အန်တိုနီက ဥရောပလိဂ် ပထမဆုံးပွဲစဉ်မှာ နောတင်ဟမ် ဖောရက်စ်အသင်းနဲ့ ပွဲစဉ်မှာ သရေရလဒ် ထွက်ပေါ်ခဲ့ပြီးနောက် “ကျွန်တော့် ခန္ဓာကိုယ်က အကောင်းဆုံးအခြေအနေမှာ မရှိသေးဘူး” လို့ ထုတ်ဖော်ပြောကြားခဲ့ပါတယ်။

အန်တိုနီဟာ ရီးရဲလ် ဘက်တစ်အသင်းအတွက် ဥရောပလိဂ် ပထမဆုံးပွဲစဉ်မှာ ပွဲထွက်ကစားခွင့်ရခဲ့ပြီး တစ်ဂိုးသွင်းယူပေးခဲ့သလို တစ်ဂိုးလည်း ဖန်တီးပေးခဲ့ပါတယ်။ ပွဲအပြီးမှာ ဘရာဇီးတောင်ပံကစားသမားဟာ Movistar Plus သတင်းဌာနနဲ့ တွေ့ဆုံခဲ့ပါတယ်။ “ကျွန်တော် ပင်ပန်းနေပါတယ်။ ဒါက ကျွန်တော့်အတွက် အရမ်းခက်ခဲခဲ့ပါတယ်၊ ဘာလို့လဲဆိုတော့ လွန်ခဲ့တဲ့ လအနည်းငယ်က ရာသီကြို လေ့ကျင့်ရေး မရခဲ့ပါဘူး၊ အသင်းနဲ့အတူ နှစ်ပတ်၊ သုံးပတ်ပဲ လေ့ကျင့်နိုင်ခဲ့ပါတယ်။ အခုတော့ ကျွန်တော် ပိုကောင်းလာပါပြီ၊ ဒါပေမဲ့ နောက်ထပ် နည်းနည်းတော့ လိုအပ်နေပါသေးတယ်” လို့ အန်တိုနီက ဝန်ခံခဲ့ပါတယ်။

ပွဲစဉ် သရေရလဒ်ထွက်ပေါ်ခဲ့တဲ့အပေါ် အန်တိုနီကတော့ လက်လွှတ်ခဲ့ရတဲ့ အခွင့်အရေးတစ်ခုအဖြစ် မြင်နေပါတယ်။ “ရိုးရိုးသားသားပြောရရင် ကျွန်တော် နည်းနည်းတော့ ဝမ်းနည်းမိပါတယ်” လို့ အန်တိုနီက ဆိုပါတယ်။ “အိမ်ကွင်းမှာ ပရိသတ်တွေနဲ့အတူ ကျွန်တော်တို့ ၃ မှတ်ကို လိုချင်ခဲ့ပါတယ်၊ ဒါပေမဲ့ ဒီပွဲကို မေ့ထားရပါမယ်။ ဘာလို့လဲဆိုတော့ တနင်္ဂနွေနေ့မှာ ကာ အိုဆာဆူနာအသင်းနဲ့ လာ ကာတူဟာကွင်းမှာ နောက်ထပ်ပွဲစဉ်တစ်ခု ရှိနေလို့ပါ” လို့ အန်တိုနီက ပြောကြားခဲ့ပါတယ်။

ဘရာဇီးကစားသမားကတော့ သူ့ကိုယ်သူ ဝေဖန်ခဲ့ပါတယ်။ “ကျွန်တော်တို့ ပိုပြီးသတိရှိရပါမယ်။ ဒါက အာရုံစူးစိုက်မှု နည်းနည်းနည်းသွားတာပါ။ ကျွန်တော်တို့ အရင်ဂိုးသွင်းခဲ့ပြီး တူညီတဲ့ အရှိန်အဟုန်ကို ထိန်းထားနိုင်ရပါမယ်။ အဲဒါက နည်းနည်းကျဆင်းသွားခဲ့ပါတယ်” လို့ အန်တိုနီက ပြောကြားခဲ့ပါတယ်။

အန်တိုနီဟာ ပြိုင်ဘက်အသင်းကိုလည်း ချီးကျူးခဲ့ပါသေးတယ်။ “နောတင်ဟမ် ဖောရက်စ်က ကောင်းမွန်တဲ့ အသင်းတစ်သင်းဖြစ်ပြီး အရှိန်အဟုန်အရမ်းကောင်းပါတယ်။ အဆုံးသတ်မှာတော့ အိမ်ကွင်းမှာ တစ်မှတ်ရရှိတာ ကောင်းတဲ့အချက်ပါ” လို့ အန်တိုနီက ဆိုပါတယ်။

အန်တိုနီအတွက်တော့ သူ့ရဲ့မိသားစုက အရေးအကြီးဆုံးအရာတစ်ခုပါပဲ။ “ဒါက စိတ်သက်သာရာရမှုပါ။ ကျွန်တော် ဒီနေ့မှာ ကျွန်တော့်အစ်ကိုနဲ့ စကားပြောခဲ့ပါတယ်။ သူက ကျွန်တော် ဂိုးသွင်းလိမ့်မယ်လို့ ပြောကြားခဲ့ပါတယ်။ ကျွန်တော် ဂိုးသွင်းနိုင်ခဲ့လို့ ပျော်ပါတယ်၊ ဒါပေမဲ့ သရေဖြစ်ခဲ့လို့တော့ နည်းနည်းဝမ်းနည်းမိပါတယ်” လို့ ဘက်တစ်တိုက်စစ်မှူးက ဝန်ခံခဲ့ပါတယ်။