ခြေထောက်ဖြတ်တောက်ရလုနီးပါးဖြစ်ခဲ့တယ်လို့ ထုတ်ဖော်ပြောဆိုလိုက်တဲ့ ဘိုင်ယန်မြူးနစ်ဂန္တဝင် ရစ်ဘာရီ
ဘိုင်ယန်မြူးနစ်နဲ့ ပြင်သစ်ဂန္တဝင်ဘောလုံးသမားရစ်ဘာရီက သူ့ရဲ့ပရော်ဖက်ရှင်နယ်အားကစားသမားဘ၀ အဆုံးသတ်သွားစေနိုင်တဲ့ ခြေထောက်ဖြတ်တောက်ခွဲစိတ်ကုသရမှုတစ်ခုနဲ့ ရင်ဆိုင်ရလုနီးပါးဖြစ်ခဲ့တယ်လို့ ထုတ်ဖော်ပြောကြားခဲ့ပါတယ်။
ပြင်သစ်အခြေစိုက် L’Equipe သတင်းဌာနနဲ့တွေ့ဆုံချိန် တောင်ပံကစားသမားဟောင်းက သူ့ရဲ့ကစားသမားဘ၀ နောက်ဆုံးဘောလုံးရာသီမှာ ဒူးပုံမှန်ခွဲစိတ်ကုသမှုတစ်ခုခံယူချိန် ခန္ဓာကိုယ်တစ်သျှူးတွေကို ဆိုးဆိုးရွားရွားပျက်စီးစေတဲ့ ဗိုင်းရပ်စ်ပိုးဝင်မှုကြောင့် ခြေထောက်ဆုံးရှုံးရလုနီးပါးဖြစ်ခဲ့တယ်လို့ ပြောပါတယ်။ ရစ်ဘာရီက အီတာလျံကလပ် ဆလာနီတာနားမှာ သူ့ရဲ့နောက်ဆုံးဘောလုံးရာသီကို ရုန်းကန်မှုတွေနဲ့အတူ ဖြတ်သန်းခဲ့ပြီး ၂၀၂၂ ခုနှစ်မှာ ကစားသမားဘဝအနားယူခဲ့ပါတယ်။
ဒဏ်ရာရဲ့ပြင်းထန်မှုကို ငါးလနီးပါးကြာ မသိရှိခဲ့ရဘဲ ရစ်ဘာရီကတော့ ဒူးနာကျင်မှုဝေဒနာကို သက်သာစေဖို့ လေ့ကျင့်ခန်းအစီအစဉ်တွေ လျှော့ချခဲ့ရပြီး ကြံ့ခိုင်မှုပြည့်ဝစေရန် ရုန်းကန်ခဲ့ရတယ်လို့ ပြောပါတယ်။ ရစ်ဘာရီက “ ကျွန်တော်ရဲ့ဒူး ပိုပိုပြီး နာကျင်လာပါတယ်။ ပွဲစဉ်တွေအကြား ကျွန်တော်ရဲ့လေ့ကျင့်မှုတွေ အကြာကြီးမရှိခဲ့ပါဘူး။ ဒါပေမယ့် ကိုယ့်ကိုယ်ကိုယ်ကာကွယ်နိုင်တဲ့အထိတော့ ပြန်ကောင်းလာခဲ့ပါတယ်။
သြစတြီးယားမှာ ကျွန်တော် ခွဲစိတ်ကုသမှုခံယူခဲ့ပါတယ်။ ခွဲစိတ်ကုသမှုအကောင်းဆုံးပြုလုပ်ပြီး အတွင်းမှာ အကာအရံအဖြစ် ပလိတ်ပြားတစ်ခုထည့်သွင်းခဲ့ပါတယ်။ ဒါပေမယ့် ငါးလလောက်အကြာမှာတော့ ဒဏ်ရာဆီ ရောဂါပိုးဝင်ရောက်သွားပါတယ်။ ဆရာဝန်တွေက အကာအရံအဖြစ်ထည့်သွင်းထားတဲ့ ပလိတ်ပြားကို ဖယ်ရှားခဲ့ပါတယ်။ ဒါပေမယ့် ရောဂါပိုးက ကျွန်တော့်ကို အတော်လေးတိုက်ခိုက်ဖျက်ဆီးပြီးပါပြီ။ ရောဂါအခြေအနေအရမ်းဆိုးတော့ ခြေထောက်မှာ အပေါက်တွေတောင် ဖြစ်သွားပါတယ်။
ကျွန်တော်လည်း သြစတြီးယားမှာရှိတဲ့ ဆေးရုံတစ်ခုရဲ့အရေးပေါ်ကုသဆောင်မှာ ၁၂ ရက်ကြာ တက်ရောက်ခဲ့ပါတယ်။ ဒီလိုဒဏ်ရာနဲ့ရောဂါအခြေအနေကြောင့် ကျွန်တော်ရဲ့ခြေထောက် ဖြတ်တောက်ရနိုင်လို့ ကျွန်တော်ကိုယ်တိုင်လည်း တကယ်ကို ထိတ်လန့်ကြောက်ရွံ့ခဲ့ပါတယ်”လို့ ပြောပါတယ်။ ဘိုင်ယန်မြူးနစ်ဂန္တဝင်ရစ်ဘာရီက ဂျာမန်မြေမှာ ဘွန်ဒက်စ်လီဂါချန်ပီယံဆု ရှစ်ကြိမ်၊ ပိုကယ်လ်ဖလား ငါးကြိမ်နဲ့ ချန်ပီယံလိဂ်ဆုဖလား တစ်ကြိမ် ဆွတ်ခူးနိုင်ခဲ့ပါတယ်။ သူက ဘိုင်ယန်မြူးနစ်အတွက် လိဂ် ၂၇၃ ပွဲအထိ ပါဝင်ကစားခဲ့ပြီး အသင်းသမိုင်းတလျှောက် လိဂ်ပွဲစဉ်အများဆုံးကစားပေးတဲ့ နိုင်ငံရပ်ခြားကစားသမားအဖြစ် မှတ်တမ်းဝင်ခဲ့ပါတယ်။ ရစ်ဘာရီအနေဖြင့် နည်းပြလောကဆီ ဝင်ရောက်လာမလားဆိုတာကိုတော့ ဆက်လက်စောင့်ကြည့်သွားရပါလိမ့်မယ်။
