နာပိုလီဟာ ဒီရာသီ စီးရီးအေပွဲစဉ်မှာ ကယ်ဂလီယာရီနဲ့ပွဲစဉ်ကနေ ပထမဆုံးအမှတ်တွေ ဆုံးရှုံးတော့မလို ဖြစ်ခဲ့ပေမယ့် ဖရန့်ခ် အန်ဂူဆာကတော့ အဲ့လို မဟုတ်ဘူးဆိုတာကို သက်သေပြခဲ့ပါတယ်။ နောက်ကျမှ ရရှိခဲ့တဲ့ အနိုင်ရလဒ်ကြောင့် နာပိုလီနည်းပြ အန်တိုနီယို ကွန်တီက သူ့ရဲ့အသင်းဟာ ‘ပွဲပြီးဆုံးတဲ့အထိ ယုံကြည်ခဲ့ကြတယ်’ လို့ ချီးကျူးပြောဆိုလိုက်ပါတယ်။

ချန်ပီယံဟောင်း နာပိုလီအသင်းဟာ ကယ်ဂလီယာရီကို ဒီယေဂို အာမန်ဒို မာရာဒိုနာ အားကစားကွင်းမှာ ဖရန့်ခ် အန်ဂူဆာရဲ့ ၉၅ မိနစ်မှာ သွင်းယူခဲ့တဲ့သွင်းဂိုးနဲ့ ၁-၀ ဂိုးဖြင့် အနိုင်ရခဲ့တာကြောင့် စီးရီးအေမှာ နှစ်ပွဲဆက် နိုင်ပွဲရရှိခဲ့ပါတယ်။ နာပိုလီအသင်းဟာ ဘောလုံးပိုင်ဆိုင်မှုရဲ့ သုံးပုံနှစ်ပုံကျော်ကို ထိန်းချုပ်ထားနိုင်ခဲ့ပြီး ဂိုးပေါက်ကန်သွင်းမှု ၂၀ ကြိမ်အထိ ပြုလုပ်နိုင်ခဲ့ပါတယ်။

ကွန်တီကတော့ ကစားသမားတွေရဲ့ ဇွဲလုံ့လဟာ အကျိုးအမြတ်ရရှိခဲ့တာကို တွေ့မြင်ခဲ့ရတဲ့အတွက် ပျော်ရွှင်မိတယ်လို့ ဆိုပါတယ်။ ‘ဒါက ရှုံးနိမ့်ဖို့ အန္တရာယ်ကြီးတဲ့ ပုံမှန်ပွဲတစ်ပွဲပါပဲ။ ကျွန်တော်တို့ဟာ အစစ်အမှန်အသင်းတစ်သင်းလို ကစားခဲ့ပြီး၊ စိတ်ရှည်လက်ရှည်နဲ့ တိုးဖောက်ဖို့ ကြိုးစားခဲ့တာကြောင့် သရေရလဒ်နဲ့တောင် ပျော်ရွှင်မိမှာပါ’

‘သွင်းဂိုးက ကျိန်စာသင့်နေသလိုပါပဲ။ ကယ်ဂလီယာရီဟာ အရမ်းပြင်းထန်နေတဲ့အချိန်မှာ ကျွန်တော် သူတို့ ဒီလောက်ထိ ခံစစ်လိုက်ကစားမယ်လို့ မမျှော်လင့်ခဲ့ပါဘူး။ ဒီလိုပွဲမျိုးမှာ အန္တရာယ်ရှိတာက ပြန်လည်တိုက်စစ်ဆင်တာတွေပဲ ဖြစ်ပြီး၊ ကျွန်တော်တို့က အဲ့ဒါကို ခွင့်မပြုခဲ့ပါဘူး’

‘ကျွန်တော်တို့ဟာ အာရုံစူးစိုက်မှုနဲ့ ပြင်းထန်မှု ပိုင်းမှာ တိုးတက်လာခဲ့ပြီး ပွဲပြီးဆုံးတဲ့အထိ ယုံကြည်ခဲ့ကြပါတယ်။ ပွဲပြီးခါနီး စက္ကန့် ၂၀ အလိုမှာ အနိုင်ဂိုးနဲ့အတူ အကျိုးအမြတ် ရခဲ့ပါတယ်။ ကျွန်တော် အရမ်းပျော်ပါတယ်’ လို့ DAZN ကို ပြောပြခဲ့ပါတယ်။

နာပိုလီအသင်းရဲ့ တိုက်စစ်ပိုင်းကို အားဖြည့်ဖို့အတွက် ယူနိုက်တက်အသင်းက ရာ့စ်မတ်စ် ဟွိုက်လန်းကို အငှားနဲ့ ခေါ်ယူဖို့ သဘောတူညီမှု ရထားသလို၊ အယ်လီဖ် အယ်လ်မတ်စ်ဟာလည်း အာရ်ဘီ လိုက်ပ်ဇစ်ကနေ အသင်းကို ပြန်လာဖို့ နီးစပ်နေပြီလို့ သတင်းတွေ ထွက်ပေါ်နေပါတယ်။

ကွန်တီကတော့ အသင်းက ချန်ပီယံလိဂ်ကို ပြန်လည်ဝင်ရောက်လာတဲ့အတွက် လူအင်အားတိုးချဲ့ဖို့ လိုအပ်ကြောင်း နားလည်ထားပြီး၊ သူတို့အသင်းဟာ စက်တင်ဘာလ ၁၈ ရက်နေ့မှာ မန်စီးတီးအသင်းနဲ့ ရင်ဆိုင်ရမှာပဲ ဖြစ်ပါတယ်။ ‘လက်ရှိအချိန်မှာ ကျွန်တော်တို့ကို အကူအညီပေးနိုင်တဲ့ ကစားသမားတွေကို ခေါ်ယူခဲ့ပြီး အဲ့ဒီကစားသမားတွေဟာ နာပိုလီရဲ့အနာဂတ်လည်း ဖြစ်လာမှာပါ’

‘ပြီးခဲ့တဲ့ရာသီက ကျွန်တော်တို့မှာ ဥရောပပြိုင်ပွဲ မရှိခဲ့တဲ့အတွက် ကစားသမား ၁၂-၁၃ ယောက်လောက်နဲ့ပဲ အခြေပြုခဲ့ရတာကြောင့် ကျွန်တော်တို့ဟာ လူစာရင်းကို တိုးတက်အောင်၊ ပြည့်စုံအောင် ကြိုးစားခဲ့ပါတယ်’ လို့ ကွန်တီက ပြောကြားခဲ့ပါတယ်။