ဝက်စ်ဟမ်းအသင်းရဲ့ တောင်ပံကစားသမား ခရစ္စန်စီယို ဆမ်းမားဗီးလ်ကို ခေါ်ယူဖို့အတွက် ပရီးမီးယားလိဂ်အသင်းတော်တော်များများနဲ့အတူ အေစီမီလန်အသင်းကလည်း စိတ်ဝင်စားနေတယ်လို့ သတင်းတွေအရ သိရပါတယ်။

ဝက်စ်ဟမ်းအသင်း ပရီးမီးယားလိဂ်ကနေ တန်းဆင်းသွားရပြီးနောက်မှာ အသင်းကနေ ထွက်ခွာဖို့ ရှိနေတဲ့ ကစားသမားတွေထဲမှာ အသက် ၂၄ နှစ်အရွယ်ရှိ ဆမ်းမားဗီးလ်လည်း တစ်ဦးအပါအဝင် ဖြစ်ပါတယ်။

ဆမ်းမားဗီးလ်ဟာ အရှေ့လန်ဒန်ကလပ် ဝက်စ်ဟမ်းအတွက် ပြီးခဲ့တဲ့ရာသီ ၃၅ ပွဲမှာ ၇ ဂိုးသွင်း၊ ဂိုးဖန်တီးမှု ၃ ကြိမ် ပြုလုပ်နိုင်ခဲ့ပြီး အသင်းအတွက် ခြေစွမ်းပြနိုင်ခဲ့သူတစ်ဦးလည်း ဖြစ်ပါတယ်။

TeamTalk ရဲ့ ဖော်ပြချက်အရ အေစီမီလန်ဟာ အလုပ်ရှုပ်မယ့် လာမယ့်နွေရာသီ အပြောင်းအရွှေ့ကာလမှာ ဒီဒတ်ချ်တောင်ပံကစားသမားကို အီတလီမြေဆီ ခေါ်ဆောင်သွားနိုင်ဖို့ မျှော်လင့်နေပါတယ်။

ဒါပေမဲ့ ဆမ်းမားဗီးလ်ကိုတော့ စပါးနဲ့ အက်စတွန်ဗီလာတို့လို ပရီးမီးယားလိဂ်ကလပ်တွေကလည်း စိတ်ဝင်စားနေတာကြောင့် အေစီမီလန်အနေနဲ့ အပြိုင်အဆိုင် ကြိုးစားရမှာပဲ ဖြစ်ပါတယ်။