ယူနိုက်တက်ဝါရင့်ကွင်းလယ်လူ ကတ်စ်မဲရိုးကို ဆက်သွယ်ခဲ့တယ်လို့ ဆော်ပိုလိုအမှုဆောင်အရာရှိ အတည်ပြု
ကတ်စ်မဲရိုးက သူတို့ရဲ့ ကမ်းလှမ်းမှုကို ငြင်းပယ်ခဲ့တယ်လို့ ဆော်ပိုလိုအသင်းရဲ့ ဘောလုံးရေးရာ အမှုဆောင်အရာရှိ ရူဝီကော်စတာက ဝန်ခံပြောကြားလိုက်ပါတယ်။
ဝါရင့်ဘရာဇီးကွင်းလယ်လူဟာ အခုရာသီဟာ မန်ချက်စတာယူနိုက်တက်မှာ ကစားမယ့် သူ့ရဲ့ နောက်ဆုံးရာသီ ဖြစ်လာမယ်လို့ ကြေညာထားပြီးသားပါ။
သူ့ရဲ့ ကလပ်ဟောင်းဖြစ်တဲ့ ဆော်ပိုလိုကတော့ ဒီနွေရာသီ ကမ္ဘာ့ဖလားအပြီးမှာ ကတ်စ်မဲရိုးကို နေရပ်ပြန်လာဖို့ ဆွဲဆောင်နိုင်လိမ့်မယ်လို့ မျှော်လင့်ခဲ့ပေမဲ့ ကွင်းလယ်လူကတော့ တခြားအစီအစဉ်တွေ ရှိနေတာပါ။
ရူဝီကော်စတာက "တစ်နေ့ခင်းမှာ ကျွန်တော်တို့ ဒီအကြောင်းကို စကားပြောဖြစ်ရင်းနဲ့ အသင်းရဲ့ အရေးပါတဲ့ ကစားသမားတစ်ယောက်က ကတ်စ်မဲရိုးဆီ မက်ဆေ့ခ်ျပို့ပြီး မေးခဲ့ပါတယ်" လို့ ဖွင့်ဟခဲ့ပါတယ်။
"ဘယ်သူက ကတ်စ်မဲရိုးကို မိမိအသင်းမှာ မရှိစေချင်မှာလဲ ဟုတ်တယ်မလား။ ကျွန်တော်လည်း သူ့ကို အသင်းမှာ ရှိစေချင်တာပေါ့။ သူကတော့ ချက်ချင်းပဲ ပြန်ဖြေပါတယ်။ သူ့ရဲ့ ရည်မှန်းချက်က ဘရာဇီးကို ပြန်လာဖို့ မဟုတ်ဘဲ တခြားစျေးကွက်လိဂ်တွေမှာပဲ ဆက်ကစားဖို့ဖြစ်တယ်လို့ ဆိုပါတယ်"
သူက ဆက်ပြီး "ဒါဟာ ဆော်ပိုလိုက ကတ်စ်မဲရိုးအတွက် ကမ်းလှမ်းမှုလုပ်ခဲ့တာလားဆိုတော့ မဟုတ်ပါဘူး။ ဆော်ပိုလိုအနေနဲ့ ကတ်စ်မဲရိုးအတွက် ကမ်းလှမ်းမှုမလုပ်ခဲ့သလို အသင်းရဲ့ လူစာရင်း ဘယ်လိုရှိမလဲဆိုတာကို သေချာမသိရသေးဘဲ ကမ်းလှမ်းဖို့ကလည်း ကျွန်တော့်အမြင်အရတော့ သိပ်ပြီးတော့ မသင့်တော်သေးပါဘူး။ တရားဝင် ကမ်းလှမ်းတာ ဒါမှမဟုတ် တရားဝင် စုံစမ်းမေးမြန်းတာမျိုး မရှိခဲ့ပါဘူး။ အသင်းထဲက အရေးပါတဲ့ လူတစ်ယောက်ကနေတစ်ဆင့် သူ့ဆီ စာပို့ခဲ့တာပဲ ရှိတာပါ" လို့ ရှင်းပြသွားပါတယ်။
