ဝက်စ်ဟမ်း အသင်းက နည်းပြချုပ်အသစ်အဖြစ် နူနို အက်စ်ပီရီတို ဆန်းတို့စ်ကို ခန့်အပ်လိုက်ပြီဖြစ်ကြောင်း အတည်ပြုလိုက်ပါတယ်။ နည်းပြဟောင်း ဂရေဟမ် ပေါ်တာကို စနေနေ့မှာ ရာထူးကနေ ထုတ်ပယ်ပြီး နာရီပိုင်းအကြာမှာပဲ ဒီသတင်းကို ကြေညာခဲ့တာပါ။ နူနိုဟာ အရှေ့လန်ဒန်ကလပ်နဲ့ ကိုယ်ပိုင်သဘောတူညီချက်ရရှိခဲ့ပြီး တနင်္လာနေ့ အဲဗာတန်နဲ့ ကစားရမယ့် ပရီးမီးယားလိဂ်ပွဲစဉ်မတိုင်မီ အသင်းရဲ့ နည်းပြအသစ်အဖြစ် တရားဝင် မိတ်ဆက်ခံရမယ်လို့ မျှော်လင့်ရပါတယ်။ နည်းပြ ပေါ်တာဟာ အသင်းကို ကိုင်တွယ်ခဲ့တဲ့ ၂၅ ပွဲမှာ ၆ ပွဲသာ အနိုင်ရခဲ့ပြီးနောက် ရာထူးမှ ထုတ်ပယ်ခံခဲ့ရတာပါ။

ဒီလအစောပိုင်းမှာ နော့တင်ဟမ် ဖောရက်စ်ကနေ ထွက်ခွာခဲ့တဲ့ နူနိုဟာ တနင်္လာနေ့ည ဟေး ဒစ်ကင်ဆန် အားကစားကွင်းမှာ အဲဗာတန်ကို ရင်ဆိုင်ရမယ့် ဝက်စ်ဟမ်းအသင်းကို ဦးဆောင်ဖို့ အသင့်ရှိနေမှာဖြစ်ပြီး ဒီတနင်္ဂနွေမှာ ပထမဆုံး လေ့ကျင့်ရေးအစီအစဉ်ကို စတင်မယ်လို့ သိရပါတယ်။ သူဟာ သုံးနှစ်စာချုပ်ကို လက်မှတ်ရေးထိုးခဲ့ပါတယ်။

“ဒီနေရာကို ရောက်လာရတာ အရမ်းပျော်မိပါတယ်။ ဝက်စ်ဟမ်းကို ကိုယ်စားပြုရတဲ့အတွက်လည်း ဂုဏ်ယူပါတယ်” လို့ အသက် ၅၁ နှစ်အရွယ် နည်းပြက ကလပ်အသင်းရဲ့ ဝက်ဘ်ဆိုဒ်ကို ပြောပါတယ်။“ကျွန်တော့်ရဲ့ ရည်ရွယ်ချက်ကတော့ အသင်းဆီကနေ အကောင်းဆုံးတွေ ရရှိအောင် အလုပ်ကြိုးစားလုပ်ဖို့နဲ့ ကျွန်တော်တို့ တတ်နိုင်သမျှ ယှဉ်ပြိုင်နိုင်စွမ်းရှိအောင် လုပ်ဆောင်ဖို့ပါပဲ။ အလုပ်တွေက စတင်နေပြီဖြစ်ပြီး ရှေ့ဆက်ကြုံတွေ့ရမယ့် စိန်ခေါ်မှုတွေကို စောင့်မျှော်နေပါတယ်” လို့လည်း ထပ်လောင်းပြောကြားခဲ့ပါတယ်။

စနေနေ့ အစောပိုင်းမှာ ထုတ်ပြန်ခဲ့တဲ့ ကြေညာချက်မှာ ဝက်စ်ဟမ်းက နည်းပြ ပေါ်တာနဲ့ သူ့ရဲ့နည်းပြအဖွဲ့ဝင်အားလုံးကို ချက်ချင်း ရပ်စဲလိုက်ကြောင်း အတည်ပြုခဲ့ပြီး တနင်္လာနေ့ပွဲစဉ်မတိုင်မီ နူနိုနဲ့ သူ့ရဲ့ အဖွဲ့တွေအတွက် လမ်းဖွင့်ပေးလိုက်တာ ဖြစ်ပါတယ်။ ပေါ်တာဟာ ယခုနှစ် ဇန်နဝါရီလမှာ ဂျူလန် လိုပက်တီဂွီရဲ့ နေရာကို ဆက်ခံခဲ့ပြီး အဲ့ဒီအချိန်က ဝက်စ်ဟမ်းဟာ အဆင့် ၁၄ နေရာမှာ ရှိနေပါတယ်။ ၂၀၂၄-၂၀၂၅ ရာသီအကုန်မှာလည်း အသင်းက အဲဒီနေရာမှာပဲ ဆက်ရှိနေခဲ့ပေမယ့် အင်္ဂလိပ်နည်းပြရဲ့ လက်အောက်မှာ တိုးတက်မှု မရှိခဲ့ပါဘူး။ ဝက်စ်ဟမ်းဟာ လက်ရှိ ပရီးမီးယားလိဂ်ဇယားရဲ့ အဆင့် ၁၉ နေရာမှာ ရပ်တည်နေပြီး ကာရာဘောင်းဖလား ပြိုင်ပွဲကနေလည်း ရုန်းကန်နေရတဲ့ ဝုဗ်လက်ထဲမှာ အရေးနိမ့်ခဲ့ပါတယ်။

နူနိုဟာ လတ်တလောမှာ နော့တင်ဟမ် ဖောရက်စ်ပိုင်ရှင် အီဗန်ဂျယ်လို့စ် မာရီနာကစ် နဲ့ ဆက်ဆံရေး အဆင်မပြေဖြစ်ပြီး ကလပ်ကနေ ထွက်ခွာခဲ့ရတဲ့အတွက် ရုန်းကန်နေရတဲ့ ပရီးမီးယားလိဂ်နည်းပြတွေကို ဖိအားတွေ ပိုတိုးလာစေခဲ့ပါတယ်။ ပေါ်တူဂီနည်းပြဟာ ပြီးခဲ့တဲ့ရာသီ အများစုမှာ ချန်ပီယံလိဂ် ဝင်ခွင့်နဲ့ နီးစပ်ခဲ့တဲ့ ဖောရက်စ်ကို ထိပ်တန်းလိဂ်မှာ အဆင့်ခုနစ်နေရာ ရောက်အောင် စွမ်းဆောင်ပေးနိုင်ခဲ့တဲ့အတွက် နူနိုရဲ့ ဂုဏ်သတင်းက အမြင့်ဆုံး အခြေအနေမှာ ရှိနေပါတယ်။ သရော်လိုက်သလိုလိုပါပဲ၊ ပေါ်တူဂီလူမျိုးရဲ့ နော့တင်ဟမ် ဖောရက်စ် နည်းပြဘဝ နောက်ဆုံးပွဲစဉ်က ဒီရာသီ ဝက်စ်ဟမ်းရဲ့ တစ်ခုတည်းသော နိုင်ပွဲဖြစ်တဲ့ ပေါ်တာရဲ့ ဝက်စ်ဟမ်းကို စီးတီး ဂရောင်းကွင်းမှာ ၃-၀ နဲ့ ရှုံးနိမ့်ခဲ့တဲ့ပွဲ ဖြစ်ပါတယ်။ ဖောရက်စ်နည်းပြနေရာကို တော့တန်ဟမ်နဲ့ ဆဲလ်တစ် နည်းပြဟောင်း အန်ဂီ ပိုစတာကိုဂလိုက အစားထိုးခဲ့ပါတယ်။

တော်တင်ဟမ်မှာ ခဏတာ အဆင်မပြေခဲ့တဲ့ အချိန်ကလွဲရင် နူနိုဟာ ပရီးမီးယားလိဂ်မှာ ရလဒ်ကောင်းတွေကို အမြဲတမ်း ပေးစွမ်းနိုင်သူပါ။ ၂၀၁၇-၁၈ မှာ ဝုဗ်ကို ချန်ပီယံရှစ်ဖလား ဆွတ်ခူးပေးခဲ့ပြီးနောက် ပေါ်တူဂီနည်းပြဟာ အဆိုပါကလပ်အတွက် အဆင့်ခုနစ်ဖြင့် နှစ်ကြိမ် ရာသီပိတ်ခဲ့ပြီး ဝုဗ်ကို ပရီးမီးယားလိဂ်မှာ ဆက်လက်ရပ်တည်နိုင်ဖို့ အခြေခံကောင်းတွေ ချပေးခဲ့ပါတယ်။ ၂၀၂၃-၂၄ မှာ ဖောရက်စ်ကို တန်းဆင်းဇုန်ကနေ ကယ်တင်ခဲ့ပြီးနောက် သူဟာ ကလပ်ကို ထိပ်ဆုံးခုနစ်နေရာ ရောက်အောင် ထပ်မံဦးဆောင်ခဲ့ပြီး အနှစ် ၃၀ ကျော်အတွင်း ဥရောပပြိုင်ပွဲဝင်ခွင့်ကို ပထမဆုံးအကြိမ် ရရှိစေခဲ့ပါတယ်။

ဝက်စ်ဟမ်း နည်းပြအသစ်ဟာ တနင်္လာနေ့မှာ အဲဗာတန်ဆီ သွားရောက်မယ့်ပွဲမတိုင်ခင် အသင်းနဲ့ ရင်းနှီးဖို့ အချိန်အလွန်နည်းပါတယ်။ အဲဒီနောက်ပိုင်းမှာ ပိုပြီး ခက်ခဲတဲ့ အခြေအနေတွေ ရှိနေပါတယ်။ ဝက်စ်ဟမ်းဟာ နောက်တစ်ပတ် အားလပ်ရက်မတိုင်ခင် အာဆင်နယ်ဆီကို သွားရောက်ရမှာ ဖြစ်ပါတယ်။ အဲဒီအားလပ်ရက်တွေဟာ နူနိုအတွက် သူရဲ့ ကစားသမားအများစုနဲ့ အလုပ်လုပ်ဖို့ အချိန်များစွာ ပေးနိုင်မှာဖြစ်ပြီး၊ တန်းဆင်းဇုန် ပြိုင်ဘက်တွေ ဖြစ်နိုင်တဲ့ ဘရန့်ဖို့ဒ် နဲ့ လိဒ်စ်တို့နဲ့ အရေးကြီးတဲ့ ပွဲစဉ်တွေ မတိုင်မီ ကလပ်အသင်းရဲ့ ယဉ်ကျေးမှုကို ထူထောင်ပေးနိုင်မှာ ဖြစ်ပါတယ်။