မန်ချက်စတာယူနိုက်တက်အသင်းဟာ လာမယ့်တနင်္လာနေ့မှာ ကစားမယ့် ဘရန့်ဖို့ဒ်နဲ့ပွဲစဉ်အတွက် သူတို့ရဲ့ အင်္ကျီစပွန်ဆာကို ပြောင်းလဲသွားဖို့ ရှိနေပါတယ်။ "နီရဲတဲ့မာရ်နတ်တွေ" ဟာ လက်ရှိ ပရီးမီးယားလိဂ်အဆင့် ၃ နေရာမှာ ရပ်တည်နေပြီး အဆင့် ၆ က ဘရိုက်တန်ထက် ၈ မှတ်အသာ၊ လက်ကျန်တစ်ပွဲလည်း ကျန်ရှိနေတဲ့အခြေအနေနဲ့ ချန်ပီယံလိဂ်ဝင်ခွင့်ရဖို့ ကြိုးပမ်းနေတာဖြစ်ပါတယ်။ တနင်္လာနေ့ည အိုးထရက်ဖို့ဒ်မှာ ကစားမယ့် ဘရန့်ဖို့ဒ်နဲ့ပွဲမှာ အနိုင်ရခဲ့ရင် နောက်ရာသီ ချန်ပီယံလိဂ်ဝင်ခွင့်ကို အပိုင်ရရှိသွားမှာဖြစ်သလို ယာယီနည်းပြ မိုက်ကယ်ကားရစ်အတွက်လည်း အမြဲတမ်းနည်းပြရာထူး ရရှိဖို့ အခွင့်အရေးကောင်းတစ်ခု ဖြစ်လာနိုင်ပါတယ်။

ဒါပေမဲ့ ဒီပွဲမှာ ကားရစ်ရဲ့အသင်းဟာ ၂၀၂၄ ခုနှစ်ကတည်းက စပွန်ဆာပေးခဲ့တဲ့ ပုံမှန် Snapdragon စပွန်ဆာအစား (RED) လို့ အမည်ရတဲ့ အထူးထုတ်စပွန်ဆာပါဝင်တဲ့ အင်္ကျီတွေကို ဝတ်ဆင်ပြီး ကွင်းထဲကို ဆင်းလာမှာ ဖြစ်ပါတယ်။ (RED) ဟာ အေအိုင်ဒီအက်စ် (AIDS) အပါအဝင် ကျန်းမာရေးဆိုင်ရာ ကိစ္စရပ်တွေကို တိုက်ဖျက်ဖို့ ရန်ပုံငွေရှာဖွေပေးနေတဲ့ အဖွဲ့အစည်းဖြစ်ပြီး အခုအချိန်အထိ ကမ္ဘာလုံးဆိုင်ရာ ရန်ပုံငွေအတွက် ပေါင် ၅၉၀ သန်းကျော် ရှာဖွေပေးနိုင်ခဲ့သလို လူပေါင်း ၃၅၀ သန်းကျော်ကိုလည်း ကူညီပေးနိုင်ခဲ့ပါတယ်။

MatchWornShirt ရဲ့ တွဲဖက်တည်ထောင်သူ Tijmen Zonderwijk က "ဒီအင်္ကျီတွေဟာ ဘောလုံးလောကရဲ့ အကောင်းဆုံးအရာတွေကို ကိုယ်စားပြုပါတယ်။ ကွင်းထဲက အခိုက်အတန့်တွေကို ကွင်းပြင်ပမှာ အဓိပ္ပာယ်ရှိတဲ့ အကျိုးသက်ရောက်မှုတွေအဖြစ် ပြောင်းလဲပေးလိုက်တာပါ။ ပရိသတ်တွေကို သူတို့ချစ်တဲ့ ဘောလုံးအားကစားနဲ့ ပိုမိုနီးစပ်စေသလိုပဲ ဒီစိတ်အားထက်သန်မှုတွေကို ပိုမိုကြီးမားတဲ့အရာအဖြစ် ပြောင်းလဲပြီး ကမ္ဘာတစ်ဝှမ်းက အသက်ကယ်တင်ပေးနေတဲ့ ကျန်းမာရေးအစီအစဉ်တွေအတွက် အရေးပါတဲ့ ရန်ပုံငွေနဲ့ အသိပညာပေးမှုတွေကို လုပ်ဆောင်ပေးသွားမှာပါ" လို့ ပြောကြားခဲ့ပါတယ်။

(RED) ရဲ့ စီမံခန့်ခွဲမှုဒါရိုက်တာ Kate Charles ကလည်း "ဒီပူးပေါင်းဆောင်ရွက်မှုဟာ အားကစားရဲ့ စွမ်းအားကို လက်တွေ့အကျိုးသက်ရောက်မှုရှိအောင် ဘယ်လိုပြောင်းလဲနိုင်တယ်ဆိုတာ ပြသနေတာပါ။ အင်္ကျီတစ်ထည်ချင်းစီတိုင်းမှာ ကွင်းအတွင်းက အကြောင်းအရာတွေ ရှိနေသလို လိုအပ်ချက် အရှိဆုံးနေရာတွေမှာ အသက်ကယ်တင်ပေးမယ့် ကမ္ဘာလုံးဆိုင်ရာ ကျန်းမာရေးအစီအစဉ်တွေအတွက်လည်း ရန်ပုံငွေ ရှာဖွေပေးနိုင်မှာဖြစ်ပါတယ်" လို့ ဆိုပါတယ်။ အင်္ဂလန်ချန်ပီယံ ၂၀ ကြိမ်ရ ယူနိုက်တက်အသင်းဟာ ပြီးခဲ့တဲ့ပွဲမှာ ချယ်လ်ဆီးအသင်းကို အဝေးကွင်းမှာ အနိုင်ရပြီး အဖိုးတန် ၃ မှတ် ရယူနိုင်ခဲ့တာကြောင့် သူတို့ကို တဖြည်းဖြည်း အမှီလိုက်လာတဲ့ လီဗာပူးအသင်းကို ဖြတ်ကျော်ထားနိုင်ဖို့ဆိုရင် ဘရန့်ဖို့ဒ်ကို မဖြစ်မနေ ထပ်မံအနိုင်ယူရဦးမှာပဲ ဖြစ်ပါတယ်။