ပြီးခဲ့တဲ့သီတင်းပတ်ကုန်၊ ချဲလ်ဆီးနဲ့ပွဲစဉ်မှာ ဆုတ်ယုတ်မှုတွေ ရှိခဲ့ပြီးနောက် ဘရန့်ဖို့ဒ်နဲ့ရင်ဆိုင်ရချိန် မှန်ကန်တဲ့ တုံ့ပြန်မှုကို ပြသခဲ့တဲ့ သူ့ရဲ့အသင်းကို မြင်ရခြင်းအတွက် မန်စီးတီးနောက်ခံလူအကန်ဂျီ အားရကျေနပ်နေပါတယ်။

လွန်ခဲ့တဲ့စနေနေ့၊ လီဗာပူးနဲ့ အာဆင်နယ်တို့ သက်သောင့်သက်သာနိုင်ပွဲရယူနေချိန် မန်စီးတီးကတော့ အီတီဟတ်ကွင်းမှာ ပိုချက်တီနိုရဲ့အသင်းနဲ့ တစ်ဖက်တစ်ဂိုးစီ သရေသာ ကစားနိုင်ခဲ့ပါတယ်။ ဒါကြောင့် မန်စီးတီးက အင်္ဂါညပိုင်း၊ ဘရန့်ဖို့ဒ်နဲ့ ရင်ဆိုင်ရချိန် နိုင်ပွဲရယူဖို့ လိုအပ်ခဲ့ပြီး ဟာလန်းရဲ့တစ်လုံးတည်းသော သွင်းဂိုးဖြင့် လိုအပ်နေတဲ့အနိုင်သုံးမှတ်ကို ရှာဖွေခဲ့ပါတယ်။

ဒီနိုင်ပွဲကြောင့် အာဆင်နယ်ရဲ့အဆင့်-၂ နေရာကို မန်စီးတီးက ပြန်လည်သိမ်းပိုက်နိုင်ခဲ့သလို အမှတ်ပေးဇယားဦးဆောင်သူ လီဗာပူးကိုလည်း တစ်မှတ်အကွာဖြင့် ဖိအားပေးနိုင်ခဲ့ပါတယ်။ ပွဲစဉ်အပြီးမှာတော့ အကန်ဂျီက အခုသီတင်းပတ်ကြားရက်အတွင်း အပြုသဘောဆောင်တဲ့ တုံ့ပြန်မှုတစ်ခု ရယူနိုင်ဖို့ မန်စီးတီးအတွက် ဘယ်လောက်အထိ အရေးပါခဲ့သလဲဆိုတာ သတင်းမီဒီယာတွေဆီ ပြောပြခဲ့ပါတယ်။

သူက “ဟုတ်ပါတယ်၊ အနိုင်ရဖို့ အရေးကြီးပါတယ်။ အထူးသဖြင့် ပြီးခဲ့တဲ့သီတင်းပတ်ကုန်ပွဲစဉ်အလွန်ကာလမျိုးမှာပေါ့။
ကျွန်တော်တို့ တုံ့ပြန်မှုတစ်ခု ပြသရမယ်ဆိုတာကို သိထားခဲ့ပြီး ဒီနေ့လုပ်နိုင်ခဲ့တယ်လို့ ထင်ပါတယ်။ အလုပ်ကို ဆက်ကြိုးစားသွားပြီး တစ်ပွဲပြီးတစ်ပွဲ တိုးတက်လာအောင် လုပ်သွားရပါမယ်”လို့ ရှင်းပြပါတယ်။

လက်ရှိပရီးမီးယားလိဂ်ဘောလုံးရာသီအဆုံးသတ်နိုင်ဖို့ ၁၃ ပွဲသာ ကစားရန် ကျန်ရှိပါတော့တယ်။ အထူးသဖြင့် မန်စီးတီးက အမှတ်ပေးချန်ပီယံပြိုင်ဘက် နှစ်သင်းလုံးနဲ့ ကစားရဖို့ ရှိနေသေးလို့ ဘောလုံးရာသီပိတ်သိမ်းမယ့် မေလမတိုင်ခင် အလှည့်အပြောင်းတွေ မြင်တွေ့ရနိုင်ပါတယ်။