ဆန်းဒါးလန်းနည်းပြလီဘရစ်စ်က အာဆင်နယ်ကို ၀-၂ ဂိုးဖြင့် ရှုံးနိမ့်ခဲ့တဲ့ စနေနေ့ပရီးမီးယားလိဂ်ပွဲစဉ်မှာ ပြိုင်ဘက်ကို သူ့ရဲ့အသင်း ရင်ပေါင်တန်းယှဉ်ပြိုင်ကစားနိုင်ခဲ့တယ်လို့ ယုံကြည်နေပါတယ်။

အလင်းရောင်ကွင်းကြီးရဲ့ ဒုတိယပိုင်းပွဲချိန်အတွင်း အာဆင်နယ်အတွက် အဖွင့်ဂိုးကို နယူးကာဆယ်ကွင်းလယ်ကစားသမားဟောင်းဘရူနိုဂူမာယေးစ်က သွင်းယူခဲ့ပြီးနောက် နာကျင်အချိန်ပိုမှာ ဆာကာအပေါ် ရီနယ်လ်ဒို ကစားပုံကြမ်းတမ်းခဲ့မှုကြောင့် ပြိုင်ဘက်ကစားသမားအတွက် နှစ်ဝါတစ်နီပြစ်ဒဏ်နဲ့အတူ ဂန်းနားတွေ ပယ်နယ်တီကန်ခွင့် ရရှိခဲ့ပါတယ်။ ဒီပင်နယ်တီကို ဆာကာက အမှားအယွင်းမရှိ အဆုံးသတ်ပြီး အာဆင်နယ်အတွက် ဒုတိယမြောက်ဦးဆောင်ဂိုးကို သွင်းယူခဲ့ပါတယ်။
 
အခုနိုင်ပွဲနဲ့အတူ အာဆင်နယ်က ၂၀၂၆-၂၀၂၇ ဘောလုံးရာသီ၊ ပရီးမီးယားလိဂ်ပြိုင်ပွဲမှာ ရာနှုန်းပြည့်နိုင်ပွဲဆက်စံချိန်ကို ဆက်လက်ထိန်းသိမ်းထားနိုင်ခဲ့ပါတယ်။
 
ပွဲစဉ်အပြီး BBC Match of the Day နဲ့ တွေ့ဆုံချိန် လီဘရစ်စ်က ရှုံးနိမ့်ခဲ့ပေမဲ့ သူ့အသင်းရဲ့ စွမ်းဆောင်ရည်အပေါ် ကျေနပ်မိတယ်လို့ ပြောကြားခဲ့ပါတယ်။
 
ဆန်းဒါးလန်းနည်းပြက "စိတ်ပျက်စရာရလဒ်ပါပဲ။ ဒါပေမဲ့ ဒုတိယပိုင်းမှာ ကောင်းမွန်တဲ့ ပွဲစဉ်တစ်ခု ဖြစ်ခဲ့ပါတယ်။ ကျွန်တော်တို့က သူတို့နဲ့ ရင်ပေါင်တန်းကစားနိုင်ခဲ့တယ်လို့ ထင်ပါတယ်။ အာဆင်နယ်ဆိုတာ အခုအချိန်မှာ အလွန်အရှိန်အဟုန်ကောင်းနေတဲ့ အသင်းတစ်ခုပါ" လို့ ပြောပါတယ်။
 
"ကျွန်တော်တို့ ဂိုးသွင်းဖို့အခွင့်အရေး ရခဲ့သလို ဂိုးကန်သွင်းခွင့်နဲ့လည်း ထိုက်တန်ခဲ့ပါတယ်။ ဒါပေမဲ့ ဂိုးမသွင်းနိုင်ခဲ့ဘဲ စက္ကန့် ၃၀ အကြာမှာတင် ဂိုးပြန်ပေးလိုက်ရပါတယ်။ ဒါကတော့ အဆင့်အတန်းကွာခြားချက်ပါပဲ။ ပြိုင်ဘက်ကတော့ တကယ့်ကို အလျှော့မပေးတဲ့အသင်းလို့ ထင်ပါတယ်။ ကိုယ့်ရဲ့အခွင့်အရေးတွေကို အမိအရမဆုပ်ကိုင်နိုင်ရင် အခက်တွေ့သွားပါလိမ့်မယ်"
 
"ပထမပိုင်းမှာတော့ သူတို့ရဲ့ခြိမ်းခြောက်နိုင်စွမ်းနဲ့ ကစားဟန်ကို သိထားလို့ ကျွန်တော်တို့ အနည်းငယ်ထိန်းပြီး သတိပြုကစားခဲ့ပါတယ်။ သူတို့က ခံစစ်ကို ဘယ်လိုဒုက္ခပေးနိုင်မလဲဆိုတာသိထားလို့ စနစ်တကျပြင်ဆင်ခဲ့ပေမဲ့ ပထမပိုင်းအပြီးမှာတော့ ဘောလုံးရရှိထားချိန် ကိုယ့်ရဲ့အရည်အသွေးကို ပြသဖို့ အရေးကြီးတယ်ဆိုတာ သဘောတူခဲ့ကြပါတယ်"
 
"ဒါကြောင့် တခါတရံ အဝေးဘောပေးပို့မှုတွေနဲ့ ကစားသလို အခွင့်အရေးပေးလာတဲ့ အခြေအနေတွေမှာ အနီးကပ်တွဲလုံးတွေနဲ့ စနစ်တကျကစားပြီး အခွင့်အရေးတွေ ဖန်တီးနိုင်ခဲ့ပါတယ်"
 
"ဂိုးသမားဒေးဗစ်ရာယာက ဒီနေ့၊ ကွင်းတွင်းမှာ အကောင်းဆုံးကစားသမားတွေအနက် တစ်ဦး ဖြစ်ခဲ့ပါတယ်။ ဒါက ကျွန်တော်တို့ ခြိမ်းခြောက်နိုင်ခဲ့ပေမဲ့ ဂိုးသွင်းဖို့အထိတော့ မလုံလောက်ခဲ့ဘူးဆိုတာ ပြသနေပါတယ်။ ကျွန်တော်တို့အတွက် အလွန်နီးစပ်ခဲ့ပါတယ်။ အနိုင်ရရှိဖို့ဆိုတာ လုပ်ငန်းစဉ်တစ်ခုပါ။ သူတို့ကတော့ အခုအချိန်မှာ အမြင့်မားဆုံးအဆင့်အတန်းမှာ ရှိနေကြပါတယ်"
 
"ဒီပွဲစဉ်မှာ ကျွန်တော်တို့အတွက် ရလဒ်ကောင်းဖို့ နီးစပ်ခဲ့ပေမဲ့ မလုံလောက်ခဲ့ပါဘူး။ ဒါပမေဲ့ ကျွန်တော်တို့အသင်းနဲ့ ကျွန်တော်တို့အသင်းပရိသတ်တွေအတွက် ကောင်းမွန်တဲ့ အတွေ့အကြုံတစ်ခု ဖြစ်ခဲ့ပါတယ်။ ကျွန်တော်တို့တွေ တစ်ပွဲပြီးတစ်ပွဲ ပိုမိုတိုးတက်လာနေပါတယ်။ ဒါကို ဒီရှုံးနိမ့်မှုကြောင့် လက်ခံရခက်ပေမဲ့ ရှေ့ဆက်သွားရပါလိမ့်မယ်"
 
"ကျွန်တော်တို့အတွက် ယုံကြည်ချက်ထားရှိဖို့ လိုအပ်ပြီး ဒါက ကျဉ်းမြောင်းတဲ့ကွာဟချက်တွေရဲ့မေးခွန်းပါပဲ။ အဲ့ဒီလိုကျဉ်းမြောင်းတဲ့ကွာဟချက်လေးတွေကို ပိုကောင်းလာအောင် လုပ်ဖို့ဆိုတာ ခက်ခဲပါတယ်။ ဘာကြောင့်လဲဆိုတော့ ဒါက ရာနှုန်းပြည့်ဖြစ်လာဖို့အတွက် နောက်ဆုံးစမ်းသပ်ချက်ဖြစ်ပြီး ဒီလိုရလဒ်ထွက်ပေါ်လာအောင် အပြင်းအထန်ကြိုးစားအားထုတ်သွားရပါလိမ့်မယ်"
 
"ကျွန်တော်တို့အတွက် ကောင်းမွန်တဲ့အခြေအနေတစ်ခုမှာ ရှိနေပါတယ်။ လာမယ့်သီတင်းပတ်မှာတော့ တကယ့်ကိုအရေးကြီးတဲ့ အခိုက်အတန့်တွေ ရှိနေပြီး အခုအခြေအနေကို မြန်မြန်ဆန်ဆန် ကျော်ဖြတ်ဖို့ အရေးကြီးပါတယ်" လို့ ဆိုပါတယ်။