ရီးရဲလ်မက်ဒရစ်နည်းပြသစ်ဖြစ်လာမယ်ဆိုတဲ့ထင်ကြေးတွေ ပျံ့နှံ့နေချိန်မှာပဲ လေဗာကူဆင်နည်းပြအလွန်ဆိုက သူ့ရဲ့အနာဂတ်နဲ့ပတ်သက်တဲ့ဆုံးဖြတ်ချက်တစ်ရပ်ကို မကြာခင်ထုတ်ပြန်ကြေညာဖွယ် ရှိနေပါတယ်။ Diario AS သတင်းဌာနရဲ့အဆိုအရ ကြာသပတေးနေ့၊ နေ့ခင်းပိုင်းမှာ ကျင်းပပြုလုပ်ဖို့စီစဉ်ထားတဲ့ သတင်းစာရှင်းလင်းပွဲအတွင်း အလွန်ဆိုက လာမယ့်ဘောလုံးရာသီအတွက် သူ့ရဲ့အစီအမံတွေကို ထုတ်ပြန်ကြေညာသွားဖွယ်ရှိတယ်လို့ သိရပါတယ်။ ဒီအခမ်းအနားမှာပဲ သူက ဘိုချမ်နဲ့ရင်ဆိုင်ရတော့မယ့် လေဗာကူဆင်ရဲ့ဘွန်ဒက်စ်လီဂါပွဲစဉ်မတိုင်ခင် မီဒီယာတွေရဲ့မေးမြန်းမှုတွေကို ဖြေကြားပေးသွားပါလိမ့်မယ်။ ဒါ့အပြင် အလွန်ဆိုက ရီးရဲလ်မက်ဒရစ်ရဲ့စိတ်ဝင်စားမှုတွေ ရရှိနေပေမယ့် ၂၀၂၅-၂၀၂၆ ဘောလုံးရာသီအတွက် ဂျာမန်ကလပ်အသင်းနဲ့အတူ ဆက်ရှိနေမယ့်အစီအစဉ်ကို ကြေညာသွားလိမ့်မယ်ဆိုတဲ့ ပြောဆိုသံတွေလည်း ထွက်ပေါ်နေပြန်ပါတယ်။

အန်ဆယ်လော့တီက ၂၀၂၆ ခုနှစ်အထိ ရီးရဲလ်မက်ဒရစ်နဲ့ စာချုပ်သက်တမ်းရှိနေပေမယ့် အခုဘောလုံးရာသီ၊ လာလီဂါ (သို့မဟုတ်) ချန်ပီယံလိဂ်ပြိုင်ပွဲတွေမှာ ဆုဖလားအောင်မြင်မှုမရရှိဘူးဆိုရင် ကလပ်အသင်းအတွက် သူ့ရဲ့အနာဂတ်က အန္တရာယ်စက်ကွင်းဆီ ဝင်ရောက်သွားပါလိမ့်မယ်။ ဒါပေမယ့် ရီးရဲလ်မက်ဒရစ်ကလည်း ရာသီကုန်အခြေအနေတွေကို မသိရသေးခင် စာချုပ်သက်တမ်းနောက်ဆုံးနှစ်တွေဆီ ဝင်ရောက်လာနေတဲ့ အီတာလျံသားရဲ့အနာဂတ်နဲ့ပတ်သက်လို့ ဆုံးဖြတ်ချက်တစုံတရာချမှတ်သွားဖို့ မရှိသေးပါဘူး။ မက်ဒရစ်အခြေစိုက်ကလပ်နည်းပြရာထူးအတွက် အလွန်ဆိုရဲ့ကိုယ်စားလှယ်တွေနဲ့ ဆွေးနွေးခဲ့တယ်ဆိုတဲ့ သတင်းတွေထွက်ပေါ်နေချိန်မှာပဲ လေဗာကူဆင်ကလည်း လာမယ့်ဘောလုံးရာသီအတွက် ပြင်ဆင်မှုတွေ ဆက်လုပ်နိုင်ဖို့ အလွန်ဆိုရဲ့အနာဂတ်ကို ရှင်းရှင်းလင်လင်းသိမြင်လိုနေပါတယ်။

လေဗာကူဆင်နည်းပြရာထူးကိုစွန့်ခွာဖို့ အလွန်ဆိုဆုံးဖြတ်မယ်ဆိုရင် အန်ဆယ်လော့တီထွက်ခွာမယ့်အချိန်ကို စောင့်ဆိုင်းပေးရမယ့်အန္တရာယ်နဲ့လည်း ရင်ဆိုင်သွားရပါလိမ့်မယ်။ အလားတူ လေဗာကူဆင်မှာ အလွန်ဆိုဆက်ရှိနေပြီး အန်ဆယ်လော့တီက ရာထူးစွန့်လွှတ်ရမယ်ဆိုမယ်ဆိုရင် ရီးရဲလ်မက်ဒရစ်အနေဖြင့် ဖြစ်လာနိုင်ခြေရှိတဲ့နည်းပြသစ်လက်ထဲမှာ အလွန်ဆိုရဲ့အနာဂတ်ကို ထားရှိပြီး အခြားရွေးချယ်စရာတွေကို ရှာဖွေသွားရနိုင်ပါတယ်။ ဒါ့အပြင် ကလပ်ကမ္ဘာ့ဖလားပြိုင်ပွဲကလည်း ဇူလိုင်လလယ်အထိ ကျင်းပသွားဖို့ စီစဉ်ထားလို့ အလွန်ဆိုအတွက် ရာထူးလွှဲပြောင်းလက်ခံရန် အကောင်းဆုံးအချိန်လို့ မယူဆနိုင်ပါဘူး။

ပြည်တွင်းခါးသီးပြိုင်ဘက်ဘိုင်ယန်မြူးနစ်ကို အရေးနိမ့်ကာ ချန်ပီယံလိဂ်ပြိုင်ပွဲမှထွက်ခွာလာရပြီးနောက် အလွန်ဆိုရဲ့အသင်းက ပြီးခဲ့တဲ့ရာသီမှာဆွတ်ခူးနိုင်တဲ့ ဘွန်ဒက်စ်လီဂါချန်ပီယံဆုနဲ့ ပိုကယ်လ်ဖလားတို့ကို ဆက်လက်ကာကွယ်သွားနိုင်ရေး ကြိုးစားသွားရပါမယ်။ လေဗာကူဆင်အသင်းက လာမယ့်သောကြာနေ့မှာ ဘိုချမ်နဲ့ ယှဉ်ပြိုင်ကစားပြီးနောက် ဧပြီ ၁ ရက်မှာ အာမေးနီးယားဘီလီဖီးလ်နဲ့ ပိုကယ်လ်ဖလားဆီမီးဖိုင်နယ်ကို ဆင်နွှဲသွားရပါမယ်။ သူတို့တွေက လိဂ်ရှစ်ပွဲသာကစားရဖို့ကျန်ရှိချိန် ဘိုင်ယန်မြူးနစ်နောက် ခြောက်မှတ်အကွာ၊ ဘွန်ဒက်စ်လီဂါအမှတ်ပေးဇယားဒုတိယနေရာမှာ ရပ်တည်နေပါတယ်။