ခရစ္စတယ်ပဲလေ့စ်အသင်းဟာ ရာသီသစ်မတိုင်ခင် သူတို့ရဲ့ ခံစစ်ပိုင်းကို အားဖြည့်ဖို့အတွက် အရှိန်မြှင့် ကြိုးပမ်းနေပြီး ဘရက်စ်အသင်းရဲ့ ခံစစ်မှူး ရာဖေးလ် လီဂွမ်နဲ့ ပုဂ္ဂိုလ်ရေးဆိုင်ရာ သဘောတူညီမှု ရရှိသွားပြီလို့ သတင်းတွေအရ သိရပါတယ်။

အသက် ၁၉ နှစ်အရွယ် ကစားသမားလေးဟာ ပရီးမီးယားလိဂ်ပြိုင်ဘက် ချယ်လ်ဆီးအသင်းဆီကို ယူရို သန်း ၆၀ ဝန်းကျင်နဲ့ ပြောင်းရွှေ့ဖို့ ရှိနေတဲ့ မက်ဆန့်စ် လာခရွိုင်းစ်ရဲ့ နေရာမှာ အစားထိုးဖို့ ဖြစ်လာနိုင်ဖွယ်ရှိသူလည်း ဖြစ်ပါတယ်။

ဘရက်စ်အကယ်ဒမီထွက် ကစားသမားတစ်ဦးဖြစ်တဲ့ လီဂွမ်ဟာ ပြီးခဲ့တဲ့ နွေရာသီက လန်းစ်အသင်းကို ၃-၁ နဲ့ ရှုံးနိမ့်ခဲ့တဲ့ အဝေးကွင်းပွဲစဉ်မှာ လူစားလဲ ဝင်ရောက်ကစားရင်း ပရော်ဖက်ရှင်နယ် ကစားသမားဘဝကို စတင်ခဲ့တာပါ။

အဲ့ဒီနောက်မှာတော့ သူဟာ အော်ဇေးအသင်းနဲ့ပွဲမှာ ပါဝင်ကစားခဲ့ပြီး ဧပြီလအတွင်းက ပဲရစ်အက်ဖ်စီနဲ့ ပွဲစဉ်မှာတော့ ပထမဆုံးအကြိမ် စီနီယာအသင်းအတွက် ပွဲထွက်လူစာရင်းမှာ ပါဝင်ခွင့် ရရှိခဲ့ပါတယ်။ ပြင်သစ်သတင်းစာ L’Equipe ရဲ့ ဖော်ပြချက်အရ လီဂွမ်ဟာ အဲ့ဒီပွဲစဉ်မှာ အထင်ကြီးစရာ ခြေစွမ်းပြနိုင်ခဲ့တာကြောင့် ပီအက်စ်ဂျီ၊ စထရာဘိုးတို့နဲ့ ပွဲစဉ်တွေမှာ ပုံမှန်ပွဲထွက်ခွင့်ရသူတစ်ဦးအဖြစ် ခြေကုပ်ယူနိုင်ခဲ့တာ ဖြစ်ပါတယ်။

ပရော်ဖက်ရှင်နယ်ပွဲစဉ် ၆ ပွဲသာ ကစားထားရသေးပေမဲ့ ဒီလူငယ်ကစားသမားလေးဟာ သူ့ရဲ့ အလားအလာတွေအပေါ် ပဲလေ့စ်အသင်းက ယုံကြည်လာအောင် လုံလောက်တဲ့ စွမ်းဆောင်ရည်မျိုး ပြသနိုင်ခဲ့တယ်လို့ သိရပါတယ်။