အင်္ဂလန်လက်ရွေးစင်နည်းပြ သောမတ်စ်တူချယ်လ်က လတ်ဗီယာကို ၃-၀ နဲ့ဂိုးပြတ်အနိုင်ရခဲ့တဲ့ ကမ္ဘာ့ဖလားခြေစစ်ပွဲစဉ်မှာ အသင်းရဲ့ကွင်းလယ်လူ ဂျုဒ်ဘယ်လင်ဟမ်ကို လူစားလဲခဲ့ခြင်းမှာ အနီကတ်ပြသခံရမှာစိုးလို့ဖြစ်တယ်လို့ ရှင်းပြလာခဲ့ပါတယ်။ 

ပထမပိုင်းမှာ အဝါကတ်ပြသခံခဲ့ရတဲ့ ဘယ်လင်ဟမ်ဟာ ဒုတိယပိုင်းမှာလည်း တူညီတဲ့အမှားမျိုးထပ်မံကျူးလွန်ခဲ့တာကြောင့် အနီကတ်ပြသခံရဖို့ နီးစပ်ခဲ့ပြီး တူချယ်လ်အနေနဲ့ နောက်ထပ်တစ်ကြိမ်အမှားထပ်မလုပ်စေဖို့ ကစားသမားကို လူစားလဲခဲ့တာဖြစ်ပါတယ်။ ဘယ်လင်ဟမ်ဟာ ပွဲပြီးဆုံးအောင်ကစားနိုင်ခဲ့ခြင်းမရှိဘဲ ၆၇ မိနစ်မှာပဲ ဖီးလ်ဖိုဒန်နဲ့ လူစားလဲခံခဲ့ရပါတယ်။ 

ပွဲအပြီးမှာ တူချယ်လ်က "ဘယ်လင်ဟမ်အနီကတ်အပြမခံရတာ ကျွန်တော်တို့ကံကောင်းပါတယ်။ သူ့ကိုလူစားလဲခဲ့တာ အနီကတ်ထိမှာစိုးလို့ပါ။ ဒီလိုအခြေအနေမှာ စွန့်စားမှုမယူသင့်ဘူးလို့ထင်ပါတယ်" လို့ပြောကြားခဲ့ပါတယ်။ ပြီးခဲ့တဲ့အယ်လ်ဘေးနီးယားနဲ့ပွဲစဉ်မှာ တိုးတက်မှုတွေရှိလာတဲ့အင်္ဂလန်ဟာ ယခုပွဲစဉ်မှာလည်း လတ်ဗီယာကို ၃-၀ နဲ့အနိုင်ရခဲ့ပြီး ဦးဆောင်ဂိုးကိုတော့ နောက်ခံလူ ရီစီဂျိမ်းစ်က သွင်းယူပေးခဲ့တာဖြစ်ပါတယ်။  

ဆက်လက်ပြီး တူချယ်လ်က "လွယ်ကူတဲ့ပွဲတစ်ပွဲတော့မဟုတ်ခဲ့ပါဘူး။ အဖွင့်ဂိုးကိုရဖို့ ရုန်းကန်ခဲ့ရပါတယ်။ ကောင်းတဲ့အချက်တွေလည်းရှိပါတယ်။ ကျွန်တော်တို့ ဂိုးမပေးခဲ့ရဘဲ တည်ကန်ဘောတွေကနေ အခွင့်အရေးတွေဖန်တီးနိုင်ခဲ့ပါတယ်။ ဒီပွဲမှာ ဖရီးကစ်ကနေ ဦးဆောင်ဂိုးရခဲ့ပေမယ့် ဒါက ပုံမှန်ပါပဲ။ အသင်းရဲ့စိတ်ဓာတ်နဲ့ စွမ်းအင်ကို ကျွန်တော်အရမ်းကျေနပ်ပါတယ်" လို့ပြောကြားခဲ့ပါတယ်။ 

အဖွင့်ဂိုးကို ဖရီးကစ်ကနေ လှလှပပကန်သွင်းယူပေးခဲ့တဲ့ ရီစီဂျိမ်းစ်နဲ့ပတ်သက်ပြီး ဂျာမန်သားနည်းပြက "ကျွန်တော်နဲ့သူနဲ့ ချဲလ်ဆီးမှာ အလုပ်တွဲလုပ်ခဲ့ဖူးလို့ သူ့အကြောင်းကိုကောင်းကောင်းသိထားပါတယ်။ သူ့ရဲ့ခြေစွမ်းနဲ့ အရည်အသွေးက မယုံနိုင်စရာပါ။ ဒီနေ့ပွဲမှာ သူ့ရဲ့စွမ်းဆောင်ရည်က ဂုဏ်ယူစရာပါ" လို့ပြောကြားခဲ့ပါတယ်။ 

၂ နှစ်ကျော်အကြာမှာ အင်္ဂလန်အသင်းအတွက်ပြန်လည်ပါဝင်ကစားပြီး ဂိုးသွင်းယူနိုင်ခဲ့တဲ့ ဂျိမ်းစ်ကလည်း "အသင်းအတွက်မကစားရတာကြာပါပြီ။ ၂ နှစ်ခွဲလောက် ကျွန်တော်စိတ်ပျက်လက်ပျက်နေထိုင်ခဲ့ရပါတယ်။ အခုလို နိုင်ငံအသင်းမှာပြန်အရွေးခံရလို့ အရမ်းပျော်ခဲ့ပါတယ်။ ဂိုးသွင်းနိုင်ခဲ့တဲ့အတွက်လည်း ပျော်ပါတယ်" လို့ပြောကြားခဲ့ပါတယ်။ 

နည်းပြသစ်တူချယ်လ်နဲ့ပတ်သက်ပြီး ဂျိမ်းစ်က "သူ့ရဲ့စိတ်ကူးအကြံဉာဏ်၊ ပန်းတိုင်နဲ့ ရည်မှန်းချက်တွေက ရှင်းပြပါတယ်။ကျွန်တော်တို့မှာ အာရုံစိုက်စရာတစ်ခုပဲရှိပါတယ်။ ကမ္ဘာ့ဖလားအတွက် အရမ်းကောင်းတဲ့အသင်းတစ်သင်းတည်ဆောက်နိုင်ဖို့ပါ" လို့ပြောကြားခဲ့ပါတယ်။ 

အင်္ဂလန်အသင်းခေါင်းဆောင် ဟယ်ရီကိန်းကလည်း "တူချယ်လ်က အရမ်းတော်ပါတယ်။ လမ်းကြောင်းမှန်ပေါ်လျှောက်နေတယ်လို့ယုံကြည်ပြီး သူ့လိုနည်းပြမျိုးရဲ့လက်အောက်မှာ အလုပ်လုပ်ရတာ ဝမ်းသာစရာပါ။ သူယူလာတဲ့ စွမ်းအင်၊ စိတ်ဓာတ်နဲ့ နည်းဗျူဟာတွေကြောင့် အသင်းကပိုကောင်းလာမယ်လို့ယုံကြည်ပါတယ်" လို့ချီးကျူးပြောဆိုခဲ့ပါတယ်။