မန်ချက်စတာယူနိုက်တက်နည်းပြဟောင်း လူးဝစ်ဗန်ဟားလ်က လက်ရှိအသင်းနည်းပြ အဲရစ်တန်ဟက်ရဲ့အနာဂတ်နဲ့ပတ်သက်ပြီး ရိုးရိုးသားသားထင်မြင်ချက်ပေးလာခဲ့ပြီး နယ်သာလန်သားဟာ အိုးလ်ထရက်ဖို့ဒ်မှာ စိတ်ပျက်စရာရာသီတစ်ခုကြုံတွေ့ခဲ့ရပေမယ့် ဆက်လက်နေထိုင်ဖို့ ထောက်ခံအားပေးခဲ့ပါတယ်။ 

ပြီးခဲ့တဲ့ ၂၀၂၃-၂၄ ပရီးမီးယားလိဂ်ရာသီမှာ ယူနိုက်တက်ဟာ အမှတ်ပေးဇယားရဲ့အဆင့် ၈ နေရာမှာသာရပ်တည်နိုင်ခဲ့တာကြောင့် အဆိုပါရပ်တည်မှုဟာ ၁၉၉၀ ခုနှစ်နောက်ပိုင်း အဆိုးဝါးဆုံးသောမှတ်တမ်းဖြစ်ခဲ့ပြီး ရမှတ်ပိုင်းမှာလည်း ပြီးခဲ့တဲ့ရာသီကထက် ၁၅ မှတ်အထိ ပိုမိုလျော့နည်းခဲ့တာဖြစ်ပါတယ်။ 

ယူနိုက်တက်ဟာ ပြီးခဲ့တဲ့မေလမှာ မြို့ခံပြိုင်ဘက် မန်ချက်စတာစီးတီးကို အက်ဖ်အေဖလားဗိုလ်လုပွဲမှာ အနိုင်ယူပြီး ဆုဖလားဆွတ်ခူးနိုင်ခဲ့ပေမယ့် မန်နေဂျာ တန်ဟက်ရဲ့အနာဂတ်ကိုတော့ ဆုံးဖြတ်ဖို့အတွက် ဆွေးနွေးမှုတွေပြုလုပ်နေဆဲဖြစ်ပါတယ်။မကြာသေးမီက အသင်းရဲ့တစ်စိတ်တစ်ပိုင်းကို ဝယ်ယူခဲ့တဲ့ ဆာဂျင်မ်ရက်ကလစ်ဖ်ရောက်ရှိလာကတည်းက ယူနိုက်တက်ဟာ ပြောင်းလဲမှုတွေဆက်တိုက်ဆိုသလိုပြုလုပ်နေတာဖြစ်ပြီး ယခုအခါမှာလည်း တန်ဟက်ရဲ့အနာဂတ်ဟာ မေးခွန်းထုတ်စရာဖြစ်လာခဲ့ပါတယ်။ 

ယခုအခါမှာတော့ တန်ဟက်ရဲ့အနာဂတ်နဲ့ပတ်သက်ပြီ တစ်နိုင်ငံတည်းသား ဗန်ဟားလ်က “တန်ဟက်က အခုနှစ်မှာ အက်ဖ်အေဖလား ယူပေးနိုင်ခဲ့ပြီး ပထမနှစ်မှာလည်း ချန်ပီယံလိဂ်ဝင်ခွင့်ယူပေးထားတာကြောင့် ကျွန်တော်ကတော့ သူ့ကိုမထုတ်သင့်ဘူးလို့ထင်ပါတယ်။ သူ့အနေနဲ့ ဒီထက်ပိုပြီး အချိန်လိုအပ်ပါတယ်။ ဒါပေမယ့် သူ့ကိုဝေဖန်တာတွေတော့လုပ်လို့ရပါတယ်။ သူက မယုံနိုင်စရာကောင်းလောက်အောင်တော့ လုပ်မပြနိုင်သေးပါဘူး။ ဒါပေမယ့် မန်နေဂျာကောင်းတစ်ယောက်ဖြစ်တယ်ဆိုတာတော့ သက်သေပြထားပြီးပါပြီ” လို့ပြောကြားခဲ့ပါတယ်။ 

ဗန်ဟားလ်ဟာ ယူနိုက်တက်မှာ နည်းပြအဖြစ်တာဝန်ထမ်းဆောင်ဖူးခဲ့တာကြောင့် အိုးလ်ထရက်ဖို့ဒ်အသင်းနဲ့အတူ တစ်ပါတည်းကပ်ပါလာတဲ့ ဖိအားတွေနဲ့ တောင်းဆိုမှုတွေကို ကောင်းကောင်းသိနေတဲ့ ပုဂ္ဂိုလ်တစ်ဦးလည်းဖြစ်ပါတယ်။ 

ယူနိုက်တက်ဟာ လာမယ့်နွေရာသီမှာ အပြောင်းအရွှေ့ကြီးကြီမားမားပြုလုပ်ဖို့ပြင်ဆင်နေတာကြောင့် ပရိသတ်တွေအနေနဲ့ အသင်းကို အများကြီးမျှော်လင့်ထားကြတယ်လို့သိရပါတယ်။ အထူးသဖြင့် ယူနိုက်တက်ဟာ ဒီရာသီမှာ နောက်တန်းပိုင်း ဒဏ်ရာပြဿနာတွေအများအပြားကြုံတွေ့ခဲ့ရတာ နောက်ခံကစားသမား အများအပြားကို ပစ်မှတ်ထားနေတယ်လို့သတင်းတွေထွက်ပေါ်နေပါတယ်။ လောလောဆယ် ယူနိုက်တက်က ချိတ်ဆက်နေတယ်လို့သတင်းထွက်နေတဲ့ နောက်ဆုံးကစားသမားဟာ အဲဗာတန်နောက်ခံလူ ဂျာရတ်ဘရန့်ဝိတ်ဖြစ်ပြီး အသက်-၂၁ နှစ်အရွယ်ကစားသမားဟာ တန်ဟက်စိတ်ကြိုက်ကစားသမားတစ်ဦးဖြစ်ပါတယ်။