အယ်ကလက်စီကိုပွဲစဉ်မတိုင်ခင် အဝတ်လဲခန်းပြဿနာတွေရဲ့ဗဟိုချက်ဖြစ်လာတဲ့ အမ်ဘာပေနဲ့ ရူဒီဂါ
လာမယ့်အယ်ကလက်စီကိုပွဲစဉ်မတိုင်ခင် ရီးရဲလ်မက်ဒရစ်အသင်းရဲ့စည်းလုံးမှုကို ထိခိုက်စေတဲ့ သီးခြားပြဿနာတွေ ဖြစ်ပေါ်လာခဲ့ပြီးနောက် အမ်ဘာပေနဲ့ ရူဒီဂါတို့က အသင်းအတွင်း မငြိမ်မသက်မှုတွေရဲ့ အဓိကဗဟိုချက် ဖြစ်လာနေပါတယ်။
ပြိုင်ဘက်ဘာစီလိုနာအသင်းနဲ့ကစားရမယ့် အရေးကြီးအယ်ကလက်စီကိုဒါဘီပွဲကြီး နီးကပ်လာချိန် အခုလိုအချင်းများမှုတွေ ပေါ်ပေါက်လာလို့ အခြေအနေက အတော်လေးအကဲဆတ်နေပါတယ်။
ပြီးခဲ့တဲ့ဧပြီလအတွင်း ဘိုင်ယန်မြူးနစ်ကို ရှုံးနိမ့်ကာ ချန်ပီယံလိဂ်မှ ထွက်ခဲ့ရလို့ စိတ်ပျက်စရာတွေ ရှိနေချိန် ဂျာမနီလက်ရွေးစင်ရူဒီဂါက လေ့ကျင့်ရေးကွင်းအတွင်း အသင်းဖော်တစ်ဦးနဲ့ အချင်းများခဲ့ရာမှတဆင့် တင်းမာမှုတွေ စတင်ဖြစ်ပေါ်ခဲ့တယ်လို့ သိရပါတယ်။
အဲဒီနောက်မှာ သူက ပြန်လည်တောင်းပန်ခဲ့ပြီး အသင်းသားတွေကို နေ့လယ်စာကျွေးမွေးကာ ဆက်ဆံရေး ပြန်လည်ကောင်းမွန်အောင် ကြိုးစားခဲ့ပေမဲ့ ဒီဖြစ်ရပ်ရဲ့အရိပ်ဆိုးတွေ အသင်းအတွင်းမှာ ကျန်ရှိနေဆဲ ဖြစ်ပါတယ်။
တစ်ဖက်မှာလည်း ပြင်သစ်ကြယ်ပွင့်အမ်ဘာပေက လေ့ကျင့်ရေးကွင်းအတွင်း လူကျွံဘောဆုံးဖြတ်ချက်တစ်ခုကို ဒေါသတကြီးတုံ့ပြန်ခဲ့ရာ အာဘီလိုအာရဲ့နည်းပြအဖွဲ့ဝင်တစ်ဦးနဲ့ အချင်းများခဲ့ပြီး အသင်းအတွင်း တင်းမာမှုတွေနဲ့ပတ်သက်လို့ စိုးရိမ်ပူပန်မှုတွေကို ပိုမိုမြင့်တက်စေခဲ့ပါတယ်။
လက်ရှိမှာတော့ ရီးရဲလ်မက်ဒရစ်အသင်းက စပိန်လာလီဂါ ၃၄ ပွဲကစား၊ ၇၇ မှတ်ဖြင့် အမှတ်ပေးဇယားဒုတိယနေရာမှာ ရှိနေပါတယ်။
