အေစီမီလန်ကွင်းလယ်လူ ရူဘင်လော့ဖ်တပ်စ်ဟာ နာပိုလီနဲ့ယှဉ်ပြိုင်ခဲ့တဲ့ စီးရီးအေပွဲစဉ်မတိုင်မီမှာ အူအတက်ရောင်ခဲ့လို့ ပွဲစဉ်အတွင်း ပါဝင်ကစားနိုင်ခဲ့ခြင်းမရှိဘဲ ဆေးရုံသို့သွားရောက်ကာ ခွဲစိတ်ကုသမှုခံယူခဲ့ရတယ်လို့ သိရပါတယ်။ လော့ဖ်တပ်စ်မပါဝင်နိုင်ခြင်းနဲ့အတူ အေစီမီလန်ကလည် နာပိုလီကို အဝေးကွင်းမှာ ၂-၁ နဲ့ရှုံးနိမ့်ခဲ့ပြီး အမှတ်ပေးဇယားရဲ့ အဆင့် ၉ နေရာမှာပဲ ဆက်လက်ရပ်တည်နိုင်ခဲ့ပါတယ်။ ချဲလ်ဆီးကွင်းလယ်လူဟောင်းဟာ ယခုရာသီမှာ အေစီမီလန်အတွက်ပါဝင်ကစားပေးဖို့ ရုန်းကန်နေရပြီး ဒဏ်ရာပြဿနာတွေကြောင့် စီးရီးအေပွဲစဉ် ၁၄ ပွဲသာ ပါဝင်ကစားနိုင်ခဲ့တာဖြစ်ပါတယ်။ 

ကြွက်သားဒဏ်ရာပြဿနာကြောင့် အေစမီလန်ရဲ့ပွဲစဉ်တွေကို ၁၂ ပွဲအထိလွဲချော်ခဲ့ရတဲ့ လော့ဖ်တပ်စ်ဟာ ယခုအခါမှာလည်း နောက်ထပ် ၁ လလောက်အထိ အနားယူသွားရဖို့ရှိနေတယ်လိုသိရပါတယ်။ ကစားသမားဟာ ၂၀၂၃ ခုနှစ်မှာ အေစီမီလန်သို့စတင်ရောက်ရှိခဲ့တာဖြစ်ပြီး ၂၀၂၇ ခုနှစ်အထိ စာချုပ်သက်တမ်းကျန်ရှိနေပါသေးတယ်။ 

အေစီမီလန်အတွက် ပြိုင်ပွဲစုံ ၆၂ ပွဲကစားထားရာမှာ လော့ဖ်တပ်စ်ဟာ ၁၀ ဂိုးသွင်းပြီး ဂိုးဖန်တီးမှု ၃ ကြိမ်သာပြုလုပ်ထားနိုင်ပါသေးတယ်။ လာမယ့် ကြာသပေတေးနေ့မှာ အေစီမီလန်ဟာ ကိုပါအီတလီယာဆီမီးဖိုင်နယ်ပွဲစဉ်အဖြစ် အင်တာမီလန်နဲ့ယှဉ်ပြိုင်သွားရမှာဖြစ်ပြီး ဆေးရုံမှာ ၂ ရက်ကြာနေထိုင်ကာ ၁ လလောက်အထိအနားယူသွားရမယ့် လော့ဖ်တပ်စ်ကတော့ အဆိုပါပွဲစဉ်ကို လွဲချော်သွားမှာဖြစ်ပါတယ်။