အိုမန်နဲ့ အိမ်ကွင်းမှာ တစ်ဖက်တစ်ဂိုးစီသရေကျတဲ့ ကမ္ဘာ့ဖလားခြေစစ်ပွဲအပြီး တောင်ကိုရီယားကပ္ပတိန် ဆွန်ဟောင်မင်က အသင်းဖော်တွေအတွက် ဦးဆောင်မှုအခန်းကဏ္ဍမှာ သူကိုယ်တိုင် မပါဝင်ပေးနိုင်ခဲ့ဘူးလို့ ပြောဆိုခဲ့ပါတယ်။ လာမယ့်နွေရာသီ၊ အမေရိကန်၊ ကနေဒါနဲ့ မက္ကဆီကိုတို့မှာ ကျင်းပမယ့် ပြိုင်ပွဲကြီးဆီ ရှေ့ဆက်နိုင်မယ့် ရွှေရောင်အခွင့်အလမ်းတစ်ရပ်ကို အရယူနိုင်ဖို့အတွက် ကြိုးစားရမယ့်အချိန်မှာ တော့တင်ဟမ်တိုက်စစ်မှူးက ယမန်နေ့ပွဲစဉ်အတွင်း ဂိုးပေါက်ပျောက်ခဲ့ပါတယ်။

တောင်ကိုရီးယားနည်းပြဟောင်မြန်ဘိုကတော့ ပွဲချိန်နှောင်းပိုင်းချေပဂိုးပေးရမှုနဲ့အတူ အခုပွဲစဉ်သရေရလဒ်ကို ကမ္ဘာ့ဖလားခြေစစ်ပွဲ(အာရှဇုန်)တတိယအဆင့်မှာ သူတို့အသင်းရဲ့အဆိုးဝါးဆုံးစွမ်းဆောင်ရည်အဖြစ် သတ်မှတ်ခဲ့ပါတယ်။လက်ရှိမှာ တောင်ကိုရီးယားက အုပ်စု(B)ရဲ့အုပ်စုဗိုလ်အဖြစ် ဂျော်ဒန်၊ အီရတ်တို့ကို သုံးမှတ်ဖြတ်ကာ ရပ်တည်နေပါတယ်။ စည်းမျဉ်းတွေအရ အုပ်စုထိပ်ဆုံးအသင်းနှစ်ခုကသာ နောက်တစ်ဆင့်တက်လှမ်းနိုင်ပါလိမ့်မယ်။

ဆိုးလ်မြို့တော်အနီး၊ ဂိုယန်းအရပ်မှာကျင်းပတဲ့ ပွဲစဉ်အပြီး ဆွန်ဟောင်မင်က “ ဒီနေ့မှာ ကျွန်တော်က အသင်းဖော်တွေအတွက် ဦးဆောင်ပေးရမယ့်အခန်းကဏ္ဍမှာ မပါဝင်နိုင်ခဲ့ဘူးလို့ ခံစားမိပါတယ်။  ဒါပေမယ့် ကျွန်တော်တို့ အတူတကွဖြတ်သန်းသွားရမယ့်ပွဲစဉ်က အခုတစ်ပွဲတည်းမဟုတ်ပါဘူး။ ဒီနေ့လိုအခြေအနေမျိုးဖြစ်လာဖို့အတွက် အပေါင်းလက္ခဏာဆောင်တဲ့အရာတွေကို ကျွန်တော်တို့ ဖန်တီးနိုင်ခဲ့ပြီးပါပြီ။ အခုပွဲစဉ်ကနေသင်ခန်းစာရယူပြီး နောက်တစ်ဆင့်တက်ရောက်နိုင်ဖို့အတွက် ကြိုးစားသင့်ပါတယ်”လို့ သတင်းထောက်တွေဆီ ပြောပါတယ်။

တောင်ကိုရီးယားအသင်းက လာမယ့်သီတင်းပတ်အင်္ဂါနေ့မှာလည်း ဂျော်ဒန်ကို အိမ်ကွင်းမှာ ဧည့်ခံကစားရပါမယ်။ သူတို့တွေက လာမယ့်ဇွန်လ၊ အုပ်စုပွဲစဉ်တွေ အဆုံးမသတ်ခင် အီရတ်နဲ့ အဝေးကွင်းပွဲစဉ် ယှဉ်ပြိုင်ကစားသွားရပါလိမ့်မယ်။အခုရာသီ၊ တော့တင်ဟမ်အသင်းမှာ ကြံ့ခိုင်မှုပိုင်းဆိုင်ရာကိစ္စတွေနဲ့အတူ ပွဲကစားချိန်ရရှိဖို့ ရုန်းကန်နေရတဲ့ ဆွန်ဟောင်မင်က “ လူတွေက အခုခြေစစ်ပွဲအဆင့်ယှဉ်ပြိုင်မှုတွေကို လွယ်ကူတယ်လို့ ထင်မြင်ယူဆနိုင်ပါတယ်။ ဒါပေမယ့် ပွဲစဉ်တိုင်းအတွက် ကျွန်တော်တို့ကြိုးစားသွားဖို့ အရမ်းလိုအပ်ပါတယ်။

အခုလိုပွဲစဉ်မျိုးက ကျွန်တော်တို့အတွက် သင်ခန်းစာတစ်ခု ပေးနိုင်ပါလိမ့်မယ်။ ဒီပွဲစဉ်မှာ ရရှိနိုင်တဲ့ အပေါင်းလက္ခဏာဆောင်ခဲ့တဲ့အရာအချို့ကို ဆက်လက်သယ်ဆောင်သွားနိုင်ဖို့ လိုအပ်ပါတယ်”လို့ ဆိုပါတယ်။