ချဲလ်ဆီးနည်းပြ အန်ဇိုမာရက်စ်ကာက ယမန်နေ့ညယှဉ်ပြိုင်ခဲ့တဲ့ ပရီးမီးယားလိဂ်ပွဲစဉ်မှာ မန်စီးတီးကို ၃-၁ နဲ့ဂိုးပြတ်ရှုံးနိမ့်ခဲ့ပြီးနောက် အသင်းရဲ့ဂိုးသမား ရောဘတ်ဆန်းချက်ဇ်ရဲ့အမှားက ပွဲရဲ့အဖြေကို ပြောင်းလဲသွားစေခဲ့တယ်လို့ ဝန်ခံပြောကြားလာခဲ့ပါတယ်။ 

ယခုပွဲစဉ်မှာ ချဲလ်ဆီးဟာ ပွဲအစ ၃ မိနစ်မှာရရှိလာတဲ့ မာဒူကီရဲ့သွင်းဂိုးနဲ့အတူ မန်စီးတီးကို စောစောစီးစီးဦးဆောင်ထားနိုင်ခဲ့ပေမယ့် ချေပဂိုးနဲ့ အနိုင်ဂိုးတွေပြန်လည်ခွင့်ပြုခဲ့ရပြီး ပရီးမီးယားလိဂ်မှာ နိုင်ပွဲပျောက်ဆုံးခဲ့ပြန်တာဖြစ်ပါတယ်။ မန်စီးတီးအတွက် ချေပဂိုးကို ပထမပိုင်းပြီးကာနီးမှာ ဂျီဗာဒီအောက သွင်းယူပေးခဲ့ပြီး ၁-၁ ဆိုတဲ့ရလဒ်ထွက်ပေါ်ခဲ့ကာ ချဲလ်ဆီးအနေနဲ့ ဦးဆောင်ဂိုးတွေရရှိဖို့ အခွင့်အရေးတွေရရှိခဲ့ပါတယ်။ 

သို့သော်လည်း ပွဲကစားချိန် ၆၈ မိနစ်မှာတော့ အသင်းရဲ့ဂိုးသမား ဆန်းချက်ဇ်ရဲ့အမှားမှတစ်ဆင့် ချဲလ်ဆီးတို့ ဦးဆောင်ဂိုးခွင့်ပြုခဲ့ရပြီး မန်စီးတီးတိုက်စစ်မှူး အာလင်းဟာလန်းက သေသေသပ်သပ်အဆုံးသတ်ခဲ့တာဖြစ်ပါတယ်။ ထို့နောက်ပွဲပြီးကာနီး ၈၇ မိနစ်မှာတော့ မန်စီးတီးအတွက် အနိုင်သေချာစေမယ့်ဂိုးကို ဖီးလ်ဖိုဒန်က ထပ်မံသွင်းယူပေးခဲ့ပြီးအိမ်ကွင်း အီတီဟတ်မှာ ဂိုးပြတ်နိုင်ပွဲရရှိစေခဲ့ပါတယ်။
 
ပွဲအပြီးမှာ မာရက်စ်ကာက “ကျွန်တော်တို့ ပထမဆုံးဂိုးအရင်သွင်းနိုင်ခဲ့ပြီး ဒုတိယဂိုးသွင်းဖို့အတွက်လည်း အခွင့်အရေး‌ ၂ ကြိမ် ၃ ကြိမ်လောက်ရခဲ့ပါတယ်။ ဒါပေမယ့် အခွင့်အရေးတွေကို လွဲချော်ခဲ့လို့ ပွဲကအခြေအနေပြောင်းလဲသွားခဲ့ပါတယ်။ ဒုတိယဦးဆောင်ဂိုးပေးလိုက်ရပြီးနောက်မှာ ပွဲကလုံးဝပြောင်းလဲသွားခဲ့ပြီး အဲဒီဂိုးအတွက် ဆန်းချက်ဇ်အနေနဲ့ အခုထက်ပိုကောင်းလာရမယ်ဆိုတာ သိဖို့လိုအပ်ပါတယ်။ နေ့တိုင်းအလုပ်ကြိုးစားပြီး တိုးတက်မှုကိုပြသသွားနိုင်ရပါမယ်။ တစ်သင်းလုံးအခုထိ ပိုကောင်းလာဖို့လိုအပ်ပါသေးတယ်” လို့ပြောကြားခဲ့ပါတယ်။ 

ပွဲပြီးသတင်းစာရှင်းလင်းပွဲမှာလည်း မာရက်စ်ကာက “သေချာတာတစ်ခုကတော့ ဆန်းချက်ဇ်အနေနဲ့ အခုထက်ပိုကောင်းဖို့လိုအပ်တယ်ဆိုတာ သိထားရပါမယ်။ သူသိမယ်လို့လည်း ယုံကြည်ပါတယ်။ ကျွန်တော်တို့သူ့ကို ယုံကြည်ထားပါတယ်။ လောလောဆယ်မှာ အမှားအချို့လုပ်မိတယ်ဆိုပေမယ့် သူက ယုံကြည်မှုနဲ့ထိုက်တန်တဲ့ကစားသမားပါ။ အခုချိန်မှာတော့ နောက်ပွဲအတွက် အာရုံစိုက်သွားရပါမယ်” လို့ပြောကြားခဲ့ပါတယ်။ 

လာမယ့်ဖေဖော်ဝါရီလ ၄ ရက်နေ့မှာတော့ ချဲလ်ဆီးဟာ ဝက်စ်ဟမ်းကို အိမ်ကွင်းစတန်းဖို့ဒ်ဘရစ်ချ်မှာ ဧည့်ခံကစားသွားရမှာဖြစ်ပြီး အနိုင်ရလဒ်ကို ပြန်လည်ပုံဖော်သွားနိုင်မလား စောင့်ကြည့်ရပါမယ်။ လောလောဆယ်မှာတော့ မာရက်စ်ကာရဲ့အသင်းဟာ ပရီးမီးယားလိဂ်အမှတ်ပေးဇယားရဲ့ အဆင့် ၆ နေရာမှာ ရပ်တည်နေပါတယ်။