လိဒ်ရဲ့အိမ်ကွင်းက ခက်ခဲတဲ့အခြေအနေကို အကောင်းဆုံးရင်ဆိုင်ကြဖို့ လူငယ်ကစားသမားတွေကို သတိပေးလိုက်တဲ့ အာမိုရင်
မန်ချက်စတာယူနိုက်တက်နည်းပြ ရူဘင်အာမိုရင်က တနင်္ဂနွေနေ့မှာ ကစားမယ့် လိဒ်ယူနိုက်တက်နဲ့ပွဲမှာ လူငယ်ကစားသမားလေးတွေကို ထည့်သုံးဖို့ ရှိနေပြီး၊ လိဒ်ကွင်းရဲ့ ကြောက်စရာကောင်းတဲ့ ပရိသတ်လေထုနဲ့ အငွေ့အသက်ကို ကြံ့ကြံ့ခံနိုင်ဖို့ မှာကြားလာခဲ့ပါတယ်။
သောကြာနေ့ကပြုလုပ်ခဲ့တဲ့ သတင်းစာရှင်းလင်းပွဲမှာ ပေါ်တူဂီသားနည်းပြက "ကျွန်တော်တို့ အဘက်ဘက်က ကြည့်နေပါတယ်။ ဒါပေမဲ့ သူတို့ (လူငယ်တွေ) အနေနဲ့ အသင့်ဖြစ်နေဖို့ လိုတယ်။ လက်ရှိ လူစာရင်းကို ကြည့်ရင် ကျွန်တော်တို့မှာ မရှိတဲ့ ကစားသမားတွေကို ဆွဲဆန့်ပြီး အသုံးပြုလို့မရတဲ့ အခြေအနေမှာ ရှိနေပါတယ်။"
"ဒီလို အခြေအနေတွေကို ရင်ဆိုင်နိုင်မယ့် အသင်းတစ်သင်းဖြစ်အောင် ကျွန်တော် ကြိုးစားစုဖွဲ့သွားမှာပါ။ ပွဲကို သေချာဖတ်ပြီး သူတို့ကို ကူညီပေးနိုင်ဖို့ ဘာလုပ်သင့်သလဲဆိုတာကိုလည်း ကျွန်တော် ကြိုးစားသွားမှာပါ။" "သူတို့ အသင့်ဖြစ်နေရပါမယ်။ ဒါဟာ ရန်လိုမှုတွေရှိတဲ့ ဝန်းကျင်မှာ ကစားရမယ့် ပွဲစဉ်တစ်ခုပါ၊ ဒါပေမဲ့ သူတို့ အသင့်ဖြစ်နေဖို့ လိုပါတယ်။ ဒါကို သူတို့ တွေ့ကြုံခံစားကြည့်ဖို့ လိုအပ်ပါတယ်။ ဝါရင့်ကစားသမားတွေအတွက်တောင် ခက်ခဲမယ့်ပွဲမျိုး ဖြစ်ပေမဲ့ ကျွန်တော်တို့ ဒါမျိုးတွေကို ကြုံဖူးပြီးသားပါ။"
"ပြီးခဲ့တဲ့နှစ်က ဘီလ်ဘာအို ကွင်းမှာတုန်းက အသံတွေနဲ့ ကြုံခဲ့ရဖူးတာမို့ အဲဒီလို ခံစားချက်မျိုးက လုံးဝကွဲပြားခြားနားတယ်ဆိုတာ ကျွန်တော် သိပါတယ်။ ဒါပေမဲ့ သူတို့တွေ အသင့်ဖြစ်နေဖို့တော့ လိုပါတယ်။" လို့ပြောကြားခဲ့ပါတယ်။
