ချဲလ်ဆီးတောင်ပံကစားသမားဟောင်း ရှောင်ရိုက်ဖိလစ်က အနောက်လန်ဒန်မှာ ရုန်းကန်နေရတဲ့ အလက်ဟန်ဒရို ဂါနာချိုရဲ့ အခြေအနေနဲ့ ပတ်သက်ပြီး ပြောဆိုလာပါတယ်။

အာဂျင်တီးနား တောင်ပံကစားသမားဟာ ပြီးခဲ့တဲ့ နွေရာသီက မန်ချက်စတာယူနိုက်တက်ကနေ စတန်းဖို့ဒ်ဘရစ်ချ်ကို ပြောင်းရွှေ့လာခဲ့ပြီးနောက်ပိုင်း အခုထိ ခြေစွမ်းပြနိုင်ခြင်း မရှိသေးပါဘူး။

ယာယီနည်းပြ ကလမ်မက်ဖာလိန်းက ပြီးခဲ့တဲ့ တနင်္ဂနွေနေ့ လိဒ်ယူနိုက်တက်နဲ့ပွဲမှာ သူ့ကို ယုံကြည်မှုရှိရှိ ထည့်သွင်းကစားစေခဲ့ပေမဲ့ ဒါဟာ ကိုးလ်ပါးလ်မား မပါနိုင်လို့သာ ဖြစ်တယ်လို့ သတင်းတွေက ဆိုပါတယ်။

အသက် ၂၁ နှစ်အရွယ် ကစားသမားအပေါ် ပရိသတ်တွေကြားမှာ အမြင်အမျိုးမျိုး ကွဲပြားနေကြပြီး အခုအခါမှာတော့ ရှောင်ရိုက်ဖိလစ်က Sky Bet နဲ့ အင်တာဗျူးမှာ ဂါနာချိုအနေနဲ့ ချယ်လ်ဆီးမှာ အောင်မြင်ချင်ရင် ဒါမှမဟုတ် နွေရာသီမှာ အသင်းကနေ မရောင်းထုတ်ခံရဖို့ဆိုရင် စိတ်နေစိတ်ထား ပြောင်းလဲဖို့ လိုအပ်တယ်လို့ ပြောကြားခဲ့ပါတယ်။

"သူ့ရဲ့ မာနကို နည်းနည်းလောက် ထိန်းချုပ်ဖို့ လိုမယ်လို့ ကျွန်တော် ခံစားရပါတယ်။ ဘာဖြစ်လို့လဲဆိုတော့ ပရီးမီးယားလိဂ်မှာ ရာသီဝက် ဒါမှမဟုတ် တစ်ရာသီလောက် ကောင်းပြရုံနဲ့ မလုံလောက်ပါဘူး။ အသင်းကြီးတွေက ဝယ်ချင်လောက်တဲ့ အဆင့်မှာ ရှိနေဖို့ဆိုရင် ခြေစွမ်းက အမြဲတမ်း တည်ငြိမ်နေဖို့ လိုပါတယ်" လို့ သူက ဆိုပါတယ်။

"တစ်ခါတလေ ဂိုးသွင်းနိုင်တာက ပြဿနာမရှိပေမဲ့ ချဲလ်ဆီးပရိသတ်တွေရဲ့ သဘာဝကို ကျွန်တော် သိပါတယ်။ သူတို့က ကစားသမားတစ်ယောက်ဆီကနေ ၁၁၀ ရာခိုင်နှုန်း အပြည့်အဝ ကြိုးစားအားထုတ်မှုကို အနည်းဆုံး မျှော်လင့်ထားကြတာပါ။ အသင်းရဲ့ အမှတ်တံဆိပ်အတွက် အဲဒီလောက်အထိ အားသွန်ခွန်စိုက် ကစားပေးတာကို မြင်ရရင် ပရိသတ်တွေကလည်း အပြည့်အဝ ဝန်းရံပေးကြမှာပါ"

"ဒါက နည်းဗျူဟာပိုင်းကြောင့်လား ဒါမှမဟုတ် သူကိုယ်တိုင် မပျော်ရွှင်တာလားဆိုတာ ကျွန်တော် မသိပါဘူး။ ဒါပေမဲ့ အသင်းမှာ တောင်ပံကစားသမား ၆ ယောက်၊ ၇ ယောက်လောက် ရှိနေတာမို့ တစ်ခုခုတော့ လုပ်ပြဖို့ လိုပါလိမ့်မယ်။ ဘာလို့လဲဆိုတော့ (ဂျေမီ) ဂစ်တန်စ်လို ကစားသမားမျိုးက ဘယ်အချိန်မှာမဆို ခြေစွမ်းတွေ ပေါက်ကွဲလာနိုင်လို့ပါ"

တောင်အမေရိကရဲ့ ထိပ်သီးကလပ် ရေးဗားပလိတ်အသင်းက ဂါနာချိုကို ခေါ်ယူဖို့ စိတ်ဝင်စားနေတယ်လို့ သိရပါတယ်။ အခုအခါ ပါးလ်မား ပြန်လာပြီဖြစ်တဲ့အတွက် တနင်္လာနေ့မှာ ကစားမယ့် နော့တမ်ဟမ်ဖောရက်စ်နဲ့ပွဲမှာလည်း ဂါနာချို ပါဝင်ကစားရဖို့ မသေချာတော့ပါဘူး။

ဒါပေမဲ့ နွေရာသီမှာ နည်းပြသစ် ရောက်လာတော့မှာဖြစ်လို့ ချဲလ်ဆီးမှာ အစပိုင်း ရုန်းကန်နေရတဲ့ ဂါနာချိုအနေနဲ့ သူ့ရဲ့အရည်အချင်းကို သက်သေပြဖို့ အခွင့်အရေးတွေ ထပ်ရလာနိုင်ပါသေးတယ်။