မန်စီးတီးကနေ ဖူလ်ဟမ်ကို မကြာသေးခင်က ပြောင်းရွှေ့ခဲ့တာဟာ ပရီးမီးယားလိဂ်မှာ သူ့ကိုယ်သူ နေရာရအောင် လုပ်ဖို့အတွက် အကောင်းဆုံး အခွင့်အရေး ဖြစ်တယ်လို့ အော်စကာ ဘော့ဘ်က ယုံကြည်နေပါတယ်။

ပြီးခဲ့တဲ့ ဇန်နဝါရီလတုန်းက အသက် ၂၂ နှစ်အရွယ် တိုက်စစ်ကစားသမားဟာ ပေါင် ၂၇ သန်းနဲ့ မန်စီးတီးကနေ ဖူလ်ဟမ်ကို ပြောင်းလာခဲ့တာ ဖြစ်ပြီး ဒါဟာ ဒီရာသီရဲ့ စိတ်ဝင်စားစရာ အကောင်းဆုံး အပြောင်းအရွှေ့တစ်ခုလည်း ဖြစ်လာနိုင်ပါတယ်။ ဘော့ဘ်ဟာ ကိုးလ်ပါလ်မာ၊ မော်ဂန်ရော်ဂျာစ်၊ လီယမ်ဒလက်ပ်၊ ရိုမီယိုလားဗီးယားနဲ့ ဂျိမ်းစ်မက်အေတီတို့လိုပဲ မန်စီးတီးရဲ့ နာမည်ကျော် လူငယ်အကယ်ဒမီကနေ ထွက်လာပြီး တခြားအသင်းမှာ ပွဲထွက်ခွင့် ပိုရဖို့ ကြိုးစားနေတဲ့ နောက်ဆုံးပေါ် ကစားသမားတစ်ဦး ဖြစ်ပါတယ်။

နည်းပြ မာကိုဆေးလ်ဗားရဲ့ လက်အောက်မှာ ဖူလ်ဟမ်အသင်း တိုးတက်လာတာကလည်း ဒီအပြောင်းအရွှေ့ ဖြစ်မြောက်ဖို့ အဓိက အကြောင်းရင်း တစ်ခု ဖြစ်ခဲ့ပါတယ်။ ပရီမီယာလိဂ်ကို ပြန်တက်လာပြီးကတည်းက ဖူလ်ဟမ်အသင်းဟာ တဖြည်းဖြည်း တိုးတက်လာခဲ့ပြီး အခုဆိုရင် ဥရောပဝင်ခွင့်အတွက်တောင် မျှော်လင့်လာနိုင်ပြီ ဖြစ်ပါတယ်။

မန်စီးတီးမှာ ဒဏ်ရာပြဿနာတွေနဲ့ ကြုံတွေ့ခဲ့ရတာက ဘော့ဘ်ကို ရာသီဝက်မှာ အသင်းကနေ ထွက်ခွာဖို့ တွန်းအားဖြစ်စေခဲ့ပါတယ်။ ဘော့ဘ်ဟာ ဒီအပြောင်းအရွှေ့ကို အခွင့်အရေးတစ်ခုအနေနဲ့ရော ပွဲထွက်ကစားသမား ဖြစ်လာဖို့အတွက်ပါ ဗျူဟာမြောက် ခြေလှမ်းတစ်ခုလို့ မြင်ခဲ့တာပါ။ "ကျွန်တော် အသင်းကနေ ထွက်ဖို့ အရမ်းကြီး စိတ်လောနေခဲ့တာတော့ မဟုတ်ပါဘူး" လို့ ဘော့ဘ်က Mail Sport နဲ့ အင်တာဗျူးမှာ ပြောခဲ့ပါတယ်။

"ကျွန်တော့်မှာ ကြံ့ခိုင်မှုပိုင်းဆိုင်ရာ ပြဿနာလေးတွေ ရှိနေခဲ့သလို အဲ့ဒီအချိန်မှာ မန်စီးတီးကလည်း ကစားသမားသစ်တွေ ခေါ်ထားတော့ လူစာရင်းက အတော်ကြီး များနေခဲ့ပါတယ်။ ဒါကြောင့် နှစ်ဖက်လုံးက သဘောတူပြီး သင့်တော်တဲ့ ကလပ်အသင်း တစ်ခုခုက ကမ်းလှမ်းလာရင် ပြောင်းရွှေ့ဖို့ ဆုံးဖြတ်ခဲ့တာပါ"

"ဖူလ်ဟမ်က ကမ်းလှမ်းလာတဲ့အချိန်မှာ မာကိုဆေးလ်ဗားနဲ့ စကားပြောဖြစ်ခဲ့ပြီး ဒါက ကျွန်တော့်အတွက် မှန်ကန်တဲ့ ရွေးချယ်မှုလို့ ခံစားခဲ့ရပါတယ်။ တကယ်လည်း စိတ်ဝင်စားစရာ ကောင်းခဲ့တာပါ။ မန်စီးတီး နည်းပြနဲ့ အားကစားဒါရိုက်တာတွေကိုလည်း ပြောပြတော့ သူတို့ကလည်း အပြည့်အဝ နားလည်ပေးခဲ့ကြပါတယ်"

"ဖူလ်ဟမ်ဟာ တည်ငြိမ်တဲ့ အသင်းတစ်သင်းပါ။ ဒါက ကျွန်တော့်အတွက် အရမ်းအရေးကြီးပါတယ်။ ကစားသမားတစ်ယောက်အနေနဲ့ ကောင်းကောင်း ဖွံ့ဖြိုးလာနိုင်ပြီး ဘေးကင်းလုံခြုံတဲ့ ပတ်ဝန်းကျင်မျိုးဆီကို သွားချင်ခဲ့တာပါ"

၂၀၂၃ ခုနှစ်မှာ မန်စီးတီး အကယ်ဒမီထွက် အချင်းချင်းဖြစ်တဲ့ ပါလ်မာတစ်ယောက် ချယ်လ်ဆီးကို ပြောင်းသွားတာကို မြင်ခဲ့ရတာကလည်း သူ့ရဲ့ ငယ်ဘဝကလပ်ကနေ ထွက်ခွာဖို့ သတ္တိတွေ ရရှိစေခဲ့တယ်လို့ ဘော့ဘ်က ဆက်ပြောပါတယ်။

"ကစားသမား တစ်ယောက်နဲ့တစ်ယောက်တော့ အခြေအနေချင်း မတူပါဘူး" လို့ နော်ဝေ လက်ရွေးစင် ကစားသမားလေးက ဖြည့်စွက်ပြောပါတယ်။ "ကိုးလ် ချယ်လ်ဆီးကို ပြောင်းဖို့ ဖြစ်နေတဲ့အချိန်တုန်းက ကျွန်တော် သူနဲ့အတူ ရှိနေခဲ့တာပါ။ အခု သူဖြစ်လာတဲ့ ပုံစံမျိုး ဖြစ်လာမယ်ဆိုတာကို သူတို့ (ချယ်လ်ဆီး) က ကြိုမြင်ခဲ့ကြတာပါ"

"အပြင်လူတွေကတော့ ဒီလောက် မြန်မြန်ဆန်ဆန် အောင်မြင်လာလိမ့်မယ်လို့ ထင်ချင်မှ ထင်ကြမှာပါ။ ဒါပေမဲ့ ကလပ်အသင်းတစ်ခုက သင့်ကို ခေါ်ချင်တယ်၊ သင့်အတွက် အစီအစဉ်တွေလည်း ရှိတယ်၊ ပြီးတော့ နှစ်ဖက်စလုံးရဲ့ ရည်မှန်းချက်တွေကလည်း တူညီနေမယ်ဆိုရင် ဒါဟာ အရေးကြီးဆုံး အချက်ပါပဲ"

"ကိုယ့်အရည်အချင်းကို ထုတ်ပြနိုင်ဖို့ နေရာမှန်ရောက်ဖို့က အရေးကြီးပါတယ်။ ဒါပေမဲ့ ကိုးလ်နဲ့ ပတ်သက်ရင်တော့ သူ အခုလိုတွေ လုပ်ပြနိုင်မယ်ဆိုတာကို ဘယ်သူမှ သံသယမရှိခဲ့ပါဘူး" ဟု ဘော့ဘ်က ဆိုပါသည်။