အိုက်စလန်ကို ရှုံးခဲ့ပေမယ့် အင်္ဂလန်က ယူရိုပြိုင်ပွဲအတွက် အသင့်ဖြစ်နေလိမ့်မယ်လို့ ပြောလိုက်တဲ့ ဆောက်ဂိတ်
ဂါရတ်ဆောက်ဂိတ်က မနေ့ည အိုက်စလန်ကို ရှုံးနိမ့်ခဲ့အပြီး အင်္ဂလန်ပရိသတ်တွေရဲ့ လှောင်ပြောင်မှုကို နားလည်ပေမယ့် အသင်းက ယူရိုပြိုင်ပွဲအတွက် အသင့်ဖြစ်နေလိမ့်မယ်လို့ ကြွေးကြော်သွားခဲ့ပါတယ်။
အင်္ဂလန်အသင်းဟာ မနေ့ညကပွဲစဉ်အတွင်း ဘောလုံးပိုင်ဆိုင်မှုအသာစီးနဲ့ ကစားနိုင်ခဲ့ပေမယ့် အိုက်စလန်ရဲ့အစောပိုင်းသွင်းဂိုးကို ချေပနိုင်ခြင်းမရှိဘဲ ရှုံးနိမ့်ခဲ့ပါတယ်။ ပထမပိုင်းနဲ့ ပွဲအပြီးမှာတော့ အိမ်ရှင်ပရိသတ်တွေဟာ အင်္ဂလန်အသင်းကို Booလုပ်ကာ လှောင်ပြောင်ခဲ့ကြပါတယ်။
ပွဲအပြီးမှာ ဆောက်ဂိတ်က "ပရိသတ်တွေ လှောင်ပြောင်ကြတာကို ကျွန်တော် လုံးဝနားလည်ပါတယ်။ ကျွန်တော်တို့ ပွဲအတွင်းမှာ သူတို့စိတ်လှုပ်ရှားအောင် ကစားနိုင်ခဲ့ခြင်းမရှိပါဘူး။ ကျွန်တော်တို့ အဆုံးသတ်သေချာသင့်တဲ့ အခွင့်အရေးကောင်းတွေ အများအပြားရခဲ့ပြီး အဲ့ဒီလိုမလုပ်နိုင်ခဲ့တာကြောင့် ပြိုင်ဘက်ကို ယုံကြည်မှုပေးသလိုဖြစ်သွားပါတယ်။ ဒါပေမယ့် ကျွန်တော်တို့ ဒီည ပေါ်လွင်ထင်ရှားတဲ့ အမှားအချို့ကိုလည်း ပြုလုပ်ခဲ့ပါတယ်။ ကျွန်တော့်အမြင်အရတော့ ဒီပွဲကနေ အများကြီး သင်ယူနိုင်ခဲ့ပေမယ့် ပရိသတ်တွေရဲ့တုံ့ပြန်မှုအပေါ် ဘာမှပြောစရာမရှိပါဘူး။ ပရိသတ်တွေရှိရင် အားတက်ရတာမှန်ပေမယ့် သူတို့အားပေးနိုင်အောင်လည်း ကောင်းကောင်းကစားပြီး pressလုပ်နိုင်ဖို့ လိုပါတယ်။ ဒီည အဲ့ဒီလိုမလုပ်နိုင်ခဲ့တာကြောင့် ပရိသတ်တွေရဲ့တုံ့ပြန်မှုကို လက်ခံရမှာပါ"လို့ ပြောခဲ့ပါတယ်။
ယူရိုပြိုင်ပွဲနဲ့ပတ်သက်ပြီး ဆောက်ဂိတ်က "ကျွန်တော်တို့ အသင့်ဖြစ်နေပါပြီ။ ဒီညကတော့ ကျွန်တော်တို့ မျှော်လင့်ထားတဲ့အတိုင်း မဖြစ်ခဲ့ပါဘူး။ ကစားသမားတွေကိုလည်း နေ့တိုင်းက မင်းတို့လိုချင်သလိုဖြစ်လာမဟုတ်လို့ ဒီနေ့က အဲ့ဒီလိုနေ့ပဲဆိုပြီး ပြောထားပါတယ်။ ဒါပေမယ့် အရာအားလုံးကတော့ လွဲချော်ခဲ့တာမဟုတ်ပါဘူး။ ကျွန်တော်တို့ ပွဲကို အနိုင်ရနိုင်တဲ့ အခွင့်အရေးအများကြီးရခဲ့ပေမယ့် ပြိုင်ဘက်ကိုလည်း အခွင့်အရေးတွေ အများကြီးပေးခဲ့ပါတယ်"လို့ ပြောခဲ့ပါတယ်။
