ဒဏ်ရာကနေ ပြန်လာနိုင်ခဲ့ပေမဲ့ ခံစားချက်အမျိုးမျိုး ဖြစ်ပေါ်နေတယ်လို့ နယူးကာဆယ်အသင်းခေါင်းဆောင် ဂီမာရေးစ် ဝန်ခံ
နယူးကာဆယ်အသင်းခေါင်းဆောင် ဘရူနိုဂီမာရေးစ်ဟာ ပြီးခဲ့တဲ့စနေနေ့က ဘုန်းမောက်အသင်းကို ရှုံးနိမ့်ခဲ့တဲ့ပွဲမှာ ဒဏ်ရာကနေ ပြန်လည်ကစားနိုင်ခဲ့ပေမဲ့ ခံစားချက်အမျိုးမျိုး ဖြစ်ပေါ်နေတယ်လို့ ဝန်ခံပြောကြားလိုက်ပါတယ်။ ဒီကွင်းလယ်လူဟာ ပြင်းထန်တဲ့ ပေါင်နောက်ကြောဒဏ်ရာ (Hamstring Injury) ကြောင့် လအတော်ကြာ အနားယူခဲ့ရပြီးမှ အခုပွဲမှာ ပြန်လည်ပါဝင်လာခဲ့တာပါ။ စိန့်ဂျိမ်းစ်ပါ့ခ်ကွင်းမှာ ၂ ဂိုး - ၁ ဂိုးနဲ့ ရှုံးနိမ့်ခဲ့တဲ့ပွဲအပြီး ဂီမာရေးစ်က သူ့ရဲ့ လူမှုကွန်ရက်စာမျက်နှာကတစ်ဆင့် "အခုချိန်မှာ ခံစားချက်တွေ အများကြီးဖြစ်ပေါ်နေပါတယ်။ ၁၀ ပတ်နီးပါးလောက် အနားယူခဲ့ရပြီးနောက် အခုလို ပြန်ကစားခွင့်ရခဲ့လို့ ဝမ်းသာပါတယ်။ ကျွန်တော့်ရဲ့ ပြန်လည်သန်စွမ်းရေးလုပ်ငန်းစဉ်မှာ ကူညီပေးခဲ့ကြတဲ့သူအားလုံးကို ချွင်းချက်မရှိ ကျေးဇူးတင်ပါတယ်။ ကျွန်တော့်ကစားသမားဘဝရဲ့ အခက်ခဲဆုံးအချိန်တွေထဲက တစ်ခုကို ဖြတ်သန်းခဲ့ရပေမဲ့ ဘုရားသခင်ရဲ့ကျေးဇူးကြောင့် အခုဆိုရင် ပြန်လာနိုင်ခဲ့ပြီး ရှေ့ဆက်ဖို့ အဆင်သင့်ဖြစ်နေပါပြီ။ လက်ရှိမှာ အသင်းကြုံတွေ့နေရတဲ့ အခြေအနေအပေါ် စိတ်မကောင်းဖြစ်မိပါတယ်။ ကျွန်တော်တို့ အတူတူရှိခဲ့တဲ့ ငါးနှစ်နီးပါးကာလအတွင်းမှာ ဒါဟာ ပထမဆုံးအကြိမ်အဖြစ် အခက်ခဲဆုံးအချိန်ကို ကြုံနေရတာလို့ ထင်ပါတယ်။ ဒီလိုအချိန်မျိုးကို ကျော်ဖြတ်နိုင်မယ့် တစ်ခုတည်းသောနည်းလမ်းကတော့ ငြိမ်ငြိမ်သက်သက်နဲ့ ပိုပြီးတော့ ကြိုးစားအားထုတ်သွားဖို့ပါပဲ။ ဒီ ၁၀ ပတ်အတွင်း အားပေးစကားတွေ ပေးပို့ခဲ့ကြတဲ့သူအားလုံးကိုလည်း ကျေးဇူးတင်ပါတယ်။ အားလုံးရဲ့ အားပေးမှုတွေဟာ ကျွန်တော့်ကို အမြန်ဆုံးပြန်လည်ကောင်းမွန်လာစေဖို့ ခွန်အားတွေပေးခဲ့တာ အမှန်ပါပဲ" လို့ ရေးသားဖော်ပြခဲ့ပါတယ်။
