အဲဗာတန်အသင်းက ၃၇ နှစ်မြောက် ဟေးလ်ဘရော့ (Hillsborough) ဖြစ်ရပ် အထိမ်းအမှတ်အဖြစ် ၎င်းတို့ရဲ့ဟေးလ်ဒစ်ကင်ဆန် (Hill Dickinson) ကွင်းသစ်မှာ အမြဲတမ်းအောက်မေ့ဖွယ်အခမ်းအနားတစ်ခုကို ဗုဒ္ဓဟူးနေ့မှာ ဖွင့်လှစ်ခဲ့ပါတယ်။ ဒါက ၁၉၈၉ ခုနှစ် ဖြစ်ရပ်ဆိုးအတွင်း သေဆုံးခဲ့ရတဲ့ ဘောလုံးပရိသတ် ၉၇ ဦးအတွက် ရည်စူးပြီး ပြုလုပ်ခဲ့ခြင်း ဖြစ်ပါတယ်။

ဒီဖြစ်ရပ်ဆိုးက အင်္ဂလန်မြောက်ပိုင်း၊ ရှက်ဖီးမြို့မှာကျင်းပတဲ့ လီဗာပူးနဲ့ နော်တင်ဟမ်ဖောရက်စ်တို့ရဲ့ အက်ဖ်အေဖလားဆီမီးဖိုင်နယ်ပွဲစဉ်အတွင်း ဖြစ်ပွားခဲ့တာပါ။ ပရိသတ်တွေ အလွန်အမင်းပြည့်ကျပ်နေချိန် လူငယ်အများအပြား အပါအဝင် ပရိသတ်တွေ တစ်ဦးပေါ်တစ်ဦး ပိမိခဲ့ကြပြီး ကမ္ဘာ့အဆိုးရွားဆုံး ဘောလုံးကွင်းတွင်းအဖြစ်ဆိုးတွေအနက် တစ်ခု ပေါ်ပေါက်လာခဲ့ပါတယ်။

ဒီဖြစ်ရပ်အတွက် အမှတ်တရရုပ်တုမှာတော့ ကလေးငယ်နှစ်ဦး လက်ချင်းတွဲထားတဲ့ပုံကို ဖော်ပြထားပါတယ်။ မိန်းကလေးက ကျောနံပါတ် ၉ အဲဗာတန်ဂျာစီအင်္ကျီကို ဝတ်ထားပြီး ယောက်ျားလေးကတော့ ကျောနံပါတ် ၇ လီဗာပူးဂျာစီအင်္ကျီကို ဝတ်ဆင်ထားပါတယ်။ ဒါက မာဆေးဆိုဒ်ဒါဘီပြိုင်ဘက်တွေကြားက သမိုင်းဝင်ပြိုင်ဆိုင်မှုတွေထက် ကျော်လွန်တဲ့ စည်းလုံးညီညွတ်မှုကို ဖော်ဆောင်ထားမှုလည်း ဖြစ်ပါတယ်။

"အဲဗာတန်အသင်းအနေနဲ့ ကွယ်လွန်သွားသူ ၉၇ ဦးကို ဂါရဝပြုဖို့အတွက် ဟေးလ်ဘရော့မိသားစုဝင်တွေနဲ့ လီဗာပူးအသင်းမိတ်ဆွေတွေကို ဒီနေ့မှာ ဟေးလ်ဒစ်ကင်ဆန်ကွင်းဆီ ဖိတ်ခေါ်ပြီး ကြိုဆိုခဲ့ပါတယ်" လို့ အဲဗာတန်အသင်းရဲ့ ထုတ်ပြန်ချက်မှာ ဖော်ပြထားပါတယ်။

အထိမ်းအမှတ်ဖွင့်လှစ်ပွဲမှာ လီဗာပူးဂန္ထဝင်ကစားသမားကြီးတွေဖြစ်တဲ့ ကင်နီဒဲလ်ဂလစ်ရှ်နဲ့ အီရန်ရပ်ရှ် (Ian Rush) တို့က အသင်းကိုယ်စား ပန်းခွေချ ဂါရဝပြုခဲ့ကြပါတယ်။

လာမယ့် တနင်္ဂနွေနေ့မှာတော့ ပရီးမီးယားလိဂ်ပွဲစဉ်အဖြစ် အဲဗာတန်က လီဗာပူးကို အိမ်ကွင်းမှာ လက်ခံကစားသွားရပါမယ်။