မန်ချက်စတာယူနိုက်တက်ဂိုးသမား အန်ဒရေအိုနာနာဟာ ယခုနှစ်ရာသီကုန်မှာ အိုးလ်ထရက်ဖို့ဒ်မှထွက်ခွာပြီး ဆော်ဒီပရိုလိဂ်ကလပ်တစ်ခုသို့ ပြောင်းရွှေ့နိုင်ဖွယ်ရှိကြောင်း သတင်းတွေထွက်ပေါ်လာခဲ့ပါတယ်။ 
အင်တာမီလန်မှ ယူနိုက်တက်သို့စတင်ပြောင်းရွှေ့လာခဲ့တဲ့ အိုနာနာအနေနဲ့ အိုးလ်ထရက်ဖို့ဒ်မှာ မြင့်မားတဲ့ပုံရိပ်နဲ့အတူ ပရိသတ်ချစ်ခင်အားပေးမှု ရရှိမယ်လို့မျှော်လင့်ခဲ့ပေမယ့် ပြီးခဲ့တဲ့ တစ်ရာသီလုံး ဝေဖန်မှုတွေနဲ့ မကြာခဏကြုံတွေ့ခဲ့ရသလို၊ ဒီရာသီလည်း ထင်ရှားတဲ့လက်စွမ်းမျိုးပြသထားနိုင်ခြင်းမရှိသေးပါဘူး။ 
ဒါကြောင့် ယူနိုက်တက်အနေနဲ့ လာမယ့်နွေရာသီမှာ ဂိုးသမားသစ်ခေါ်ယူဖို့ ပြင်ဆင်ထားပြီး အိုနာနာကိုတော့ ဆော်ဒီပရိုလိဂ်ကလပ်တစ်ခုသို့ ရောင်းချသွားနိုင်ဖို့ ရည်ရွယ်ထားတယ်လို့သိရပါတယ်။ သို့သော်လည်း အိုနာနာကတော့ ယူနိုက်တက်မှာ ဆက်လက်နေထိုင်လိုဆဲဖြစ်နေပြီး ကလပ်က သူ့ကိုမလိုချင်တဲ့အခါမှာတော့ အာရှအရှေ့အလယ်ပိုင်းသို့ ထွက်ခွာဖို့ စဉ်းစားသွားမှာဖြစ်ကြောင်း ESPN ဖော်ပြထားပါတယ်။ 
လာမယ့်နွေရာသီမှာ ကစားသမားသစ်တွေဖြည့်တင်းပြီး အသင်းကို ပြန်လည်တည်ဆောက်တော့မယ့်ယူနိုက်တက်အနေနဲ့ ဂိုးသမားနေရာအတွက် အန့်ထရန့်ဂိုးသမား ဆင်နီလမ်မန်းစ်နဲ့ လိုင်လီဂိုးသမား လူးကပ်စ်ချီဗာလီယာတို့ကို ပစ်မှတ်ထားနေတာလည်းဖြစ်ပါတယ်။ နည်းပြ ရူဘင်အာမိုရင်အနေနဲ့လည်း အရန်ဂိုးသမားတွေဖြစ်တဲ့ တွမ်ဟီတန်နဲ့ အယ်လ်တေးဘယင်ဒါတို့ကို နေရာပေးဖို့ စိတ်ကူးမရှိတာကြောင့် ဂိုးသမားသစ်သာ ခေါ်ယူသွားဖို့ အလားအလာရှိနေပါတယ်။ 
အိုနာနာဟာ ယူနိုက်တက်အတွက် ပြိုင်ပွဲစုံ ၆၇ ပွဲကစားထားပြီး Clean Sheet ၁၇ ပွဲသာ ရရှိအောင်စွမ်းဆောင်ထားနိုင်တာလည်းဖြစ်ပါတယ်။ နိုင်ငံတကာပွဲစဉ်တွေအပြီး ကလပ်ပွဲတွေပြန်လည်စတင်ချိန်မှာတော့ ကင်မရွန်းသားဟာ ပရီးမီးယားလိဂ်ပွဲစဉ်အဖြစ် ယူနိုက်တက်နဲ့အတူ နော်တင်ဟမ်ဖောရက်စ်ကို ယှဉ်ပြိုင်သွားရမှာဖြစ်ပါတယ်။