်ပံကြယ်ပွင့် အန်တိုနီဟာ ရာသီကုန်မှာ အိုးလ်ထရက်ဖို့ဒ်သို့ပြန်လာရမှာဖြစ်ပေမယ့် စပိန်မြေမှာပဲ နောက်ထပ်တစ်ရာသီ ဆက်လက်နေထိုင်လိုတယ်လို့ သတင်းတွေကဖော်ပြလာခဲ့ပါတယ်။ 

ဒါကြောင့် ယူနိုက်တက်အနေနဲ့ ကစားသမားရဲ့အနာဂတ်နဲ့ပတ်သက်ပြီး ရီးရဲလ်ဘက်တစ်နဲ့ ဆွေးနွေးမှုတွေပြုလုပ်သွားဖို့လိုအပ်နေပါတယ်။ အန်တိုနီက မန်နူရယ်ပယ်လီဂရီနီရဲ့လက်အောက်မှာ ဆက်လက်နေထိုင်လိုနေသလို၊ ရီးရဲလ်ဘက်တစ်ကလည်း ကစားသမားကို အသင်းမှာ ဆက်လက်ထားရှိချင်ပေမယ့်  ဖြေရှင်းဖို့လိုအပ်နေတဲ့ကိစ္စတွေကျန်ရှိနေပါသေးတယ်။ 

ယူနိုက်တက်ဟာ အသင်းနဲ့ ၂၀၂၇ ခုနှစ်မှာ စာချုပ်သက်တမ်းကုန်ဆုံးမယ့် အန်တိုနီကို နောက်တစ်ရာသီအငှားချလိုခြင်းမရှိဘဲ အပြီးသတ်ရောင်းချနိုင်ဖို့ရည်ရွယ်ထားပေမယ့် ဘရာဇီးသားရဲ့လစာအနည်းအကျဉ်းကိုသာပေးချေနိုင်တဲ့ ရီးရဲလ်ဘက်တစ်ကတော့ ခေါ်ယူနိုင်ဖွယ်မရှိပါဘူး။ ဒါ့အပြင် လက်ရှိအချိန်မှာ စပိန်ကလပ်ဟာ အန်တိုနီရဲ့လစာကို အပြည့်အဝပေးချေနိုင်ဖို့အတွက်ပင် ရုန်းကန်သွားရဖို့ရှိနေတာဖြစ်ပါတယ်။ 

ဇန်နဝါရီအပြောင်းအရွှေ့ကာလမှာ စပိန်မြေသို့ပြောင်းရွှေ့လာခဲ့တဲ့ အန်တိုနီဟာ ရီးရဲလ်ဘက်တစ်အတွက် ပြိုင်ပွဲစုံ ၁၁ ပွဲကစားထားရာမှာ ၄ ဂိုသွင်းပြီး၊ ဂိုးဖန်တီးမှု ၂ ကြိမ်အထိပြုလုပ်ထားကာ ထိပ်တန်းခြေစွမ်းကို ပြသထားနိုင်ပါတယ်။ ရီးရဲလ်ဘက်တစ် စီအီးအို ရာမွန်အာလာကွန်ကလည်း အန်တိုနီက အသင်းမှာနောက်ထပ်တစ်နှစ်ဆက်လက်နေထိုင်လိုတယ်လို့ သူ့ကိုပြောထားတယ်လို့ဆိုပါတယ်။ 

ဖေဖော်ဝါရီမှာ ရီးရဲလ်ဘက်တစ်အတွက်စတင်ပွဲထွက်ကစားခဲ့တဲ့ အန်တိုနီဟာ ၂ လအတွင်း အသင်းအတွက် ဂိုးရနိုင်ခြေ အခွင့်အရေး ၁၇ ကြိမ်အထိဖန်တီးထားနိုင်ပြီး အဆိုပါပမာဏဟာ ဘယ်လာလီဂါကစားသမားမထက်ဆို သာလွန်တဲ့စွမ်းဆောင်ရည်ဖြစ်တယ်လို့သိရပါတယ်။ 

အန်တိုနီအနေနဲ့ သူ့ရဲ့အထင်ကြီးစရာခြေစွမ်းကို ရာသီကုန်အထိ ဆက်လက်ထိန်းသိမ်းသွားဖို့ကြိုးစားရမှာဖြစ်ပြီး လက်ရှိအချိန် လာလီဂါအမှတ်ပေးဇယားရဲ့ အဆင့် ၆ နေရာမှာရပ်တည်နေတဲ့ ရီးရဲလ်ဘက်တစ်ကလည်း ဘရာဇီးသားကို အပြီးသတ်ခေါ်ယူနိုင်ဖို့ ချန်ပီယံလိဂ်ဝင်ခွင့်ရအောင်ကြိုးစားပြီး ဘဏ္ဍာငွေရှာဖွေသွားနိုင်ဖို့လိုအပ်ပါတယ်။