တော့တင်ဟမ်မှ ထွက်ခွာနိုင်တယ်ဆိုတဲ့ ကောလာဟလတွေကို ငြင်းဆန်ပယ်ချလိုက်တဲ့ ဆွန်ဟောင်မင်
ဆွန်ဟောင်မင်က တော့တင်ဟမ်အသင်းမှ ထွက်ခွာနိုင်တယ်ဆိုတဲ့ ဆွေးနွေးမှုတွေကို ပြတ်ပြတ်သားသား ငြင်းဆန်ပယ်ချလိုက်ပါတယ်။ ဖီနာဘာချီမှာ မော်ရင်ဟိုနဲ့ လက်တွဲနိုင်ဖို့ အံ့အားသင့်ဖွယ်အပြောင်းအရွှေ့တစ်ခုနဲ့ တောင်ကိုရီးယားသားဆီ ချိတ်ဆက်လာခဲ့ဖူးပါတယ်။
တော့တင်ဟမ်နည်းပြဟောင်းမော်ရင်ဟိုက ဆွန်ဟောင်မင်ကို ခေါ်ယူလိုနေမှုနဲ့အတူ တူရကီထိပ်သီးကလပ်က နွေရာသီမှာ အပြောင်းအရွှေ့အသုံးစရိတ်ကြီကြီးမားမား အသုံးပြုသွားရန် လိုလားနေတယ်လို့ လွန်ခဲ့တဲ့သီတင်းပတ်အတွင်း ရေးသားဖော်ပြခဲ့ပါတယ်။ ဒါပေမယ့် ဆွန်ဟောင်မင်ကတော့ သူ့ရဲ့အနာဂတ်နဲ့ ပတ်သက်လို့ ထင်ကြေးပေးမှုတွေအပေါ် သက်သောင့်သက်သာရှိမနေဘဲ ဘယ်ကိုမှ ထွက်ခွာသွားဖို့ မရှိပါဘူးလို့ အတိအလင်းပြောဆိုလိုက်ပါတယ်။
ဆွန်ဟောင်မင်ရဲ့စာချုပ်သက်တမ်း တစ်နှစ်သာကျန်ရှိတော့ပေမယ့် တော့တင်ဟမ်ဘက်က နောက်ထပ်တစ်နှစ်သက်တမ်းတိုးခွင့်လည်း ရှိနေပြန်ပါတယ်။ အသက်-၃၁ နှစ်အရွယ် တိုက်စစ်မှူးက မြောက်လန်ဒန်ကလပ်နဲ့အတူ အောင်မြင်မှုတွေဆွတ်ခူးလိုတယ်လို့လည်း ပြောဆိုလိုက်ပါတယ်။
ဆိုးလ်မြို့၊ ကမ္ဘာ့ဖလားခြေစစ်ပွဲစဉ်မှာ တရုတ်အသင်းကို ၁-၀ ဂိုးဖြင့် တောင်ကိုရီးယားအသင်းက အနိုင်ယူခဲ့တဲ့ပွဲစဉ်အပြီး ဆွန်ဟောင်မင်က “ကလပ်အသင်းနဲ့ ဘာအပြောင်းအလဲမှ လုပ်သွားစရာ မရှိပါဘူး။ ဒီအချက်နဲ့ပတ်သက်လို့လည်း ပြောစရာဘာမှမရှိပါဘူး။ အခုအခြေအနေနဲ့ပတ်သက်လို့ ကျွန်တော်ကိုယ်တိုင်တောင် နည်းနည်းလေး မသက်မသာဖြစ်နေပါတယ်။ ကျွန်တော်ကတော့ တော့တင်ဟမ်အတွက်ပဲ အကောင်းဆုံးတွေ ပေးဆပ်သွားချင်ပါတယ်။ စာချုပ်သက်တမ်းလည်း ရှိနေပါသေးတယ်။ ငွေကြေးဆိုတာ ကျွန်တော့်အတွက် အရေးအကြီးဆုံးမဟုတ်ပါဘူး။ ကျွန်တော့်အတွက် အရေးအကြီးဆုံးအရာက ကျွန်တော်ပျော်ရွှင်နေတဲ့လိဂ်ပြိုင်ပွဲမှာ ဆက်ကစားခွင့် ရရှိနေဖို့ပါပဲ။ ပရီးမီးယားလိဂ်ပြိုင်ပွဲမှာ ကျွန်တော့်အတွက် လုပ်စရာတွေ အများကြီးရှိနေပါသေးတယ်” လို့ ပြောပါတယ်။
၂၀၁၅ ခုနှစ်မှာ လန်ဒန်မြို့ဆီပြောင်းရွှေ့လာတဲ့ ဆွန်ဟောင်မင်က တော့တင်ဟမ်အတွက် ၄၀၈ ပွဲကစား၊ ၁၆၂ ဂိုးသွင်းယူကာ အသင်းသမိုင်းတလျှောက်ဂိုးသွင်းအများဆုံး ကစားသမားစာရင်းရဲ့ပဉ္စမနေရာဆီ တက်လှမ်းလာပါတယ်။
