တိုရီနိုကြယ်ပွင့် ဗလက်ဆစ်ကို ခေါ်ယူဖို့ ဒေါ့မွန် ပြင်ဆင်နေ
ဘိုရုရှားဒေါ့မွန်အသင်းဟာ တိုရီနိုအသင်းရဲ့ ကွင်းလယ်လူ နီကိုလာဗလက်ဆစ်ကို စောင့်ကြည့်နေပါတယ်။ ဗလက်ဆစ်ဟာ ဒီရာသီမှာ တိုရီနိုအသင်းအတွက် အကောင်းဆုံးခြေစွမ်းပြသနေပြီး ခရိုအေးရှားလက်ရွေးစင်ကစားသမားရဲ့ အဲဒီလိုခြေစွမ်းကောင်းတွေကြောင့် ဥရောပတစ်လွှားက ထိပ်တန်းကလပ်အသင်းကြီးတွေက သူ့ကို သတိပြုမိလာခဲ့ကြတာပါ။ အီတလီသတင်းစာ Tuttosport ရဲ့ ဖော်ပြချက်အရ ဒေါ့မွန်အသင်းဟာ သူ့ကို စိတ်ဝင်စားနေတဲ့ အသင်းတွေထဲမှာ ပါဝင်နေပါတယ်။
ဒေါ့မွန်အသင်း တာဝန်ရှိသူတွေက ဗလက်ဆစ်ကို ဒီရာသီကုန်မှာ စာချုပ်သက်တမ်းကုန်ဆုံးပြီး နွေရာသီမှာ အသင်းကနေ ထွက်ခွာတော့မယ့် ဂျူလီယန်ဘရန့်ဒ်ရဲ့ နေရာမှာ အစားထိုးဖို့အတွက် လျာထားတာ ဖြစ်ပါတယ်။ ဒီအပြောင်းအရွှေ့အတွက် အဓိကကျလာနိုင်သူကတော့ ဗလက်ဆစ်ကို အလွန်နှစ်သက်သဘောကျတဲ့ ဒေါ့မွန်အသင်းရဲ့ ခရိုအေးရှားလူမျိုး နည်းပြ နီကိုကိုဗက်ပဲ ဖြစ်ပါတယ်။
လွန်ခဲ့တဲ့ သုံးနှစ်က ဝက်စ်ဟမ်းအသင်းကနေ ပြောင်းရွှေ့လာခဲ့သူ ဗလက်ဆစ်ဟာ လက်ရှိမှာ တိုရီနိုအသင်းနဲ့ ၂၀၂၇ ခုနှစ်အထိ စာချုပ်သက်တမ်း ကျန်ရှိနေပါသေးတယ်။
