ကမ္ဘာ့ဖလားပြိုင်ပွဲ မတိုင်ခင်မှာ မန်ချက်စတာစီးတီး အသင်းနဲ့ ရိုဒရီတို့ရဲ့ အနာဂတ်ဟာ မသေမချာ ဖြစ်နေပါတယ်။

ဘလွန်းဒီအောဆုရှင် ကွင်းလယ်လူဟာ အီတီဟတ်ကွင်းမှာ စာချုပ်သက်တမ်း နောက်ဆုံးနှစ်ထဲကို ရောက်ရှိတော့မှာဖြစ်ပြီး ကမ္ဘာ့ဖလားပြီးမှသာ သူ့ရဲ့အနာဂတ်အကြောင်းကို ဆုံးဖြတ်သွားမယ်လို့ အရိပ်အမြွက် ပြောကြားထားပါတယ်။

ရီးရဲလ်မက်ဒရစ်အသင်းက သူ့ရဲ့အခြေအနေကို ဆက်လက်စောင့်ကြည့်နေဆဲဖြစ်သလို အသင်းဥက္ကဋ္ဌလောင်း အင်းနရစ် ရီကွယ်လ်မီကလည်း ဖလော်ရန်တီနို ပီရက်ဇ်ကို အနိုင်ရပြီး ဥက္ကဋ္ဌဖြစ်လာခဲ့ရင် ဒီစပိန်လက်ရွေးစင်ကစားသမားကို ခေါ်ယူချင်တယ်လို့ ပြောဆိုထားပါတယ်။

သတင်းတွေအရ ရိုဒရီဟာ လက်ရှိကမ်းလှမ်းထားတာထက် ပိုမိုများပြားတဲ့ လုပ်ခလစာကို လိုချင်နေတာဖြစ်ပြီး သူ့ရဲ့ကိုယ်စားလှယ်တွေကလည်း ကမ္ဘာ့အကောင်းဆုံး ကွင်းလယ်ခံစစ်ကစားသမားတစ်ဦးရဲ့ ဂုဏ်ပုဒ်နဲ့ ထိုက်တန်တဲ့ စာချုပ်အမျိုးအစားကို ရရှိဖို့ တွန်းအားပေးနေကြပါတယ်။

Manchester Evening News သတင်းထောက် ဆိုင်မွန် ဘာဂျော့စကီးကတော့ ကစားသမားရဲ့ အခြေအနေကို ရှင်းလင်းပြောကြားထားပြီး မန်စီးတီးအသင်းအနေနဲ့ ကမ္ဘာ့ဖလားအပြီး နောက်ရာသီမှာလည်း ရိုဒရီကို အသင်းရဲ့ အမာခံကစားသမားအဖြစ် ဆက်လက်ထားရှိဖို့ မျှော်လင့်နေတယ်လို့ ဆိုပါတယ်။

ဒီလကုန်မှာ အသက် ၃၀ ပြည့်တော့မယ့် ရိုဒရီဟာ ကမ္ဘာ့ထိပ်တန်းအဆင့်မှာ နောက်ထပ်နှစ်အနည်းငယ်လောက်အထိ ဆက်လက်ခြေစွမ်းပြနိုင်ဦးမှာဖြစ်ပြီး မန်စီးတီးကတော့ သူ့ကို ရီးရဲလ်မက်ဒရစ်ဆီ အရောက်မခံဘဲ အီတီဟတ်မှာပဲ ဆက်ရှိနေစေချင်တာပါ။

ဒါပေမဲ့ ဒီရည်မှန်းချက် အောင်မြင်ဖို့အတွက်ဆိုရင်တော့ အသင်းဘက်က ကမ်းလှမ်းထားတဲ့ ပမာဏနဲ့ ကစားသမားဘက်က တောင်းဆိုထားတဲ့ ပမာဏကြားက ကွာဟချက်ကို အမြန်ဆုံး ညှိနှိုင်းဖြေရှင်းသွားဖို့ လိုအပ်နေပါတယ်။